სამწუხარო რამ ხდება ჩვენს ქვეყანაში. “ოცნებამ“ პრაქტიკულად გაწყვიტა ევროკავშირში გაწევრიანების პროცესი, რაც პირველ რიგში, გამოიხატა ანტიდემოკრატიული, მათ შორის, ე.წ. რუსული კანონების მიღებით. არადემოკრატიული მმართველობის ქვეშ მყოფი ქვეყნები, სადაც ირღვევა ადამიანის უფლებები, ავიწროებენ ოპოზიციას, არ ტარდება სამართლიანი არჩევნები, არ არის თავისუფალი სასამართლო და შედეგად, ყველაფერი შიშით იმართება, არასდროს მოხვედრილან და ვერც მოხვდებიან ევროკავშირში. მაგრამ ამავდროულად, “ოცნების“ მთელი პროპაგანდა, პრემიერიდან რიგით დეპუტატამდე, იმაზეა აგებული, რომ საქართველო 2030 წელს ევროკავშირის წევრი გახდება.
თუ ოცნება დარჩება ხელისუფლებაში, ვერასდროს გავხდებით დასავლეთის ნაწილი.
დღეს “ოცნება“ ორმაგ თამაშს თამაშობს და არსებობს დიდი საშიშროება, ამ ორმაგი თამაშით ქვეყანა ომში გახვიოს. ამ ხელისუფლების სიტყვას არ ენდობა არც დასავლეთი და აღარც რუსეთი. რუსეთმა იცის, რომ ქართული ოცნება “აფერისტი“ პოლიტიკური ძალაა, რომელმაც 2012 წელს მიცემული დაპირება არ შეუსრულა. ისევე, როგორც არ შეუსრულა დაპირებები დასავლეთს და ახლა ჩინეთის მოტყუებას ცდილობს. სამწუხაროდ, ისეთი თამაშები, როცა არ გაგაჩნია არც ეკონომიკა, არც თავდაცვისუნარიანობა და აღარც შენს სიტყვას აქვს ფასი, ცუდად მთავრდება. “ოცნების“ ორმაგი და სამმაგი თამაში ომამდე და კატასტროფამდე მიგვიყვანს.
მე მხოლოდ ქართველი ხალხის იმედი მაქვს.
ეს არჩევნები, ერთის მხრივ, იქნება – “ოცნება“, ომი, ემიგრაცია, ძალადობა, სიტყვის გატეხა, რეგრესი, ხოლო მეორეს მხრივ, ხალხი და კოალიციური ხელისუფლება, მშვიდობა, განვითარების პერსპექტივა, პროგრესი და შესაძლებლობების ფანჯარა ყველა მიმართულებით!
Blog
-
ხელისუფლების ორმაგი და სამმაგი თამაში ომამდე მიგვიყვანს – კახა ოქრიაშვილი
-
2012 წლიდან, საფრანგეთი საქართველოს 945 მილიონი ევროთი დაეხმარა
2012 წლიდან, საფრანგეთი საქართველოს 945 მილიონი ევროთი დაეხმარა – შესაბამის ანგარიშს, საფრანგეთის საელჩო აქვეყნებს. €724 მლნ. საბიუჯეტო სესხებს მოხმარდა, სესხების ოდენობამ კერძო სექტორში185 მილიონი ევრო შეადგინა, ხოლო გრანტებში დაიხარჯა – 35 მლნ. ევრო.
თანხები საელჩოს ცნობით, შემდეგნაირად გადანაწილდა:
- 415 მლნ. ევრო ჩაიდო ენეგრეტიკაში;
- 201 მლნ. ევრო – სოციალურ დაცვაში;
- 185 მლნ. ევრო – კერძო სექტორში;
- სასმელი წყალი და წყალარინება – 96 მლნ. ევრო;
- სარწყავი სისტემა – 49 მლნ. ევრო.
