Category: ჯანმრთელობა

მსოფლიოში ამჟამად  კორონავირუსის საწინააღმდეგო ვაქცინის  64.2 მილიონი  დოზაა გაკეთებული. ეს არის სხვადასხვა ქვეყნების ჯამური მაჩვენებელი და არ ნიშნავს, რომ ამდენი ადამიანია უკვე კორონავირუსის წინააღმდეგ ვაქცინირებული, რადგან იმუნიტეტის გამოსამუშავებლად ვაქცინის ორი დოზაა საჭირო.

ლიდერი გაკეთებული ვაქცინების რაოდენობით ამერიკის შეერთებული შტატებია, სადაც 20 მილიონზე მეტი დოზა ვაქცინა გაკეთდა, თუმცა ვაქცინაციის ტემპები აშშ–ში იმაზე ბევრად დაბალია, ვიდრე თავიდან ვარაუდობდნენ. 20 მილიონი დოზის გაკეთება გასული წლის დეკემბრის ბოლომდე იყო დაგეგმილი, თუმცა ეს ვერ მოხერხდა. ბოლო კვირას ვაქცინის ადმინისტრირების ტემპები დაჩქარდა, თუმცა სასურველისგან ჯერ შორს არის. ვაქცინის ერთი დოზა მაინც ამ დროისთვის აშშ–ს მოსახლეობის 5.25%–მა მიიღო.

გაკეთებული ვაქცინების რაოდენობით მეორე ადგილზეა ჩინეთი, – 15 მილიონი ვაქცინა 20 იანვრის მდგომარეობით, თუმცა ეს მისი მოსახლეობის იმდენად მცირე პროცენტია, რომ მოსახლეობის პროცენტულ საერთო სტატისტიკაში  ჩინეთი ლიდერებთან ახლოსაც არ არის.

მესამე ადგილზეა დიდი ბრიტანეთი – 6.82 მილიონი დოზა ვაქცინით, რაც მისი მოსახლეობის  9.36%–ის მიერ ვაქცინის ერთი დოზის მიღებას მაინც ნიშნავს.

მეოთხე ადგილზეა ისრაელი – 3.6 მილიონი ვაქცინით, მეხუთეზე  არაბეთის გაერთიანებული საემიროები – 2.49 მილიონი ვაქცინით, თუმცა ეს ორი ქვეყანა აცრილი მოსახლეობის პროცენტის მიხედვით მსოფლიოს ლიდერები არიან.

ისრაელში ვაქცინის მინიმუმ ერთი დოზა 24 იანვრის მდგომარეობით მოსახლეობის 29.52%–მა მიიღო, არაბეთის გაერთიანებულ საემიროებში კი 22.63%–მა.  აცრილი მოსახლეობის პროცენტული მაჩვენებლით მესამე ადგილზე დიდი ბრიტანეთია – 9.36%–ით. მეოთხეზე კი ბაჰრეინი, რომელმაც მოსახლეობის 8.47%–ის აცრა მოახერხა. აშშ აცრილი მოსახლეობის პროცენტული მაჩვენებლით მეხუთე ადგილზეა.

რაც შეეხება ევროპის ქვეყნებს, აქ დანია ლიდერობს, რომელმაც მოსახლეობის 3.15% აცრა, მას მოჰყვება ირლანდია – 2.47%–ით, დაახლოებით ასეთივე მაჩვენებელი (2%–ის ფარგლებში )აქვთ იტალიას და ესპანეთს, გერმანიას – 1.75%, საფრანგეთს – 1.51% შვედეთს -1.45%

თურქეთში ამ დროისთვის მოსახლეობის 1.48 პროცენტია აცრილი, რაც 1.24 მილიონი დოზა ვაქცინის გამოყენებას ნიშნავს. რუსეთში 13 იანვრის მონაცემებით აცრილი იყო 1 მილიონი ადამიანი, თუმცა ეს მისი მოსახლეობის 1%–იც არ არის.

