Category: სლაიდერი

შინაგან საქმეთა სამინისტროს ინფორმაციით, მარნეულში, სოფელ სადახლოს №69-ე საარჩევნო უბანზე, კანონმდებლობის დარღვევით ყუთში საარჩევნო ბიულეტენების ჩაყრის ფაქტზე 2 ადამიანი დააკავა – 1984 წელს დაბადებული რ.ი. და 1990 წელს დაბადებული ე.ი. ერთ-ერთი მარნეულის საკრებულოს თავმჯდომარის მოადგილე როვშან ისკანდაროვია.

“გამოძიებით დადგინდა რომ ბრალდებულებმა, საქართველოს პარლამენტის 2024 წლის 26 ოქტომბრის არჩევნების მიმდინარეობისას, მარნეულის მუნიციპალიტეტის სოფელ სადახლოს №69-ე საარჩევნო უბანზე, კანონმდებლობის დარღვევით ყუთში საარჩევნო ბიულეტენები მოათავსეს.

აღნიშნული ფაქტის გამო, მარნეულის საოლქო საარჩევნო კომისიის განკარგულებით №69-ე საარჩევნო უბანზე შეწყდა კენჭისყრა და კენჭისყრის შედეგები ბათილად იქნა ცნობილი.

ჩატარებული საგამოძიებო მოქმედებების შედეგად,სამართალდამცველებმა რ.ი. და ე.ი. ბრალდებულის სახით დააკავეს” – აცხადებს შსს.

“ევროკავშირში გაწევრიანება თითოეული ქვეყნის სტრატეგიული და სუვერენული არჩევანია. განაცხადის შეტანის შემდეგ ქვეყანა თანხმდება, რომ ევროკომისია ევროკავშირში წევრობისთვის მის მზადყოფნას შეამოწმებს. შარშან ანგარიშის გამოქვეყნებამ საზეიმო აღნიშვნის შესაძლებლობა მოგვცა, ევროკომისიამ რეკომენდაცია გაუწია საქართველოსთვის ევროკავშირის კანდიდატის სტატუსის მინიჭებას, დეკემბერში ეს რეკომენდაცია ევროკავშირის წევრმა ქვეყნებმა ერთხმად დაადასტურეს. როგორც ევროკავშირისთვის, ასევე საქართველოს მოსახლეობისთვის ეს იმედით აღსავსე და დაუვიწყარი დღე იყო, ჩემთვის ეს პროფესიული კარიერის მწვერვალს წარმოადგენდა.

დღეს, 1 წლის შემდეგ, სამწუხაროდ, ბევრი არაფერი გვაქვს საზეიმო. საქართველოს მთავრობის მოქმედების კურსის გამო, ევროკავშირის ლიდერებმა საქართველოს გაწევრიანების პროცესი შეაჩერეს. ის შეჩერებული იქნება იქამდე, სანამ საქართველო ევროკავშირისგან, ჩვენი ღირებულებებისა და ჩვენი პრინციპებისგან დაშორებას გააგრძელებს”,

ამის შესახებ ევროკავშირის ელჩი საქართველოში, პაველ ჰერჩინსკი საუბრობს.

“პროკურატურას მე ვურჩევდი, რომ სჯობს, შეუდგეს თავის საქმეს და პრეზიდენტთან პოლიტიკურ ანგარიშსწორებას მოეშვას, რაც კიდევ უფრო ამ მომენტში, როცა საჭიროა და ჩვენი პარტნიორებიც ამას უყურებენ, რომ ბოლოს და ბოლოს გამოჩნდეს, თუ შეუძლია, რომ იყოს პროკურატურას, იყოს დამოუკიდებელი, მიუკერძოებელი. ეს აჩენს კიდევ უფრო მეტ კითხვის ნიშნებს. ასე, რომ შეუდგეს პროკურატურა თავის საქმე, პრეზიდენტი კი თავის საქმეს მიხედავს.[…]

როგორც პრეზიდენტი, გავაგრძელებ ჩემს სამუშაოს და არ ვაპირებ პროკურატურაში გამოცხადებას”

განაცხადა ამის შესახებ, პრეზიდენტმა სალომე ზურაბიშვილმა.