-
დემოკრატები თუ გაიმარჯვებენ ომი 1 წელიწადში მორჩება, თუ რესპუბლიკელები – 6 თვეში – კობახიძე
ჩვენ ველოდებით, რომ მაქსიმუმ 1 წელიწადში დამთავრდება ომი უკრაინაში. თუ რესპუბლიკელები გაიმარჯვებენ, როგორც უკვე ითქვა, ვფიქრობთ, რომ უკვე იანვარშიც შეიძლება ომი დასრულდეს. როგორც კი ომი დასრულდება, როგორც რეგიონში ვითარება დამშვიდდება, მაშინვე შეიცვლება მიდგომები საქართველოს მიმართ. ეს არის ჩვენი ოპტიმისტური მოლოდინი. […]
ურთიერთობების გადატვირთვა არ არის აპრიორი დამოკიდებული რესპუბლიკელების გამარჯვებაზე. კიდევ ერთხელ გავიმეორებ: თუ დემოკრატები გაიმარჯვებენ, სავარაუდოდ, ერთ წელიწადში დასრულდება ომი, თუ რესპუბლიკელები – სავარაუდოდ, ნახევარ წელიწადში. ორივე შემთხვევაში, ომი დასრულდება, ვითარება დამშვიდდება რეგიონში და შეიცვლება დამოკიდებულება საქართველოს მიმართ. ანუ აპრიორი რესპუბლიკელების გამარჯვებაზე არ არის დაფუძნებული ჩვენი ოპტიმიზმი და ჩვენი იმედები. […]
მე ვარ დარწმუნებული, რომ მაქსიმუმ ერთ წელიწადში, შეიძლება 6 თვეშიც, დაიწყება არსებითად, თვისებრივად [აშშ-საქართველოს] ურთიერთობების გადახედვა.
-
გამოძიება ტერაქტის მომზადების ფაქტზე მიმდინარეობს, ივანიშვილის მკვლელობას ამზადებდნენ – სუსი
“გამოძიება ტერაქტის მომზადების ფაქტზე მიმდინარეობს, ივანიშვილის მკვლელობას ამზადებდნენ” – ამის შესახებ, ნათქვამია სახელმწიფო უსაფრთხოების სამსახურის მიერ გავრცელებულ განცხადებაში.
“სახელმწიფო უსაფრთხოების სამსახური იძიებს უკრაინაში მყოფი, საქართველოს ხელისუფლების ყოფილი მაღალჩინოსნებისა და ძალოვანი უწყებების ყოფილი თანამშრომლების ორგანიზებით და დაფინანსებით, საქართველოში დანაშაულებრივი ქმედებების, მათ შორის, პარტია ქართული ოცნების საპატიო თავმჯდომარის, ბიძინა ივანიშვილის მკვლელობის მომზადების ფაქტებს.
ხსენებული დანაშაულებრივი ქმედებების მიზანია, ქვეყანაში არეულობის მოწყობის და ხელისუფლების დასუსტების ფონზე, დესტრუქციული ძალების მიერ სახელმწიფო ხელისუფლების ძალადობრივი გზით დამხობა.
სისხლის სამართლის საქმეზე მიმდინარეობს აქტიური საგამოძიებო და ოპერატიულ-სამძებრო ღონისძიებები, რომლის ფარგლებში ხდება კონკრეტულ პირთა საგამოძიებო ორგანოში დაბარება მათი მოწმის სახით გამოკითხვის მიზნით” – აცხადებს სუს-ი.
გამოძიება მიმდინარეობს საქართველოს სსკ-ის 18-323-ე მუხლის პირველი ნაწილით და 315-ე მუხლის პირველი ნაწილით, რაც 10-დან 15 წლამდე თავისუფლების აღკვეთას ითვალისწიმებს.
