“უახლოეს მომავალში ცესკოს მხრიდან შეჯამდება არჩევნების შედეგები, პარლამენტის პირველი შეკრება გაიმართება თვის ბოლომდე და ამის შემდეგ, რამდენიმე დღეში დამტკიცდება მთავრობის ახალი შემადგენლობა. დიდი ალბათობით, შეიძლება თვის ბოლომდეც კი მოესწროს ეს ყველაფერი. ძალიან მშვიდად წარიმართება პროცესები”
ამის შესახებ პრემიერმინისტრმა ირაკლი კობახიძემ ბაქოში, გაეროს კლიმატის ცვლილების 29-ე კონფერენციაზე ვიზიტისას ქართველ ჟურნალისტებთან ისაუბრა.
ჩვენს საერთაშორისო პარტნიორებს ძალიან კარგად ესმით, რომ გაყალბების მასშტაბი იყო ძალიან დიდი, ამიტომ არ არის საერთაშორისო აღიარება არჩევნების. ლეგიტიმაცია არ აქვს და ვერ ექნება არჩევნებს, სადაც მოხდა ქართველი ხალხის თავისუფალი ნების უგულებელყოფა. შესაბამისად, რა თქმა უნდა, ისინიც თვლიან, რომ მნიშვნელოვანია მოხდეს სრულფასოვანი და დამოუკიდებელი გამოძიება, რაც შეუძლებელია ქართული პროკურატურის და საგამოძიებო უწყებების პირობებში.
განვიხილეთ სხვადასხვა ტიპის მექანიზმები, რომლებიც შესაძლებელია ამოქმედდეს და სხვადასხვა საფუძვლები ამ მექანიზმების შექმნისთვის, იქნება ეს ევროპარლამენტი თუ ევროკომისია, ბუნებრივია, ეს არის განხილვის საგანი, თუმცა, ვთანხმდებით, რომ ძალიან მნიშვნელოვანია დამოუკიდებელი გამოძიება, რომელსაც მხოლოდ და მხოლოდ საერთაშორისო კომპონენტი შეიძლება ჰქონდეს.
ვისაუბრეთ ასევე იმაზე, რომ ევროკავშირში აქტიურად განიხილება სხვა მექანიზმების ამოქმედებაც, როგორიც არის ინდივიდუალური სანქციები ივანიშვილისა და მისი გარემოცვის წინააღმდეგ. სამწუხაროდ, იცით, რომ ასევე განხილვის საგანია უვიზო მიმოსვლის დროებითი შეჩერება. ეს ბუნებრივია, არ არის უვიზო მიმოსვლის გაუქმება, არამედ, უვიზო მიმოსვლის დროებით შეჩერების გადაწყვეტილება შეიძლება მიიღონ ევროკავშირის წევრმა ქვეყნებმა იმიტომ, რომ ისინი ხედავენ, რომ ივანიშვილის ხელისუფლებამ ბოლომდე გადაუხვია ევროკავშირის გზას. იცით, რომ მოთხოვნებში ევროკავშირისგან ერთ-ერთი მოთხოვნა იყო სწორედ თავისუფალი და სამართლიანი არჩევნები და ჩვენ ვნახეთ, რომ 26 ოქტომბრის არჩევნებზე ტოტალურად იყო დარღვეული თავისუფალი და სამართლიანი არჩევნების პრინციპი.
ასევე მნიშვნელოვანია ის, რომ ჩვენი ევროპელი მეგობრები დღეს იქნებიან აქციაზე, რომელიც გაიმართება 19:00 საათზე იმისთვის, რომ მიმართონ ევროპელ ქართველ ხალხს და კიდევ ერთხელ ვაჩვენოთ ჩვენს ევროპელ მეგობრებს, რომ ჩვენი ადგილი ნამდვილად ევროპაშია, ამიტომ, მნიშვნელოვანია, რომ დღეს რუსთაველზე, 19:00 საათზე ვიყოთ ძალიან ბევრნი.
