Category: ახალი ამბები

დღეს, 19:00 საათზე, საზოგადოებრივი მაუწყებლის ეთერში კონსტიტუციური კანონის პროექტის საყოველთაო-სახალხო განხილვა გაიმართება.

პარლამენტის საპროცედურო საკითხთა და წესების კომიტეტის თავმჯდომარის გურამ მაჭარაშვილის ინფორმაციით, მოქალაქეებს საშუალება ექნებათ კითხვები დაუსვან კომისიის წევრებს, რომლებიც მათ შეკითხვებს პირდაპირ ეთერში უპასუხებენ.

საზოგადოებრივი მაუწყებლის ინფორმაციით, მაყურებლებს მათთვის საინტერესო კითხვების გაგზავნა შეეძლებათ პირველი არხის ოფიციალურ ფეისბუქგვერდზე ან ელექტრონულ მისამართზე: [email protected].

მაჭარაშვილი აღნიშნავს, რომ ჯანდაცვის სისტემის წარმომადგენელთა რეკომენდაცის საფუძველზე დაიგეგმა, რომ საყოველთაო განხილვა არა საზოგადოებაში გასვლის გზით, არამედ ტელეკომუნიკაციის საშუალებით მოხდეს. მისივე ინფორმაციით, საერთო სახალხო განხილვები, ერთი თვის განმავლობაში უნდა შედგეს.

თბილისის ინფექციური საავადმყოფოს კლინიკური დირექტორის, მარინა ეზუგბაიას განცხადებით, გამოჯანმრთელებულების პროცენტული მაჩვენებელი დადასტურებულებთან შედარებით 80%-ზე მეტია.

მისი თქმით, გამოჯანმრთელებულების რაოდენობა 3.5-ჯერ უსწრებს ამჯამად მკურნალობაზე მყოფ პაციენტებს.

ეზუგბაია ამბობს, რომ კორონავირუსით ინფიცირების 1 ახალი შემთხვევა „საბურთალოს კლასტერს“ უკავშირდება და ინფიცირებულის კონტაქტია.

“ჩვენი ცენტრის მონაცემები უცვლელია, გვყავს 57 დადასტურებული შემთხვევა, პრობლემური, მძიმე პაციენტები ამ ეტაპზე არ გვყავს, გვყავს მხოლოდ ორი მძიმე პნევმონიით პაციენტი, დანარჩენი პაციენტების მდგომარეობა ფასდება როგორც საშუალო და მსუბუქი სიმძიმის, უმეტესი საშუალო სიმძიმისაა“, – განაცხადა ეზუგბაიამ.

საქართველოში ამ დროისთვის კორონავირუსის 801 შემთხვევაა დადასტურებული, მათგან 644 გამოჯანმრთელდა, ხოლო 13 გარდაიცვალა.

საქართველოში კორონავირუსით ინფიცირების კიდევ 1 შემთხვევა დაფიქსირდა და საერთო რაოდენობა 801-მდე გაიზარდა.

ასევე, გამოჯანმრთელდა 4 პაციენტი და განკურნებულთა რიცხვი 644 გახდა. ინფორმაცია stopcov.ge-ზე რამდენიმე წუთის წინ განახლდა.

კარანტინის რეჟიმში რჩება 2424 ადამიანი, ხოლო სტაციონარში მეთვალყურეობის ქვეშ 304 პირი.

ქვეყანაში კორონავირუსით 13 ადამიანი გარდაიცვალა.

ავტოსაგზაო შემთხვევა წერეთლის გამზირზე. ჰიუნდაის მარკის ავტომობილი მოპედს შეეჯახა, რომელსაც არასრულწლოვანი მართვდა. მოზარდი სასწრაფო სამედიცინო დახმრების ჯგუფმა საავადმყოფოში გადაიყვანა. ექიმის ინფორმაციით, მოზარდს მსუბუქი დაზიანებები აქვს.