რაც შეეხება ადამიანთა რაოდენობას, რომლებმაც კორონავირუსის საწინააღმდეგო ვაქცინის ორივე დოზა მიიღეს, 24 იანვრის მდგომარეობით ეს მაჩვენებელი მსოფლიოში 5.25 მილიონს შეადგენდა. აქედან 3 მილიონი ამერიკის მოქალაქეა, 1 მილიონი კი ისრაელის. გაერთიანებულ სამეფოში სრულად აცრილი 469 000 მოქალაქე ყავთ, არაბეთის გაერთიანებულ საემიროში კი 250 000. დანარჩენ ქვეყნებში ეს მაჩვენებელი ძალიან მცირეა.

ამ დროისთვის ვაქცინაცია სულ 60 ქვეყანაშია დაწყებული. მათი უმეტესობა Pfizer/BioNTech და  Moderna,–ს ვაქცინებს იყენებს. თურქეთი ამ ეტაპზე ჩინური Sinopharm –ით იცრება, რუსეთი მისივე წარმოებული   Sputnik V–ით. რუსული ვაქცინა ამ ეტაპზე ერთადერთი ვაქცინაა არგენტინაშიც.   მას იყენებენ სერბეთშიც, თუმცა სერბეთში პარალელურად   Pfizer/BioNTech–ის და  Sinopharm–ის ვაქცინაც გამოიყენება.

ინდოეთი მისივე წარმოებით Covaxin–ს და  Covishield–ს იყენებს. ბრაზილია ჩინურ Sinovac–ს. თავად ჩინეთი მისივე წარმოების ორ ვაქცინას – CNBG–ს და  Sinovac–ს.

დასავლეთ ევროპის ქვეყნები  Pfizer/BioNTech–ს და  Moderna–ს ვაქცინებს იყენებენ, ისევე როგორც ამერიკა. ჯერჯერობით Oxford/AstraZeneca–ს ვაქცინა ევროპაში მხოლოდ დიდ ბრიტანეთში და ჩრდილოეთ ირლანდიაში გამოიყენება.

ამ დროისთვის მსოფლიოში სხვადასხვა ქვეყნების მიერ წარმოებული კორონავირუსის ცხრა ვაქცინა გამოიყენება:

აშშ–გერმანია

Pfizer/BioNTech

აშშ

Moderna

დიდი ბრიტანეთი

Oxford/AstraZeneca,

რუსეთი

Sputnik V

ჩინეთი

Sinopharm

Sinovac

CNBG

ინდოეთი

Covaxin,

Covishield

ევროკავშირში კორონავირუსის საწინააღმდეგო ვაქცინაციის პროცესი ჩქარდება, პარალელურად კი სულ უფრო აქტიურდება ვაქცინაციის საწინააღმდეგო კამპანიები. ამ პროცესს ბევრი მოწინააღმდეგე ჰყავს მსოფლიოს სხვადასხვა ქვეყნებში, მათ შორის აშშ–ში და ევროპის სხვადასხვა ქვეყანაში,  საფრანგეთი  კი იმ ქვეყნებს შორის არის, სადაც ვაქცინის მიმართ უნდობლობა ყველაზე მეტად არის გამოხატული. გამოკითხვები აჩვენებს, რომ ფრანგებს არ ჯერათ ცოტა ხნის წინ შემუშავებული ვაქცინების ეფექტურობის და მათ უსაფრთხოებაში ეჭვი ეპარებათ.

სოციოლოგები ყურადღებას ამახვილებენ იმაზე, რომ დღეისათვის ვაქცინის მიმართ უნდობლობა გამოკითხულთა დაახლოებით მესამედმა გამოთქვა – ეს არის სხვადასხვა სოციალური პროფილის და განათლების სხვადასხვა დონის მქონე ადამიანები.

ასეთი კონტექსტში სულ უფრო ხმამაღლა ისმის მტკიცე ანტივაქსერთა ხმა – ასე უწოდებენ ვაქცინის მოწინააღმდეგეებს. სპეციალისტები თვლიან, რომ ამ ადამიანებს განსხვავებული მოტივები ამოძრავებთ – ზოგი მართლაც რეალურად შიშობს საკუთარი ჯანმრთელობის გამო, ზოგი პოპულარობის მოხვეჭას და საზოგადოებრივი გავლენის მოხვეჭას ცდილობს, ზოგი პირდაპირი გაგებით მოგებისაც – მაგალითად ნატუროპატიური პრეპარატების გაყიდვის გზით.

