Category: არქივი

ჭავჭავაძის 5-თან, სადაც საპროტესტო აქცია მიმდინარეობს, ამ წუთებში ვითარება უკიდურესად დაძაბულია.

კანცელარიიდან მომავალმა აქციის მონაწილეებმა ჭავჭავაძის გადაკეტვა მოისურვეს, რის საშუალებას მათ პოლიცია არ აძლევს. აქციის მონაწილეებსა და პოლიციელებს შორის შეხლა-შემოხლა მოხდა.დაკავებულია 5 ადამიანი ცოტნე ცხვედიანი, გიორგი კობახიძე, გიორგი სოფრომაძე, ვახუშტი მენაბდე და დავით სუბელიანი.

შეგახსენებთ, რომ ჭავჭავაძის გამზირზე აქცია, ორი მუშის გარდაცვალებასთან დაკავშირებით მიმდინარეობს, რომლებიც ჭავჭავაძის 5–ში გუშინ მშენებლობაზე ჩამოშლილი მიწის ქვეშ მოყვნენ.

სოლიდარობის მოძრაობამ აქცია საღამოს მთავრობის ადმინისტრაციასთან  დაიწყო, შემდეგ კი მსვლელობით ჭავჭავაძის გამზირზე გადაინაცვლა.

აქციის მონაწილეები რამდენიმე საათია ადგილზე იმყოფებიან და ისინი პრემიერ-მინისტრის, ჯანდაცვის მინისტრის და დედაქალაქის მერის მისვლას ითხოვენ. 

პატრიარქის საქველმოქმედო ფონდის მმართველი საბჭოს წევრი და მთაწმინდის ოლქში  შუალედური არჩევნების ერთ-ერთი კანდიდატი გიორგი ანდრიაძე აცხადებს, რომ გირჩის საპირწონედ შექმნა მართლმადიდებლური რელიგიური ორგანიზაცია, რომელიც ახალგაზრდებს სავალდებულო სამხედრო სამსახურიდან გაათავისუფლებს.

როგორც ანდრიაძე ამბობს, გირჩის რელიგიური ორგანიზაციიდან უკვე ასობით ახალგაზრდა გადავიდა მის მიერ დაფუძნებულ ორგანიზაციაში. მაჟორიტარობის კანდიდატი ამბობს, რომ მის მიერ შექმნილი ორგანიზაცია წარმოადგენს თურქეთში არსებულ ისტორიულად ჩამოყალიბებულ კატაკომბურ ეკლესიას:

“თავისი მრწამსით ეს არის მართლმადიდებლური ორგანიზაცია, რომელმაც რეგისტრაცია გაიარა საქართველოში. ამ ორგანიზაციის სახელით ჩვენ სწორედ იგივე პრივილეგია მივეცით ახალგაზრდებს და არ ვუშვებთ სამხედრო სამსახურში, ვინც მიმართავს ამ ორგანიზაციას. ამ მიმართულებით, ამ კუთხით გავათავისუფლეთ უამრავი ახალგაზრდა იმისაგან, რომ მიემართა სექტანტური, ანტიმართლმადიდებლური ორგანიზაციისათვის, რომელიც შექმნა ე.წ. პოლიტიკურმა ორგანიზაცია გირჩმა.
ამის შემდეგ ჩვენ ვთხოვეთ იმ ახალგაზრდებს, რომლებიც თავისი მრწამსით არიან მართლმადიდებლები და სიტუაციიდან გამომდინარე მოხვდნენ გირჩის ე.წ. რელიგიურ ორგანიზაციაში, რომელიც თავისი არსით არის სექტანტური ორგანიზაცია. ამ პიროვნებებს მივმართეთ, რომ “გადმოწერილიყვნენ” ჩვენს მართლმადიდებლურ ორგანიზაციაში. ამით საქართველოს მართლმადიდებელ ეკლესიას დავუბრუნეთ ასობით ადამიანი… ჯერჯერობით მხოლოდ ასობით. სამწუხარო ციფრი, რომელიც არის 15 ათასიდან 20 ათასამდე გირჩის ორგანიზაციაში მხოლოდ იმ მიზნით, რომ თავი დააღწიოს სავალდებულო სამხედრო სამსახურს. ამ ახალგაზრდებს ვაძლევთ საშუალებას, რომ დაუბრუნდნენ დედაეკლესიას, ანუ საქართველოს სამოციქულო მართლმადიდებელ ეკლესიას”.- აცხადებს ანდრიაძე ფეისბუქ ჩართვაში.