ადგილზე მობილიზებული იყო საპატრულო პოლიცია. სამართლდამცველები ადგენენ რა გახდა ავტოსაგზაო შემთხვევის მიზეზი, რის შემდეგაც მიეცემა მომხდარს შესაბამისი კვალიფიკაცია.

ეროვნული ბანკი მოქალაქეებს აფრთხილებს, რომ კომპანია Mazilla.ge, შესაძლოა, თაღლითების მიერ იმართებოდეს

სებ-ის განცხადებით, ეს ორგანიზაცია, რომელიც მოსახლეობას სესხის აღებისთვის შუამავლობას სთავაზობს, სებში რეგისტრირებული არ არის.

“Mazzila.ge არ წარმოადგენს საქართველოს ეროვნული ბანკის მიერ რეგისტრირებულ მიკროსაფინანსო ორგანიზაციას. აღსანიშნავია, რომ დეტალური და პერიოდულად განახლებადი ინფორმაცია ეროვნული ბანკის მიერ რეგისტრირებული მიკროსაფინანსო ორგანიზაციების შესახებ, ეროვნული ბანკის ოფიციალურ ვებგვერდზეა განთავსებული”, – წერია განცხადებაში.

გარდა ამისა, საქართველოს ეროვნული ბანკი კიდევ ერთხელ აფრთხილებს მოქალაქეებს, გამოიჩინონ განსაკუთრებული ყურადღება ფინანსური და პირადი მონაცემების ინტერნეტ სივრცეში გამოყენებისას.

“საქართველოს ეროვნული ბანკი მოგიწოდებთ, გამოიჩინოთ სიფრთხილე, განსაკუთრებით, თუ ეს საეჭვო ან გაურკვეველი რეპუტაციის ვებ-გვერდებზე პირადი და ფინანსური მონაცემების განთავსებას ეხება. დამატებითი შეკითხვების შემთხვევაში, გთხოვთ, დაგვიკავშირდეთ საქართველოს ეროვნული ბანკის ცხელ ხაზზე – 2 406 406“ , – აღნიშნულია განცხადებაში.

ხეჩინაშვილის სახელობის კლინიკის ექიმის ნიკოლოზ ფერაძის ინფორმაციით, ბაგებში მომხდარი სროლის შედეგად დაშავებულებიდან ერთ-ერთს წვივის არეში, ხოლო მეორეს – ბარძაყის არეში აქვს ჭრილობა მიყენებული.

ექიმის თქმით, დაშავებულებს ოპერაცია უტარდებათ და მათ სიცოცხლეს საფრთხე არ ემუქრება.

„სასწრაფო დახმარების ბრიგადამ შემოიყვანა ორი საშუალო ასაკის მამაკაცი. ერთ- ერთ მათგანს აღენიშნებოდა ცეცხლნასროლი ჭრილობა მარჯვენა ქვედა კიდურის არეში, მცირე წვივის ძვლის დაზიანებით. ის წაყვანილ იქნა საოპერაციო ბლოკში, ოპერაციული მკურნალობის მიზნით. რაც შეეხება მეორე მამაკაცს, მას აღენიშნებოდა მარცხნივ, ბარძაყის უკანა ზედაპირზე საშუალო ზომის ნაკვეთი ჭრილობა. მასაც ოპერაციული მკურნალობა ჩაუტარდება. არცერთის სიცოცხლეს საფრთხე არ ემუქრება“, – განაცხადა ნიკოლოზ ფერაძემ.

შეგახსენებთ, რომ რამდენიმე საათის წინ სამხარაულის ექსპერტიზის ბიუროსთან სროლა იყო. თვითმხილველის თქმით, ადგილზე 5 ავტომობილი იყო მისული, რომლებმაც გაისროლეს.

შსს-ს ინფორმაციით, მომხდარზე გამოძიება ორი მუხლით – 117-ე (ჯანმრთელობის განზრახ მძიმე დაზიანება) და 236-ე (იარაღის უკანონო შეძენა-შენახვა-ტარება) დაიწყო.