ვნახოთ უფრო დეტალურად, რა არგუმენტები აქვთ ანტივაქსერებს, მათ შორის ფრანგებს, სადაც აცრის საწინააღმდეგო განწყობები ევროპაში ყველაზე ძლიერია.

მაგალითად, ერთ–ერთი ფრანგი მამაკაცი, რომელიც ამტკიცებს, რომ სოციალურ ქსელებში 125 ათასი ხელმომწერი ყავს, დარწმუნებულია რომ მასზე ფარმაკომპანიები ნადირობენ. ამბობს, რომ მუქარებს იღებს, თუმცა მედიასთან საუბრისას ანონიმურად დარჩენას ამჯობინებს.

“ბილ გეითსის ზოგმა ვაქცინამ, როგორც ცნობილია, მსხვილი ეპიდემიები გამოიწვია ზოგ ქვეყანაში, მაგალითად ინდოეთში, სადაც გეითსმა ვაქცინა მიიტანა, მგონი პოლიომელიტის საწინააღმდეგ. მაშინ იქ 450 000 ბავშვი დაავადდა. სხვა ქვეყნებში კი, მაგალითად კენიაში, აცრის გამო ათასობით ახალგაზრდა ქალი უშვილოდ დარჩა.“– ამბობს ის, თუმცა როცა ჟურნალისტები მტკიცებულებების შესახებ ეკითხებიან, პასუხობს, რომ ამის შესახებ ბილ გეითსმა თავად ისაუბრა საკუთარ ლექციებზე დე კონფერენციებზე.

ანტივაქსერების თანადგომაში სოციალურ ქსელებში ხშირად არიან შემჩნეული სხვადასხვა ჯგუფები – სატანისტები, ანტისემიტები, შეთქმულების თეორიების მომხრეები, ნათელმხილველები და ა.შ.

განსხვავებული პოზიციების და მსოფლმხედველობის მიუხედავად ამ ადამიანებს ერთი რამ – ფარმაცევტული ბიზნესის სიძულვილი აერთიანებთ.

“არის ასეთი კომპანია მოდერნა, რომელმაც მერკის ლაბორატორიისგან ინვესტიციები მიიღო დაახლოებით ხუთი წლის წინ. და უკვე 2015 წელს ისინი კოვიდის ვაქცინას იკვლევდნენ. რატომ? ისინი რა, ნათელმხილველები არიან? ჩვენ კორონავირუსზე ახლახანს გავიგეთ, მეცნიერები კი უკვე წლებია მუშაობენ. პასტერის ინსტიტუტმა საკუთარი გამოგონება დააპატენტა კიდევაც“– ამბობს ბიბისი–სთან საუბარში ანონიმი ანტივაქსერი.

არადა ინსტიტუტი, რომელსაც დიდი ფრანგი მეცნიერის სახელი ჰქვია, აცხადებს, რომ არანაირი პატენტი კორონავირუსის ვაქცინის გამოგონებაზე წლების წინ  არ მიუღია.

ანტივაქსერების 4 არგუმენტი:

აცრის საწინააღმდეგო მოძრაობების ისტორიაზე წიგნის ავტორი, ლორან ანრი ვინიო ამბობს, რომ დღეისთვის ანტივაქსერული მოძრაობის წარმომადგენლები სულ უფრო რადიკალურები ხდებიან, და ვაქცინების მიმართ უნდობლობას მსოფლიო შეთქმულების თეორიებთან მჭიდროდ აკავშირებენ.