-
ტრამპზე თავდასხმის შემდე, აშშ-ს საიდუმლო სამსახურის პრეზიდენტი თანამდებობიდან გადადგა
დონალდ ტრამპზე თავდასხმის შემდეგ, აშშ-ის საიდუმლო სამსახურის დირექტორი, კიმბერლი ჩიტლი თანამდებობიდან გადადგა. ჩიტლიმ ამ გადაწყვეტილების მიზეზად უსაფრთხოების სამსახურის შეცდომები დაასახელა.
გადადგომის შესახებ განცხადება უკვე დაწერა.
22 ივლისს, ჩიტლის, გამოსვლისას, კონგრესმენებმა ტრამპზე თავდასხმასთან დაკავშირებით მწვავე შეკითხვები დაუსვეს. მან 13 ივლისს მომხდარ ფაქტს საიდუმლო სამსახურის “ბოლო ათწლეულში ყველაზე მნიშვნელოვანი ოპერატიული წარუმატებლობა” უწოდა. ამასთანავე მან თქვა, რომ მომხდარით საიდუმლო სამსახურმა მარცხი განიცადა და სრულ პასუხისმგებლობას საკუთარ თავზე იღებდა, თუმცა მიუხედავად კონგრესმენების მოწოდებებისა მის მიმართ, თანამდებობა დაეტოვებინა, აღნიშნა, რომ “საკუთარ თავს საუკეთესო ხელმძღვანელად მიიჩნევს”.
კიმბერლი ჩიტლი ამ თანამდებობაზე პრეზიდენტმა ჯო ბაიდენმა 2022 წელს წარადგინა. ბაიდენმა ჩიტლის წარდგენაზე თქვა, რომ ის და მისი ოჯახი მის განსჯას და რჩევებს სრულად ენდობა. კიმბერლი ჩიტლი უსაფრთხოების სამსახურში სამი ათწლეულის განმავლობაში მუშაობდა.
-
ლელოს, დოლიძის პარტიისა და ცუცქირიძის მოძრაობას, პარტია მოქალაქეებიც შეუერთდა
პარტია “ლელოს”, ანა დოლიძის პარტიისა და ლევან ცუცქირიძის პოლიტიკური მოძრაობის გაერთიანებას პარტია მოქალაქეებიც შეუერთდა.
ალეკო ელისაშვილისა და მამუკა ხაზარაძის ფოტო ხაზარაძის Facebook გვერდზე გავრცელდა.
“ძლიერი საქართველოსთვის”, – წერს ხაზარაძე.
-
თბილისის ქუჩების ჩამონათვალი რომლებსაც 24 ივლისს ელექტრომომარაგება შეუწყდება
ხვალ, 24 ივლისს თბილისის ნაწილს ელექტრომომარაგება დროებით შეუწყდება.
გლდანის რაიონი
გადაუდებელი სამუშაოების გამო 12:00 საათიდან 15:00 საათამდე შეზღუდვა შეეხება: სოფელი გლდანის, გლდანისკენ მიმავალი მაგისტრალის, დავით სარაჯიშვილის გამზირის, გურამიშვილის გამზირის, რომან ჭელიძის, იპოლიტოვ-ივანოვის, ზარზმის, ხევძმარის, შეშელიძის, ხიზაბავრის, ევგენი ხარაძის, ილორის, ხიზამბარელის და ქერჩის ქუჩების მოსახლეობას.
ჩუღურეთის რაიონი
გადაუდებელი სამუშაოების გამო 10:00 საათიდან 18:00 საათამდე შეზღუდვა შეეხება: ნინოშვილის, კონსტიტუციის, ყანჩელის და წინამძღვრიშვილის ქუჩების მოსახლეობას.
სამგორის რაიონი
გადაუდებელი სამუშაოების გამო 10:00 საათიდან 18:00 საათამდე შეზღუდვა შეეხება: მოსკოვის გამზირის IV კვარტლის, მოსკოვის გამზირის, ქინძმარაულის და ზურაბ იარაჯულის ქუჩების მოსახლეობას.
