ამერიკის შეერთებული შტატების სამხედრო დაზვერვის სააგენტომ (DIA) 2025 წლის გლობალური საფრთხეების შეფასების ანგარიში გამოაქვეყნა, რომელშიც საქართველოცაა ნახსენები.
„საქართველოში რუსეთი, თითქმის დანამდვილებით, მიზნად ისახავს საქართველოს თავის გავლენის სფეროში დაბრუნებას. ოქტომბრის საპარლამენტო არჩევნების შემდეგ, „ქართული ოცნების“ ხელისუფლებამ შექმნა ისეთი გარემო, რომელიც რუსეთს საშუალებას აძლევს ქვეყანაში თავისი გავლენა გაზარდოს“, – ნათქვამია ანგარიშში.
“დაიტოვეს” ადმინისტრატორი ნენსი ვოლანდი სოციალურ ქსელში წერს, რომ პროკურატურა სტუდენტის და “ილიაუნის სტუდენტური მოძრაობის” ერთ-ერთი წევრის ლიკა ლორთქიფანიძის პატიმრობას ითხოვს.
“პროკურატურა ლიკა ლორთქიფანიძის პატიმრობას ითხოვს. სტუდენტის!” – წერს ნენსი ვოლანდი.
ლიკა ლორთქიფანიძეს 17 მაისს, “ქართული ოცნების” დეპუტატისთვის, მარიამ ლაშხისთვის, შეურაცხყოფის მიყენებას ედავებიან.
“ბაჩიაშვილის შემთხვევაზე დეტალებთან დაკავშირებით სუს თავად გაავრცელებს ინფორმაციას, ეს არის მათი ფუნქცია, მათი პასუხისმგებლობა. მე ზოგადად, შემიძლია, მადლობა გადავუხადო სახელმწიფო უსაფრთხოების სამსახურს, რომ ეს ოპერაცია წარმატებით ჩატარდა, სათანადოდ ჩატარდა. რა თქმა უნდა, ძალიან მნიშვნელოვანია ყველა მიმართულებით სამართლის უზენაესობის უზრუნველყოფა, სამართლის და კანონის აღსრულება და კიდევ ერთხელ, დიდი მადლობა სახელმწიფო უსაფრთხოების სამსახურს. […] ბაჩიაშვილზე, მე შეიძლება, ვიცოდე რაღაცაზე მეტი, მაგრამ სუს-ის ფუნქციაა დეტალების გავრცელება”.
აცხადებს, ირაკლი კობახიძე.
ცოტა ხნის წინ, თანაინვესტირების ფონდის ყოფილი თავმჯდომარე, გიორგი ბაჩიაშვილი დააკავეს.
ბაჩიაშვილის ადვოკატების საერთაშორისო ჯგუფი აცხადებს, რომ იგი საქართველოში იძულებით დააბრუნეს, სადაც მას “წამების საფრთხე ემუქრება.”
“გიორგი ბაჩიაშვილი 2025 წლის 26 მაისს საქართველოში იძულებით დაბრუნების შემდეგ წამების უშუალო რისკის წინაშე დგას. ბატონი ბაჩიაშვილის საერთაშორისო იურიდიული გუნდი გამოიყენებს ყველა შესაძლო სამართლებრივ გზას, რათა საქართველომ პასუხი აგოს ბატონი ბაჩიაშვილის საქმეში განხორციელებული უკანონო ქმედებებისთვის, გააპროტესტოს საქართველოში სამართლიანობის მიმდინარე დამახინჯება და მოითხოვოს ანაზღაურება ბატონი ბაჩიაშვილის თვითნებური დაკავებისა და არასათანადო მოპყრობისთვის”, – წერია განცხადებაში.
სახელმწიფო უსაფრთხოების სამსახური აცხადებს, რომ გუშინ ანონიმური შეტყობინება შევიდა, რომლის მიხედვითაც ბაჩიაშვილი წითელი ხიდისა და სადახლოს შორის არსებული ე.წ. მწვანე საზღვრის მონაკვეთის მიმდებარედ გადაადგილდებოდა.
“სახელმწიფო უსაფრთხოების სამსახურში 2025 წლის 26 მაისს განხორციელებული ანონიმური შეტყობინებით ცნობილი გახდა, რომ წითელი ხიდისა და სადახლოს შორის არსებული ე.წ. მწვანე საზღვრის მონაკვეთის მიმდებარედ გადაადგილდებოდა წითელი ცირკულარით ძებნილი და მსჯავრდადებული საქართველოსა და რუსეთის ფედერაციის ორმაგი მოქალაქე გიორგი ბაჩიაშვილი.
გატარებული საგამოძიებო და ოპერატიულ-სამძებრო ღონისძიებების შედეგად ზემოაღნიშნული პირი დაკავებულ იქნა”, – წერია განცხადებაში.
მადლიერი ვარ, რომ თავისუფლების მოყვარულ ქართველ ხალხს ვულოცავ დამოუკიდებლობის დღეს. მოვუწოდებ სენატს, სწრაფად მიიღოს MEGOBARI აქტი საქართველოს მამაცი ხალხის მხარდასაჭერად, რომლებიც 180 დღეზე მეტია იბრძვიან თავიანთი ქვეყნისა და ოჯახებისთვის.
წერს კონგრესმენი და ჰელსინკის კომისიის თანათავმჯდომარე, ჯო უილსონი X-ზე.
ვულოცავ ქართველ ხალხს დამოუკიდებლობის დღეს და გულწრფელად ვუსურვებ, რომ საქართველო იყოს ძლიერი და ბედნიერი. უკრაინელები ყოველთვის გრძნობდნენ თბილ ემოციურ კავშირს საქართველოსთან.