“ესენი არიან უსაქმური ადამიანები, რომლებიც ხან ერთ, ხან სხვა ქვეყანაში ჩადიან. ჩვენ გვახსოვს მათი ჩამოსვლა, როდესაც ოპოზიციის აქციები იყო, სიტყვით გამოსვლებიც ჰქონდათ. ამ ადამიანებმა რით დაამახსოვრეს თავი ჩვენი ქვეყნის მოსახლეობას – სიცრუით. იმ სიცრუის პროპაგანდას, რასაც ვისმენდით მთელი ამ ხნის განმავლობაში, დღესაც აგრძელებენ. ყველამ კარგად ვიცით, რას წარმოადგენენ ისინი და როგორც ვთქვი, არანაირი ფასი არ აქვს მათ განცხადებებს… ჩვეულებრივი მავნებლები არიან, ყველაფერს უნდა დავარქვათ თავისი სახელი. ეს ადამიანები პატივს არ სცემენ ჩვენს ქვეყანას, სახელმწიფოებრიობას და ქართველ ხალხს. მათ განცხადებებს, ქმედებებს, ყველაფერს აქვს ჩალის ფასი”
აცხადებს თბილისის მერი კახა კალაძე საქართველოში ვიზიტით მყოფ 8 ევროპული ქვეყნის პარლამენტების წარმომადგენლებზე.
საქართველოს პრეზიდენტმა დღეს 11 მსჯავრდებული პირი შეიწყალა, საიდანაც 3 მსჯავრდებულ პირს პენიტენციურ დაწესებულებაში მოსახდელად დარჩენილი თავისუფლების აღკვეთის სახით შეფარდებული სასჯელის ვადა შეუმცირდა. შეწყალების აქტი ასევე შეეხო 8 პირობით მსჯავრდებულ პირს, რომლებიც სრულად გათავისუფლდნენ პირობითად ჩათვლილი თავისუფლების აღკვეთის შემდგომი მოხდისაგან.
“როდესაც მმართველი პარტია გვისვამს კითხვას, თუ რა გვაძლევს უფლებას, რომ აქ ვიმყოფებოდეთ, გიპასუხებთ: მე აქ ვიყავი პრეზიდენტ კაჩინსკისთან ერთად, როდესაც თბილისი იყო საფრთხეში, მე გავაკეთე ორგანიზება ამ ვიზიტისა, როგორც სახელმწიფო მდივანმა. ამ ქალაქში ვიყავი, როცა იყო რუსული საფრთხის ქვეშ. ვიმყოფები ისევ ამ ქალაქში, იმიტომ რომ თბილისი ისევ რუსული საფრთხის ქვეშ იმყოფება. ეს საფრთხე შეიძლება ტანკებით არ არის გამოხატული, თუმცა რამდენიმე კილომეტრის დაშორებით დგანან. ეს ქალაქი საფრთხის ქვეშ არის რუსული დეზინფორმაციის გამო და რუსული სტილის პოლიტიკის გამო. ქართველი ხალხის წინაშე, ისევე როგორც პოლონელი, უკრაინელი, ლიეტუველი თუ ესტონელი ხალხის წინაშე ორი გზაა, ან ევროპისკენ ან რუსულ ხელში ჩავარდნა. აი, ამიტომაც ვიმყოფებით აქ. ჩვენ ვიმყოფებით ჩვენი სიმპათიების გამო, თუ სიყვარულს არ დავარქმევთ ამას, ჩვენი ვალდებულების თვალსაზრისით, ევროპული ღირებულებებისადმი სიყვარულიც გამოც.”
თქვა პოლონეთის პარლამენტის საგარეო ურთიერთობათა და ევროკავშირის საქმეთა კომიტეტის წევრმა მიჰაილ კამინსკიმ საქართველოს პრეზიდენტთან სალომე ზურაბიშვილთან შეხვედრის შემდეგ.
3 ოპოზიციური კოალიციის გაერთიანება დღეს, 19:00 საათზე პარლამენტთან აქციას გამართავს. აქციაზე მივა საქართველოში ვიზიტით მყოფი ევროკავშირის 8 ქვეყნის საგარეო ურთიერთობათა კომიტეტის თავმჯდომარეების დელეგაციაც.