“დროა ვიბრძოლოთ, რომ აღარ ვიგლოვოთ!”, “კვირა დღე დასვენებისაა და არა სიკვდილის” –ამ და სხვა ლოზუნგებით მთავრობის ადმინისტრაციასთან შეკრებილებმა სამშენებლო უსაფრთხოების ნორმების დარღვევა და გუშინ მშენებლობაზე მომხდარი უბედური შემთხვევა გააპროტესტეს.

ამ წუთებში კი მთავრობის კანცელარიიდან აქციის მონაწილეები მსვლელობას ჭავჭავაძის გამზირისკენ აწყობენ.

აქციის მონაწილეები ითხოვენ, რომ შრომის ინსპექციას შრომითი უფლებების შემოწმების მანდატი დღესვე მიენიჭოს.

“მთავარი არის ამ ქვეყანაში მოგება, ჩვენ 2013 წელს მივიღეთ შრომის კოდექსი, რომელიც დღემდე არ ფუნქციონირებს, აღსრულების მექანიზმი არ გვაქვს, შრომის ინსპექცია არის უუნარო.”-განაცხადეს აქციის ორგანიზატორებმა.

აქციის მონაწილეები სწორედ იმ ადგილისკენ მიემართებიან, სადაც გუშინ ჭავჭავაძის გამზირზე, სამშენებლო ობიექტზე მიწის ჩამოშლის შედეგად ორი ადამიანი დაიღუპა.
მომხდართან დაკავშირებით, შინაგან საქმეთა სამინისტრომ გამოძიება სისხლის სამართლის კოდექსის 240-ე მუხლის დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.

საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო თბილისში, სამშენებლო კომპანია „დირსის“ საცხოვრებელ კომპლექსში  დევნილი ოჯახების შეჭრის ფაქტს ეხმაურება.

სამინისტრო უმოკლეს ვადებში შეისწავლის 200 -მდე შეჭრილი დევნილი ოჯახის მდგომარეობას და მაქსიმალურ მხარდაჭერას აღმოუჩენს იმ ოჯახებს, რომელთაც განსაკუთრებით გამოუვალი მდგომარეობა აქვთ.

სამინისტრომ დევნილების მიერ საცხოვრებელი ფართების დაკავება არაკეთილსინდისიერ ქმედებად შეაფასა და ოჯახებთან მოლაპარაკების დასაწყებად მზადყოფნა გამოთქვა.

„უკანონოდ შეჭრა კი იმ ათასობით დევნილი ოჯახის უფლებების დარღვევაა, რომლებიც კეთილსინდისიერად ელოდებიან საცხოვრებელი ფართების მიღებას და შექმნილი ვითარების გამო პროცესი ფერხდება.

მხოლოდ შენობის დატოვების შემდგომ განიხილება მათი განსახლების საკითხი, სხვა იძულებით გადაადგილებული პირების მსგავსად, კრიტერიუმების შესაბამისად. სამინისტრო მზადყოფნას გამოთქვამს, სამუშაო რეჟიმში, დევნილ ოჯახებთან მოლაპარაკებები აწარმოოს.

სამშენებლო კომპანია „დირსის“ საკუთრებაში არსებული ბინები, სამინისტროს სარემონტო სამუშაოების დასრულებისთანავე უნდა გადმოეცეს და დევნილების მიერ შენობის დაკავება ამ პროცესსაც შეაფერხებს.

თბილისში, საცხოვრებელი ფართის მიღების მსურველი დევნილი ოჯახებისთვის მინიჭებული წინასწარი ქულების სია მიმდინარე წლის 10 აპრილს გამოქვეყნდება. 7 მაისიდან კი, მონიტორინგის პროცესი დაიწყება, რის შემდეგაც დევნილთა საკითხების შემსწავლელი კომისია თითოეული ოჯახის საკითხს ინდივიდუალურად განიხილავს.