„ევროპული საქართველოს“ ერთ-ერთი ლიდერის, გიგა ბოკერიას თქმით, ენმ-სთან აფილირებულ პირებს აქცენტი მეორე ტურზე გადააქვთ, ოპოზიციამ კი არჩევნებზე გარდატეხის მოხდენა პირველივე ტურში უნდა შეძლოს.

“რამოდენიმე განცხადება გაკეთდა ბოლო დღეებში, რომელიც სრულიად უპირისპირდებოდა ამ სულისკვეთებას. ვგულისხმობ აქცენტის გადატანას არჩევნების მეორე ტურზე. ეს განცხადებები გაკეთდა იმ ადამიანებისგან, რომლებიც იყვნენ აფილირებული „ნაციონალურ მოძრაობასთან“. პირველ ტურში თუ ოპოზიცია გარკვეულ წარმატებას მიაღწევს, პრინციპულად მნიშვნელოვანია, რომ გარდატეხა პირველივე ტურში მოხდეს. მე არ ვიძახი, რომ 2018 წელი აუცილებლად განმეორდება”,- ამბობს ბოკერია „გიორგი თარგამაძის ფორმულა“-ში.

მისივე თქმით, უპასუხისმგებლობა იქნება მეორე ტურის გარისკვა, როცა შანსი პირველ ტურშიც არსებობს.

“იმედი მაქვს და ამაზე ვმუშაობ, რომ ყველა ვარიანტში დამარცხდეს ივანიშვილი იმიტომ, რომ ეს არის ეროვნული ამოცანა. ეს კაცი, რომლიც საფრთხეა ჩვენი ქვეყნისთვის მშვიდობიანად უნდა ჩამოვიცილოთ, მაგრამ როგორი უპასუხისმგებლო იქნებოდა ყველა ჩვენთაგანის მხრიდან, როცა შანსი გვაქვს პირველ ტურში მკაფიო შედეგის ჩვენების, გავრისკოთ მეორე ტური. ამ დროს იზრდება ნევროზულობა, რისკები და უადვილდებათ პროპაგანდა იმიტომ, რომ ამ შემთხვევაში მსხვილი პოლიტიკური ძალები ევროპული საქართველოს ჩათვლით იქნებიან მეორე ტურში უფრო მეტ ადგილას. ამ შემთხვევაში მცირდება რაოდენობა იმ ხალხის, რომლებიც იმასთან შედარებით, რომელთაც ივანიშვილის წასვლა უნდა და იმასთან შედარებით, ვინც ვთქვათ ევროპულ საქართველოს უჭერს მხარს“, – განაცხადა გიგა ბოკერიამ.

შინაგან საქმეთა სამინისტროს ინფორმაციით, სამეგრელოში 1991 წელს დაბადებული ა.წ. და 1976 წელს დაბადებული რ.პ დააკავეს, რომელთაც ბრალად ედებათ სისტემატურად მოქალაქისგან თანხის გამოძალვა.

“გამოძიებით დადგინდა, რომ ბრალდებულები მოქალაქეს გარკვეული ოდენობის თანხას სისტემატურად სძალავდნენ. პოლიციამ ავტომანქანიდან, რომლითაც ერთ-ერთი ბრალდებული გადაადგილდებოდა, ნივთმტკიცების სახით ამოიღო 3500 აშშ დოლარი, ხოლო მეორე ბრალდებულის სახლიდან სამართალდამცველებმა საბრძოლო მასალა და სავარაუდოდ ცეცხლსასროლი იარაღი ამოიღეს”,- აცხადებს შსს.

გამოძიება საქართველოს სისხლის სამართლის კოდექსის 181-ე მუხლის მე-2 ნაწილის “გ” ქვეპუნქტით მიმდინარეობს, რაც დიდი ოდენობით ქონების მიღების მიზნით ჩადენილ გამოძალვას გულისხმობს. დანაშაული 4-დან 7 წლამდე ვადით თავისუფლების აღკვეთას ითვალისწინებს.