“ჩვენ ვნახეთ, რომ შეთქმულების თეორიების მომხრეებმა მკაფიოდ გაითავისეს რადიკალ ანტივაქსერთა იდეები. ტიპაჟები იცვლებიან…. ვაქცინის ჩვეულებრივი მოწინააღმდეგე, ეს არის ადამიანი, რომელიც საკუთარ ჯანმრთელობაზე, შვილების ჯანმრთელობაზე შფოთავს: არ უნდა, რომ მას რაიმე ქიმიური პრეპარატი შეუყვანონ ორგანიზმში. ანუ მათი მთავარი თემა ჯანმრთელობაა. როგორც წესი, ისინი არ იგონებენ ისტორიებს ვირუსებზე ან ვაქცინებზე, რომლებიც სადღაც მარსზე შეიქმნა დედამიწის მოსახლეობის გასანადგურებლად.“– ამბობს ის.

პროფესორი მკაფიოდ მიჯნავს მოყოყმანეთა ეჭვებს და ნამდვილი ანტივაქსერების პოზიციებს, რომელთა წარმოდგენებს ისტორიული ფესვები აქვს.

“ისინი აუცილებლად იშველიებენ ფატალისტურ და რელიგიურ თემებს. ისინი ამბობენ: ჩვენ არ გვინდა ვაქცინა, იმიტომ რომ ღმერთი წყვეტს, ავად გახდები თუ არა. არ შეიძლება ღვთის ნების საწინააღმდეგოდ წასვლა. შემდეგი ჯგუფი ფსევდომეცნიერული წარმოდგენების მქონე ჯგუფია, რომელიც ამტკიცებს, რომ ეს ვირუსი საერთოდ არ არის საშიში. ასევე არსებობს ნატურალისტური მიდგომა, რაც იმაში მდგომარეობს, რომ ბუნებას უნდა მივენდოთ. მეოთხე თემა კი პოლიტიკურია. მას ის ადამიანები ავითარებენ, რომლებსაც არ უნდათ სახელმწიფომ გადაწყვიტოს, რა მედიკამენტი უნდა მიიღონ მათ“ – ამბობს პროფესორი.

ერთ–ერთი ყველაზე აქტიური, ფრანგული antivax–ის ყველაზე აგრესიული ფრთა პაწაწინა სოფლიდან კოორდინირდება, სადაც 120 ადამიანი ცხოვრობს. ამ სოფლის მკვიდრი, მარი ვერბგერი დარწმუნებულია, რომ მის ქალიშვილს, ისევე როგორც ბევრ სხვა ბავშვს ადრეულ ბავშვობაში გაკეთებული აცრების გამო აუტიზმის სიმპტომები განუვითარდა.

მეცნიერებმა არაერთხელ გააბათილეს ეჭვები ვაქცინაციისა და აუტიზმის კავშირის შესახებ, თუმცა ქალს ამ არგუმენტების არ ჯერა. მისი აზრით ვაქცინები თაღლითობა და ხაფანგია. ქალი თვლის, რომ ვაქცინები უარყოფით ეფეტებს იწვევს და თანაც ბოლომდე ვერ იცავს დაავადებისგან. ისიც ამტკიცებს, რომ სოციალურ ქსელში 12 000 ხელმომწერი ყავს. ქალი ანტვაქცინური მოძრაობის პერსპექტივების მიმართ ოპტიმიზმით არის განწყობილი და თვლის, რომ მალე ვაქცინაციის მავნებლობას ყველა მიხვდება.

როცა საქმე ახალი კორონავირუსის საწინააღმდეგო ვაქცინას ეხება, აქ უკვე რადიკალი ანტივაქსერებისა და მოყოყმანეთა პოზიციებს შორის ზღვარი თითქოს იშლება. სოციოლოგი ჯერემი უორდი იმ ადამიანებს სწავლობს, ვისაც გადაწყვეტილების მიღება უჭირთ.

მისი თქმით, ადამიანების ასეთ განწყობებს დიდი ხნის წინ დამკვიდრებული სკეპტიციზმი და საფრანგეთის ჯანდაცვის ორგანოების მიმართ უნდობლობა აღვივებს. გარდა ამისა, საფრანგეთში მისი თქმით ბოლო ათწლეულების მანძილზე ყველაზე მეტი დებატები იმართებოდა სხვადასხვა ვაქცინების უსაფრთხოების შესახებ.  მისი აზრით, სწორედ ეს განაპირობებს საფრანგეთში ვაქცინის საწინააღმდეგო განწყობებს.