“არ შეიძლება ახლო ურთიერთობები გქონდეს რუსეთთან და ამავე დროს გაწევრიანდე ევროკავშირში. ერთი მეორესთან შეუთავსებელია. საქართველომ გამართა საპარლამენტო არ\ჩევნები, რომლებიც აღინიშნა სერიოზული დარღვევებით, ეს უნდა იქნას გამოძიებული გამჭვირვალედ და სამართლიანად. აღსანიშნავია, რომ დამოუკიდებელმა დამკვირვებლებმა არ განაცხადეს, რომ ეს არჩევნები იყო თავისუფალი და სამართლიანი. ამით გრძელდება ტენდენცია, რომელიც ვნახეთ ბოლო თვეებში, როდესაც საქართველოს მთავრობა შორდება ევროკავშირს, მის ღირებულებებსა და პრინციპებს.

თუ საქართველოს ხელისუფლებისგან იქნება მზადყოფნა, რომ დაუბრუნდეს ევროინტეგრაციის გზას, ჩვენ ვთავაზობთ მას კონკრეტულ საგზაო რუკას: გაუქმებულ იქნას კანონი უცხოელი აგენტების შესახებ, რომელიც ზიანს აყენებს სამოქალაქო საზოგადოებასა და მედიას. ასევე გაუქმდეს ე.წ. კანონი ოჯახური ფასეულობების შესახებ, რადგან დისკრიმინაცია არ არის ჩვენი ფასეულობა. ეს არის პირველი ნაბიჯები, რომლებიც უნდა გადაიდგას და მნიშვნელოვანია, ყურადღებით დავაკვირდეთ მოვლენებს, რომლებიც მომდევნო დღეებში განვითარდება არჩევნებზე დაფიქსირებული დარღვევების გამოძიებასთან დაკავშირებით”,

ამის შესახებ ბრიუსელში განცხადებას ევროკავშირის უმაღლესი წარმომადგენელი / ევროკომისიის ვიცე-პრეზიდენტი, ჯოზეფ ბორელი აკეთებს.

დღეს, 19:00 საათზე ორბელიანების სასახლეში პრეზიდენტ სალომე ზურაბიშვილის ბრიფინგი ჩაინიშნა.

ზურაბიშვილი სავარაუდოდ პროკურატურას უპასუხებს, რომელმაც ის ხვალ გამოკითხვაზე დაიბარა.

არავის გამოუცხადებია საქართველოს საგამოძიებო სისტემისთვის ნდობა და ადგილობრივი გამოძიება არ მოუთხოვია! – ამის შესახებ კოალიცია „ძლიერი საქართველოს“ ერთ – ერთი ლიდერი ანა ნაცვლიშვილი სოციალურ ქსელში წერს, რომელშიც საქართველოს პროკურატურის მიერ საპარლამენტო არჩევნების შესაძლო გაყალბებასთან დაკავშირებით დაწყებულ გამოძიების ეხმაურება.

„იცოდით, რას ნიშნავს გამოთქმა – მელამ თავისი კუდი მოწმედ მოიყვანაო? აი, ზუსტად ამას ნიშნავს.მელა რომ იპარავს და გარბის ნაქურდალით, მისი ფუმფულა კუდი ნაკვალევს შლის, რომ მდევარმა ვერ იპოვოს ნაქურდალის კვალი.აი, ეს ფუნქცია აქვს ახლა საქართველოს პროკურატურას – არამხოლოდ არგამოძიების, არამედ დანაშაულის კვალის წაშლის!

მინდა ცესკოსაც და პროკურატურასაც შევახსენო, რომ არავის არ გამოუცხადებია საქართველოს საგამოძიებო სისტემისთვის ნდობა და ადგილობრივი გამოძიება არ მოუთხოვია. ან რა სანდონი არიან?! დაასახელონ, ბოლო 20 წლის განმავლობაში, რომელი საზოგადოებრივად მნიშვნელოვანი საქმე გამოიძიეს და დაადგინეს სიმართლე?! ერთი მაინც დაასახელონ! არც ერთი! საერთაშორისო, მიუკერძოებელი გამოძიების დაშვება გაბედეთ, თუ მართლები ხართ!“,- წერს ანა ნაცვლიშვილი.