ჩვენმა სახელმწიფომ მხარი დაუჭირა საქართველოს სუვერენიტეტსა და თავდაცვას 2008 წელს რუსეთის შემოჭრის რთულ პერიოდში. და ჩვენ ყოველთვის გვერდით ვიქნებით ხალხების – ევროპის ყველა ხალხის თავისუფალი და ღირსეული ცხოვრებისკენ ერთობლივ მისწრაფებაში, რაც წარმოუდგენელია უკრაინისა და საქართველოს გარეშე.
მადლობა ყველას, ვინც მხარს უჭერს ჩვენს ხალხს. გაუმარჯოს დამოუკიდებელ საქართველოს! დიდება უკრაინას!
გერმანიის კანცლერი, ფრიდრიხ მერცი აცხადებს, რომ უკრაინას რუსეთის ტერიტორიაზე შორი რადიუსის იარაღის გამოყენებაზე შეზღუდვა აღარ აქვს. ამის შესახებ კანცლერმა გერმანული ტელევიზია WDR-ს მიერ ორგანიზებულ ფორუმზე განაცხადა.
“უკრაინისთვის მიწოდებულ იარაღზე რადიუსის შეზღუდვები აღარ არის. არც ბრიტანელებისგან, არც ფრანგებისგან, არც ჩვენგან და არც ამერიკელებისგან. ეს ნიშნავს იმას, რომ უკრაინას ახლა შეუძლია, თავი დაიცვას რუსეთის სამხედრო პოზიციებზე თავდასხმითაც კი, მაგალითად. ცოტა ხნის წინ მას ამის გაკეთება არ შეეძლო, მცირე გამონაკლისების გარდა, ამას არც აკეთებდა”. – თქვა გერმანიის კანცლერმა.
“ჩვენ ვგმობთ საქართველოს ხელისუფლების ყველა ქმედებას, რომელსაც დემოკრატიული უკუსვლა მოჰყვება და თავდასხმებს სამოქალაქო საზოგადოების, მედიისა და მთავრობის კრიტიკოსების წინააღმდეგ.” – ვაიმარის სამკუთხედის ქვეყნების, გერმანიის, საფრანგეთისა და პოლონეთის ლიდერები, ფრიდრიხ მერცი, ემანუელ მაკრონი და დონალდ ტუსკი 26 მაისთან დაკავშირებით საქართველოს შესახებ განცხადებას ავრცელებენ.
“საქართველოს დამოუკიდებლობის დღესთან დაკავშირებით გვსურს, რომ მეგობრობისა და სოლიდარობის გზავნილი გადავცეთ ქართველ ხალხს და საქართველოს ტერიტორიული მთლიანობისა და სუვერენიტეტის ურყევი მხარდაჭერა ხელახლა გამოვხატოთ.
მხარს ვუჭერთ ქართველი ხალხის დემოკრატიულ და ევროპულ მისწრაფებებს. ეს მისწრაფებები ევროპული ოჯახის ნაწილად ყოფნის სურვილს ირეკლავს. შესაბამისად, ჩვენ ვგმობთ საქართველოს ხელისუფლების ყველა ქმედებას, რომელსაც დემოკრატიული უკუსვლა მოჰყვება და თავდასხმებს სამოქალაქო საზოგადოების, მედიისა და მთავრობის კრიტიკოსების წინააღმდეგ. გამოხატვისა და შეკრების თავისუფლება დაცული უნდა იყოს. გადაჭარბებული ძალადობის ცნობები გამოძიებული უნდა იყოს. კანონები, რომლებიც ევროპულ სტანდარტებთან წინააღმდეგობაში მოდის, უნდა შესწორდეს და რეფორმების აუცილებელი პროცესი უნდა გაგრძელდეს.
საქართველოს ხელისუფლებამ ოპოზიციასთან და სამოქალაქო საზოგადოებასთან დიალოგი უნდა განაახლოს.
ქართველ ხალხს არ უნდა წაერთვათ შესაძლებლობები, რომლებიც ქვეყნის ევროპულ გზას უკავშირდება”. – წერია განცხადებაში.
„მე ვდგავარ იმ მამაცი ქართველების გვერდით, რომლებიც ითხოვენ იმას, რასაც იმსახურებენ – თავისუფლებას, დემოკრატიას და თავიანთი ქვეყნის პროევროპულ მომავალს“,
ამის შესახებ ლიეტუველი ევროპარლამენტარი, რასა იუკნევიჩიენე სოციალურ პლატფორმა X-ზე წერს.
გილოცავთ საქართველოს დამოუკიდებლობის დღეს! საქართველოს დამოუკიდებლობა ძვირფასი მონაპოვარია — ის მრავალი მსხვერპლის შედეგად იქცა რეალობად. დღესაც კი, ქართველი ხალხი კვლავ იცავს საკუთარ თავისუფლებას. ნიდერლანდები დამოუკიდებლობის დღიდანვე საიმედო პარტნიორი და მეგობარია საქართველოსთვის. ჩვენ მტკიცედ ვდგავართ საქართველოს სუვერენიტეტისა და ტერიტორიული მთლიანობის გვერდით, მათ შორის ჩვენი წვლილით საქართველოში ევროკავშირის სადამკვირვებლო მისიაში. ჩვენ თქვენთან ვართ — და თქვენთან დავრჩებით. გაუმარჯოს საქართველოს!
წერს ნიდერლანდების ელჩი მელინე არაკელიანი X-ზე.