სპეციალისტების აზრით ამ რთული ვითარებიდან გამოსვლა მეტი გამჭვირვალობით და არგუმენტების ფაქტებით გამყარებით არის შესაძლებელი. ისინი დაუშვებლად თვლიან ვაქცინის მოწინააღმდეგეთათვის იარლიყების მიკერებას და მათ სტიგმატიზაციას. საფრანგეთში სწორედ ამ გზით აპირებენ კორონავირუსის საწინააღმდეგო ვაქცინის მიმართ უნდობლობიბს შემცირებას.

ჯანდაცვის მსოფლიო ორგანიზაცია აცხადებს, რომ არ აპირებს შეცვალოს ნიღბების ტარების წესი, ანუ ჩვეულებრივი ნაჭრისგან შეკერილი ნიღბები დაუშვებლად გამოაცხადოს კორონავირუსის ახალი შტამის გამო. ჯანმოს განცხადებით ახალი შტამი იგივე გზით გადადის, როგორც თავდაპირველი ვარიანტი. ჩვეულებრივი ნაჭრისგან შეკერილი ნიღბები კი ისევე იცავს ადამიანებს, როგორც სამედიცინო.

ჯანმოს იძულებული გახდა ეს განცხადება გაეკეთბინა მას შემდეგ, რაც ავსტრიის და გერმანიის ხელისუფლებებმა მოქალაქეები დაავალდებულეს ტრანსპორტში და მაღაზიებში მხოლოდ ქირურგიული ნიღბები ან რესპირატორები  (FFP2 ტიპის) ატარონ.

ამასთან, ერთ–ერთმა წამყვანმა გერმანელმა ვირუსოლოგმა, კრისტიან დროსტენმა ჟურნალ შპიგელთა ინტერვიუში გააქარწყლა იმედები იმის შესახებ, რომ გაზაფხულის დადგომასთან და თბილ ამინდთან ერთად ვირუსი უკან დაიხევს.

მისი თქმით,არასწორია თბილი სეზონი შარშანდელ წელს შევადაროთ, რადგან 2020 წლის გაზაფხულზე დაავადებულთა რაოდენობა გავრცელების კრიტიკულ ზღვარს დაბლა იყო.

“თუმცა ახლა სიტუაცია განსხვავებულია. ვშიშობ, რომ შეიძლება ესპანეთის სიტუაცია განვითარდეს, როცა როგოროც კი კარანტნი შესუსტდა, ციფრები მკვეთრად ზევით წავიდა, მიუხედავად ცხელი ამინდისა. სამხრეთ აფრიკაში ახლა ზაფხულია, თუმცა ამის მიუხედავად დაავადება მაღალ ნიშნულზეა“– ამბობს დროსტენი.

“როგორც კი მოხუცები და ისინი, ვინც რისკის ჯგუფში არიან ვაქცინას მიიღებენ, გაჩნდება კოლოსალური ეკონომიკური, სოციალური, პოლიტიკური და შესაძლოა სამართლებრივი ზეწოლაც კი ანტიკორონავირუსული ზომების წინააღმდეგ. ამის შემდეგ ძალიან ბევრი ადამიანი დაინფიცირდება ძალიან მოკლედ როში. იმაზე ბევრად მეტი, ვიდრე ახლა წარმოგვიდგენია. ჩვენ გეყოლება არა 20–30 ათასი , არამედ 100 0000 ახალი დაინფიცირებული დღეში მოვლენების ცუდი სცენარით განვითარების შემთხვევაში“– ამბობს პროფესორი დროსტენი და ხაზს უსვამს, რომ ეს დიდწილად არა მოხუცები, არამედ ახალგაზრდები და საშუალო ასაკის ადამიანები იქნებიან, თუმცა ისინიც ისევე მოხვდებიან საავადმყოფოებში და გადაავსებენ რეანიმაციულ განყოფილებებს.

პანდემიის პირველი ტალღისას კორონავირუსით დაინფიცირებულ  და გამოჯანმრთელებულ ბრიტანელ პაციენტთა  30% შემდგომი 5 თვის განმავლობაში კვლავ საავადმყოფოში მოხვდა. ამის შესახებ ლესტერის უნივერსიტეტის და სტატისტიკის ეროვნული ბიუროს ერთობლივ კვლევაშია ნათქვამი.