სამინისტრო დევნილ ოჯახებს საცხოვრებელ ფართებს გრძელვადიანი განსახლების კრიტერიუმების შესაბამისად გადასცემს. ქულათა სისტემა განსაზღვრავს რიგითობას, თუ რომელი დევნილი ოჯახი საჭიროებს საცხოვრებლით უზრუნველყოფას პირველ რიგში. ამასთან, განიხილება იმ დევნილი ოჯახების განსახლების საკითხიც, რომლებიც შესაბამისი საექსპერტო დასკვნის თანახმად, ნგრევად და სიცოცხლისათვის საშიშ ობიექტებში ცხოვრობენ. ბინების განაწილების შესახებ გადაწყვეტილებას კომისია იღებს, რომლის შემადგენლობაშიც სახალხო დამცველის აპარატისა და არასამთავრობო ორგანიზაციების წარმომადგენლები შედიან.

სამინისტრო, თბილისში, როგორც „დირსისგან“ ისე სხვა სამშენებლო კომპანიებისგან შესყიდულ 800 ბინას დევნილ ოჯახებს მიმდინარე წლის ივნისის ბოლოს გადასცემს.

2012 წლიდან ბიუჯეტის ზრდა ამ მიმართულებით, ყოველწლიურად მიმდინარეობს. 2012 წელს ეს იყო 28 მილიონი ლარი, 2018 წელს კი, თანხამ 135 მილიონი ლარი შეადგინა. 2019-2020 წლების სამოქმედო გეგმაში დევნილთა საცხოვრებელი პირობების გაუმჯობესების მიზნით, 328 მილიონია გამოყოფილი“, – ნათქვამია სამინისტროს განცხადებაში.

ჭავჭავაძის გამზირზე  მომხდარ ტრაგედიასთან დაკავშირებით პოლიციაში დაკითხვები დაიწყო.  ვაკე-საბურთალოს პოლიციის განყოფილებაში “ხიმინჯ სერვის 2”-ის ხელმძღვანელები დაკითხეს.

“ხიმინჯ სერვის 2” ჭავჭავაძის 5 ნომერში  სამუშაოებს უბედური შემთხვევის ადგილზე ასრულებდა  და ორივე გარდაცვლილი სწორედ აღნიშნული კომპანიის  თანამშრომელი იყო.

შპს „ხიმიჯ სერვის 2-ის“ დირექტორი, ოთარ ცნობილაძე ამბობს, რომ უსაფრთხოების ნორმები მშენებლობაზე დაცული იყო.

„პირველი შემთხვევა იყო ეს, უსაფრთხოება დაცული იყო, ყველაფერი და იყო უბედური შემთხვევა. წუხელაც ვიყავი, ახლაც მივდივარ დაკითხვაზე,“ – ამბობს ცნობილაძე.

“ხიმიჯ სერვის 2“ ინსპექტირების წარმომადგენლებმა დღეს ათასი ლარით  დააჯარიმეს. როგორც ცნობილი გახდა, კომპანიას   რეგისტრაცია არ ჰქონდა გავლილი საფრთხის შემცველ სამუშაოებთან დაკავშირებით. 
კომპანიები  პასუხისმგებლობას ერთმანეთს აკისრებენ.

“ხიმიჯ სერვისის” წარმომადგენლებმა   დამქირავებელი კომპანია “ტრანსმშენსი” გააკრიტიკეს, რომელმაც გავრცელებულ განცხადებაში მომუშავე პერსონალის უსაფრთხოებაზე სრული პასუხისმგებლობა მათ დააკისრა.

ვაკეში მომხდარ ტრაგედიას უბედურ შემთხვევად მოიხსენიებს ადვოკატი, გიორგი ყიფშიძეც. მისი თქმით, შემთხვევის დღეს სამუშაოები დასრულებული იყო, თუმცა, არსებულმა გამაგრებამ მიწის დაწოლილ მასა ვერ გაუძლო.