“დღეს, 11 ნოემბერს, 19:00 საათზე, ვიკრიბებით პარლამენტთან, რომ მთელ მსოფლიოს კიდევ ერთხელ ხმამაღლა ვუთხრათ – საქართველო ევროპაა!
აქციის მონაწილეებს სიტყვით მიმართავენ 8 ქვეყნის პარლამენტის საგარეო კომიტეტების თავმჯდომარეები, რომლებიც საქართველოში დღეს ჩამოვიდნენ” ნათქვამია ინფორმაციაში.
“[შალვა პაპუაშვილის განცხადება] ძალიან საბჭოურია. ეს ტენდენცია 3-4 წლის წინ შევამჩნიე. ვინც საქართველოს მთავრობას აკრიტიკებდა, მათ აღარ ხვდებოდნენ. ბოლო 3 წლის განმავლობაში მე საქართველოში ბევრჯერ ჩამოვედი, მაგრამ მათთან შეხვედრას ვერ ვახერხებდი – ერთი მცირე გამონაკლისი იყო, საქართველოს საგარეო საქმეთა მინისტრის მოადგილე. მაგრამ, თუ გაკრიტიკებენ, როგორც წესი, აღარ გხვდებიან – ეს არის საბჭოთა მიდგომა”.
ლიტვის პარლამენტის ვიცესპიკერი და საგარეო ურთიერთობათა კომიტეტის თავმჯდომარე, ჟიგიმანტას პავილიონისი საქართველოს პარლამენტის თავმჯდომარის, შალვა პაპუაშვილის განცხადებას გამოეხმაურა.
“არჩევნები უნდა ჩატარდეს ევროპის საბჭოს, ეუთოს ან სხვა ორგანიზაციების ჩართულობით ” – თქვა ესტონეთის პარლამენტის საგარეო ურთიერთობათა კომიტეტის თავმჯდომარემ, მარკო მიჰკელსონმა
”სამართლიანი და თავისუფალი არჩევნები იმ თვალსაზრისით, როგორც გვესმის დემოკრატია, ეს არის წმინდათა წმინდა რამ. არარსებობს შესაბამისი მთავრობა, ადმინისტრაცია თუ არ გაიარეს თავისუფალი და სამართლიანი არჩევნების გზა. […]
ვაკვირდებით რა პროცესებს, მინდა აღვნიშნო, რომ ყველაზე ეფექტური და ყველაზე ნეიტრალური გზა, იმისთვის, რომ შემოწმდეს, თუ რა მოხდა საქართველოს არჩევნებში ოქტომბერში – უნდა ჩატარდეს [არჩევნები] იმ ორგანიზაციის მიერ, რომელიც საქართველოს ფარგლებს გარეთ მდებარეობს იმიტომ, რომ ვხედავთ, რომ მმართველ პარტიას ძალიან ძლიერი პოზიციები გააჩნია სხვადასხვა ორგანიზაციებში. რომ დავარწმუნოთ არამხოლოდ საქართველოს მოსახლეობა, არამედ მსოფლიოს დანარჩენი ნაწილი, რომ არჩევნები იყო სამართლიანი და თავისუფალი ძალიან კარგი და საუკეთესო გამოსავალი იქნება, თუ საერთაშორისო თანამშრომლობის დონეზე ჩატარდება. მაგალითად, ევროპის საბჭოს, ეუთოს ან სხვა ორგანიზაციების ნეიტრალური ჩართულობით, ნეიტრალური ნდობის ფონზე”- განაცხადა მან.
მათი აქ ჩამოსვლა დღეს, როცა საქართველო შედის ღრმა პოლიტიკურ კრიზისიში, არის კიდევ ერთი ნიშანი ევროპული მხარდაჭერის, ის რომ ევროპა ჩვენ ხელიდან არ გვიშვებს და ჯერ კიდევ სჯერა საქართველოსი, საქართველოს ევროპულობის, საქართველოს ხალხის ევროპულობის, რომელიც გამოიხატა არაერთხელ ამ 33 წლის მანძილზე.