მკვლევარებმა შეისწავლეს 47 480 ყოფილი პაციენტისგან შემდგარი ჯგუფი. 140 დღის განმავლობაში საავადმყოფოებში დაბრუნებულთა ზუსტი წილი 29.4% აღმოჩნდა. გარდაიცვალა 12.3%. ბევრ პაციენტს განუვითარდა ან გაუმწვავდა გულის დაავადებები, დიაბეტი, თირკმელების და ღვიძლის ქრონიკული დაავადებები.

პოტენციურად ეს შეიძლება იმას ნიშნავდეს, რომ კორონავირუსით სიკვდილიანობის სტატისტიკაში ბევრად მეტი შემთხვევა უნდა შევიდეს. დღეისათვის ბრიტანეთში კორონავირუსით გარდაცვალებად ითვლება სიკვდილი, რომელიც დიაგნოზის დასმიდან 28 დღის განმავლობაში დადგა. მკვლევარები ადამიანებს, ვინც კორონავირუსი გადაიტანეს მოუწოდებენ ყურადღებით მოეკიდონ საკუთარ ჯანმრთელობის მდგომარეობას.

ეს კვლევა ბრიტანეთში ყველაზე მაშტაბური მსგავსი კვლევაა. ლესტერის უნივერსიტეტის პროფეორი, კამლეშ კუმლი ამბობს:

“როგორც ჩანს, ადამიანებს საავადმყოფოებიდან გაწერის შემდეგ გრძელვადიანი სიმპტომები უვითარდებათ, რის შემდეგაც ისინი კვლავ ხვდებიან საავადმყოფოებში და კვდებიან. მთავარი დასკვნა ის არის, რომ უნდა მოვემზადოთ “ხანგრძლივი კოვიდისთვის.“ ეს რთული ამოცანაა. ძნელია ყველა გაწერილი პაციენტის მეთვალყურეობა. ჯანდაცვის სამსახურები ზღვარზე არიან. თუმცა, რაღაც ტიპის მონიტორინგის ორგანიზება აუცილებელია“– ამბობს მეცნიერი.

შეერთებული შტატების დაავადებათა კონტროლის და პრევენციის ცენტრის მეცნიერთა ახალი კვლევის მიხედვით, კოვიდ-19-ს ძირითადად უსიმპტომო ადამიანები ავრცელებენ. სხვადასხვა სცენარით ანალიტიკური მოდელების შეფასებამ აჩვენა, რომ იმ ინდივიდებზე, ვისაც დაავადების სიმპტომები არ ჰქონიათ, ინფექციის გავრცელების ნახევარზე მეტი შემთხვევა მოდის. მეცნიერებმა შეისწავლეს პრესიმპტომატური პაციენტები, სიმპტომატური და ისეთები, ვისაც სიმპტომები არასდროს გამოვლენიათ.

ნაშრომის მიხედვით, ასიმპტომატურ ადამიანებზე მოდის აღრიცხული გავრცელების 59%. აქედან 35 პროცენტს გავრცელებისას სიმპტომები ჯერ არ ჰქონდა, 24 პროცენტს კი კოვიდ-19-ის სიმპტომები საერთოდ არ ჰქონია. დაავადებათა კონტროლის და პრევენციის ცენტრის მეცნიერები ამბობენ, რომ მათ მოდელს ზუსტი ანგარიშის მომზადების პრეტენზია არ აქვს და ეს უმეტესად ახალი კორონავირუსის გავრცელების სავარაუდო შეფასებებია.