„წინასწარი ვერსიით, ეს იყო უბედური შემთხვევა, რა თქმა უნდა, ცალსახად. არსებულმა გამაგრებამ ვერ გაუძლო დაწოლილ მასას მიწისას და მოხდა ასეთი რამ, სამწუხაროდ, უკვე დასრულებულ იმ დღის სამუშაოებზე. ხელშეკრულების მიხედვით, მომუშავე პერსონალზე მათ ჯანმრთელობასა და სიცოცხლეზე ზრუნვა ევალებოდა “ხიმინჯ სერვის 2”-ს, ამის უარყოფა იქნება ალბათ არასწორი. სავალდებულოა, საქართველოში იმ სამუშაოების ჩამტარებელი კომპანიის მიერ რეგისტრაცია, რომელიც შეიცავს ადამიანისთვის სიცოცხლის საფრთხეს და ეს რეგისტრაცია კომპანიას სამწუხაროდ გავლილი არ ჰქონდა,“ – განაცხადა გიორგი ყიფშიძემ.

ყიფშიძე ვარაუდობს, რომ აღნიშნულ საქმეში ბრალეულობის გამოკვეთის შემდეგ კონკრეტული პირები პასუხისგებაში მიეცემიან.

„ამ ტიპის უბედური შემთხვევების დროს თუ რაიმე ტიპის დაუდევრობაა, ეს უნდა თქვას ექსპერტიზამ. მხოლოდ ამის შემდეგ, სავარაუდოდ, უკვე პროკურატურა მიიღებს გადაწყვეტილებას მისცეს ვინმე პასუხისგებაში თუ არ მისცეს, მაგრამ არა მგონია, მთლად ასე ჩაიაროს ამ საქმემ, რომ ვინმე არ იქნეს მიცემული პასუხისგებაში. ეს ცალსახა თავის მოტყუება იქნება, რომ სხვანაირად ვიმსჯელოთ,“ – განაცხადა ადვოკატმა.

ჭავჭავაძის გამზირზე მშენებლობის დროს მიწის ჩამოშლას ორი ადამიანის სიცოცხლე ემსხვერპლა.  

უბედური შემთხვევა გუშინ  ყოფილი ლეჩკომბინატის ტერიტორიაზე მოხდა, სადაც ახალი კლინიკის სამშენებლო სამუშაოები მიმდინარეობს.

მიწა შენობის საძირკველის გამაგრების დროს ჩამოიშალა და ორი მუშა მოიყოლა.

“ტრანსმშენის“ მიერ გავრცელებულ განცხადებაში წერია, რომ აღნიშნულ სამუშაოებს ქვეკონტრაქტორი კომპანია ახორციელებდა და  მუშებიც სწორედ მათთან იყვნენ დასაქმებულები.

საქართველოში ნალექმა პრობლემები გამოიწვია, თბილისის მიმდებარე ტერიტორიაზე გზების გაწმენდა და ტექნიკური მარილით დამუშავება გახდა საჭირო.ადგილზე მობილიზებულია სპეციალური ტექნიკა. გაწმენდით სამუშაოებს ”თბილსერვის ჯგუფი” დილიდან ახორციელებს.

“თბილსერვისის” წარმომადგენლები აცხადებენ, რომ  ამ ეტაპისთვის კოჯორში, წყნეთში, ბეთანიასა და კიკეთში ავტოსატრანსპორტო გადაადგილება შეუფერხებლად არის შესაძლებელი. 

გარემოს ეროვნული სააგენტოს ცნობით, საქართველოში ნალექიანი ამინდი 5 აპრილამდე გაგრძელდება. 2 აპრილს ზოგან იქროლებს დასავლეთის მიმართულების ძლიერი ქარი. ჰაერის ტემპერატურა 3 აპრილიდან +12+17 გრადუსამდე მოიმატებს.

რაც შეეხება დედაქალაქს, პირველ აპრილს უმეტესად ღრუბლიანი და ნალექიანი ამინდი იქნება, დღის ბოლოს კი ქარიანი ამინდია ნავარაუდევი. ჰაერის ტემპერატურა +7, +9 გრადუსის ფარგლებში დაფიქსირდება.

2-3 აპრილს უმეტესად უნალექო ამინდია მოსალოდნელი. 2 აპრილს ძლიერი ქარი იქროლებს. ტემპერატურა 2-4 აპრილს +14, +16 გრადუსამდე მოიმატებს.

(more…)