არაერთხელ კი არა, ყოველჯერ, როცა ევროპული პრინციპები, ევროპული მომავალის იმედი იყო ეჭვქვეშ, ყოველჯერ საქართველოს მოსახლეობა, საზოგადოება გამოდიოდა და ვიცით ბევრი ადამიანი, რომელიც იძახის, რომ “მე პრაქტიკულად ეს 30 წელი ქუჩაში გავატარე”, იმიტომ, რომ დემოკრატიული პრინციპის მიმართ გადახვევა ხელისუფლების მიერ, ყოველთვის იყო გაპროტესტებული ამ ქვეყანაში.
ეს არის ქვეყანა, სადაც მართლაც საზოგადოება არის ევროპული, არის დემოკრატიული და რომელსაც, სამწუხაროდ, არ ჰყავს დემოკრატიული ხელისუფლეა, რომელსაც ჰყავს ერთპარტიული ხელისუფლება, რომელიც დაეუფლა პრაქტიკულად ყველა ამ ქვეყნის ინსტიტუტს და შედეგი მივიღეთ ამ არჩევნებში, ეს არის ერთპარტიულად მართული არჩევნები.
“რამდენიმე ქვეყნის პარლამენტის წევრისგან შემდგარ ჯგუფს შეხვედრაზე უარი ვუთხარი” – წერს ამის შესახებ, პარლამენტის თავმჯდომარე შალვა პაპუაშვილი.
როგორც პაპუაშვილი წერს, მან დელეგაციას შემდეგი წერილი გაუგზავნა:
“არ გამკვირვებია ევროკავშირის რამდენიმე ქვეყნის პარლამენტის წევრისგან შემდგარი დელეგაციის საქართველოში ჩამოსვლა. თუმცა, ნამდვილად გამაკვირვა დელეგაციის ზოგიერთი წევრის განზრახვამ, შეხვდნენ საქართველოს პოლიტიკურ და საპარლამენტო ხელმძღვანელობას, მიუხედავად მათ მიერ საქართველოს ხელისუფლების და ქართული საზოგადოების მიმართ მრავალჯერ გამოვლენილი პირადი არამეგობრული დამოკიდებულებისა.
მიუხედავად იმისა, რომ საქართველოს ხელისუფლება რჩება ევროკავშირის ყველა რელევანტურ და დაინტერესებულ მხარესთან დიალოგის ხელშეწყობის ერთგული, შეხვედრების გამართვის ამ განზრახვას დადებითად ვერ ვუპასუხებ.
საქართველოსადმი მრავალჯერ გამოვლენილი არამეგობრული დამოკიდებულებიდან გამომდინარე, დელეგაციის ზოგიერთ წევრს სხვა მოლოდინი არც უნდა ჰქონოდა. აშკარაა, რომ ვიზიტის მთავარი საფუძველი პოლიტიკური მიკერძოებულობაა და ამას ყველა ხედავს.
წინასაარჩევნო კამპანიის დროს, დელეგაციის ზოგიერთი წევრი და სხვა უცხოელი პოლიტიკოსები მუდმივად და მიზანმიმართულად არღვევდნენ საქართველოს კანონმდებლობას საქართველოს მმართველი პარტიის წინააღმდეგ მიმართული საჯარო კამპანიის წარმართვისა და ოპოზიციის მხარდაჭერის გზით, რითიც მოქალაქეების ნებაზე უკანონო ზემოქმედებას ცდილობდნენ.
საქართველოს კონსტიტუცია და საარჩევნო კანონმდებლობა კრძალავს არჩევნებში უცხოურ ჩარევას, რაც უხეშად იყო უგულებელყოფილი. არჩევნებთან დაკავშირებულ პროცესებში, განსაკუთრებით კი ხელისუფლების საწინააღმდეგო აქციებში უშუალო მონაწილეობით, ამ პოლიტიკოსებმა უხეშად დაარღვიეს ჩაურევლობის პრინციპი, რაც გაეროს წესდებით განმტკიცებული საერთაშორისო სამართლის ფუნდამენტური ნორმაა, და ეჭვქვეშ დააყენეს წესებზე დაფუძნებული საერთაშორისო წესრიგის არსი, რომლისადმი პატივისცემას, როგორც სჩანს, მხოლოდ სიტყვიერად გამოხატავენ.