შესაბამისად, მხოლოდ იმ ადამიანების ამოცნობა და იზოლირება, ვინც ინფექციის მატარებელია, ახალი კორონავირუსის გავრცელებას ვერ შეაჩერებს. „გავრცელების ეფექტური კონტროლი მოითხოვს ისეთი ადამიანებისგან გადაცემის რისკის შემცირებას, რომელთაც სიმპტომები არ აქვთ“ – აღნიშნავენ ამერიკელი მეცნიერები. მათი აზრით, „სტრატეგიული ტესტირება იმ ადამიანების, ვინც ავად არ არის, იქნება გადამწყვეტი კოვიდ-19-ის გავრცელების შენელების საქმეში, სანამ უსაფრთხო და ეფექტური ვაქცინები გახდება ფართოდ ხელმისაწვდომი“.

კვლევის ავტორები კიდევ ერთხელ უსვამენ ხაზს იმ გარემოებას, რომ ჯანმრთელად ყოფნა არ გვაძლევს იმის უფლებას, რომ ჯანდაცვის რეკომენდაციები არ დავიცვათ. ნიღბების ტარება, ფიზიკური დისტანციის დაცვა, ხელების ხშირად დაბანა და ჯგუფური თავშეყრებისთვის თავის არიდება, კვლავ კრიტიკულად მნიშვნელოვანი რჩება.

„ისეთი ზომები, როგორიცაა ნიღბის ტარება და სოციალური დისტანციის დაცვა, ინდივიდებს თავდაცვის და სხვების დაცვის საშუალებას აძლევს, და ინფიცირების შემთხვევაში კი, გარშემომყოფებში რისკებს ამცირებს“ – ნათქვამია კვლევაში.

მოდელში საინკუბაციო პერიოდი საშუალოდ 5 დღით განისაზღვრა. ინფექციის გადაცემის პერიოდი კი 10 დღეზე შენარჩუნდა. ინფექციის გადაცემის პიკი დაახლოებით მესამედან მეშვიდე დღემდე მერყეობდა (საინკუბაციო პერიოდთან მიმართებაში, პლუს-მინუს 2 დღე).

თავიდან, ასიმპტომატური გადაცემა კორონავირუსისთვის უჩვეულო რამ იყო, რადგან 2003 წელს, როცა ვირუსი სახელად სარს-კოვ პირველად გავრცელდა, უსიმპტომო ადამიანებისგან ინფექციის გავრცელება საერთოდ არ დაფიქსირებულა. 2020 წელს კი, სარს-კოვ-2 გაცილებით უფრო სწრაფად ვრცელდებოდა, ვიდრე მისი პირველი ვერსია და დღეისთვის უკვე საკმარისადაა აკუმულირებული მტკიცებულებები, რომელიც უსიმპტომო გავრცელებას ადასტურებს.

თუმცა, პანდემიის დასაწყისში, ამ საკითხის წინააღმდეგობრივი ხასიათის, ეკონომიკაზე, თუ სხვა სოციალურ აქტივობებზე უარყოფითი გავლენის და ამ ყველაფრის პოლიტიზების გამო, შედეგად მივიღეთ ის, რომ ვირუსის გავრცელების ამ მხარეზე, ყურადღება ნაკლებად მახვილდებოდა – წერენ შეერთებული შტატების დაავადებათა კონტროლის და პრევენციის ცენტრის მეცნიერები.

ეს პანდემიის არასწორი მართვის ერთ-ერთი მიზეზიც გახდა, რადგან ადამიანიდან ადამიანზე ვირუსის გადაცემის შესწავლას და მის პრევენციას, პანდემიის კონტროლის საქმეში დიდი მნიშვნელობა ენიჭება. „უსიმპტომო ადამიანებში სარს-კოვ-2-ის გადაცემის პროპორციის განსაზღვრა ფუნდამენტურია კონტროლის პრაქტიკის პრიორიტეტების და პოლიტიკის განსაზღვრაში“ – წერენ ამერიკელი მეცნიერები.

ნაშრომის სახელწოდებაა „სარს-კოვ-2-ის გადაცემა კოვიდ-19-ის სიმპტომების გარეშე“. ის ხუთშაბათს, 7 იანვარს გამოქვეყნდა სამეცნიერო ჟურნალში „ჯამა“ (JAMA). თითქმის 140 წლის ისტორიის მქონე პროფესიულ ჟურნალს, ამერიკის სამედიცინო ასოციაცია გამოსცემს.

წყარო: ამერიკის ხმა