აღნიშნულმა ხელი შეუწყო ოპოზიციის რადიკალურ ნაწილს პოლიტიკური პოლარიზაციის გაღრმავებაში, რამაც გააუარესა წინასაარჩევნო გარემო და არჩევნების გარშემო დაძაბულობის აღქმა შექმნა.
თუმცა, ეს არ არის პირველი შემთხვევა, როდესაც ამ დელეგაციის ზოგიერთი წევრი ქართველი ხალხის წინააღმდეგ მიმართული დეზინფორმაციის გავრცელებით არის დაკავებული. ასეთი იყო, მაგალითად, მიხეილ სააკაშვილის პატიმრობის პირობების შესახებ წარმოებული კამპანიაც, რომლის სიცრუეც ადამიანის უფლებათა ევროპულმა სასამართლომ დაადასტურა.
რადიკალური პოლიტიკური პარტიების მიერ გავრცელებული ასეთი ცრუ ნარატივებისა და დეზინფორმაციის მხარდაჭერამ, საზღვარგარეთ საქართველოს იმიჯი შელახა, და ამასთან შეარყია ჩვენი მოსახლეობის ნდობა ჩვენი დასავლელი პარტნიორების კეთილმოსურნეობის მიმართ.
ეს ქმედებები და არამეგობრული რიტორიკა ხელს უწყობს ევროკავშირის გაფართოების პროცესის იარაღად გამოყენების მცდელობას, რათა კიდევ უფრო წაახალისოს ოპოზიცია, შეარყიოს არჩევნების შედეგების მიმართ ნდობა და არჩევნების ლეგიტიმურობას ძირი გამოუთხაროს.
საქართველოსა და მისი ხელისუფლების მიმართ დელეგაციის ზოგიერთი წევრის არამეგობრული რიტორიკა და ქმედებები, რომელთა მომსწრენი ვართ უკანასკნელი ორწელიწად-ნახევრის განმავლობაში, აგრეთვე, ხელს უშლის საქართველოში მშვიდობისა და დემოკრატიული სტაბილურობის შენარჩუნებაზე მიმართულ ჩვენს ძალისხმევას.
შეუძლებელია, ევროპას მშვიდობის პროექტად წარმოაჩენდე და ამავდროულად, ევროპის სახელით, ქვეყანაში არეულობას თესდე.
26 ოქტომბრის არჩევნებში უცხოურ ჩარევას ქართულმა საზოგადოებამ მკაფიოდ უპასუხა, როდესაც ქართულმა ოცნებამ მორიგი დამაჯერებელი გამარჯვება მოიპოვა.
არჩევნების უარყოფა და ამომრჩეველთა ასეთი ძლიერი ხმის იგნორირება ის გზაა, რომელსაც ოპოზიცია წლების განმავლობაში მიჰყვება და რასაც ქართული საზოგადოება უკვე შეეჩვია. თუმცა, როდესაც ქართული საზოგადოება ხედავს ევროპელი პოლიტიკოსების მიერ დემოკრატიის უარყოფას, ეს ევროკავშირისადმი ნდობას აზიანებს.
აღნიშნულის გათვალისწინებით, შეუძლებლად მიმაჩნია მიღებულ თხოვნაზე დათანხმება.
ამავდროულად, მსურს გამოვხატო პატივისცემა დელეგაციის სხვა წევრების მიმართ და დავუდასტურო დიალოგის გაგრძელების მზაობა საპარლამენტო დიპლომატიის ფუნდამენტური პრინციპებისა და ნორმების ფარგლებში, თანასწორობისა და სუვერენიტეტის პატივისცემის საფუძველზე” – წერს პარლამენტის თავმჯდომარე.