გადაუდებელი სამუშაოების გამო 10:00 საათიდან 12:00 საათამდე შეზღუდვა შეეხება: ვარკეთილი-3 დასახლების II მიკრორაიონის, ვარკეთილის მასივის ზემო პლატოს II მიკრორაიონის და საქართველოს ერთიანობისთვის მებრძოლთა ქუჩის მოსახლეობას.
გადაუდებელი სამუშაოების გამო 11:00 საათიდან 12:00 საათამდე შეზღუდვა შეეხება: კახეთის გზატკეცილის, ორხევის დასახლების, ზემო ალექსეევკის დასახლების, აეროპორტის დასახლების, საქსოფმანქის დასახლების, კაკაბეთის, ამირანაშვილის, გოკიელის, სააკაძის, თენგიზ ჩანტლაძის, ესენინის, გიორგი მუხაძის, ჩანტლაძის, ბანეთიშვილის, ფრისის, აბზიანიძის, პეტრიწის, წუწუნავას, ნიკო ფიროსმანის, ახვლედიანის, სააკაძის და მერაბ კოსტავას ქუჩების მოსახლეობას.
ვაკის რაიონი
გადაუდებელი სამუშაოების გამო 10:00 საათიდან 18:00 საათამდე შეზღუდვა შეეხება: დაბა წყნეთის (ნაწილობრივ) მოსახლეობას.
გადაუდებელი სამუშაოების გამო 11:00 საათიდან 18:00 საათამდე შეზღუდვა შეეხება: წყნეთის გზატკეცილის და ტაბლიაშვილის ქუჩის მოსახლეობას.
დიდუბის რაიონი
გადაუდებელი სამუშაოების გამო 11:00 საათიდან 18:00 საათამდე შეზღუდვა შეეხება: დიღმის მასივის II, III კვარტლების, რობაქიძის გამზირის, აკაკი წერეთელის გამზირის, ნონა გაფრინდაშვილის და აკაკი ბელიაშვილის ქუჩების მოსახლეობას.
კრწანისის რაიონი
გადაუდებელი სამუშაოების გამო 10:00 საათიდან 18:00 საათამდე შეზღუდვა შეეხება: ჯვარედინის, თონეთის, ასკანის, ქვემო გომის, ვიწრო ჩიხის, ჰოვანეს თუმანიანის, ბეთლემის, იერუსალიმის და კოტე აფხაზის ქუჩების მოსახლეობას.
-
სასამართლომ დავით ქაცარავა 2 ათასი ლარით დააჯარიმა და იარაღის ტარების უფლება ჩამოერთვა
თბილისის საქალაქო სასამართლომ აქციაზე სამართალდამცავების მიერ ნაცემი “ანტისაოკუპაციო მოძრაობის” ლიდერი, დავით ქაცარავა 2 000 ლარით დააჯარიმა. ხოლო სანქციის სახით, მას ჩამოერთვა იარაღის ტარების უფლება 2 წლის ვადით.
მის წინააღმდეგ საქმე აღძრული იყო ადმინისტრაციულ სამართალდარღვევათა კოდექსის 166-ე და 173-ე მუხლებით, რაც პოლიციელისადმი დაუმორჩილებლობასა და წვრილმან ხულიგნობას გულისხმობს.
მოსამართლე კობა ჩაგუნავამ წვრილმან ხულიგნობასთან დაკავშირებით საქმის წარმოება შეწყვიტა, ხოლო ქაცარავა სამართალდამრღვევად სცნო სამართალდამცავებისთვის შეურაცხყოფისა და წინააღმდეგობის გაწევის ნაწილში.
-
ყველაფერზე არიან წამსვლელი, მათ შორის ტერორისტული აქტების მომზადებასა და ადამიანის მოკვლაზეც კი – იონათამიშვილი ოპოზიციაზე
რადიკალური ოპოზიცია კარგად აცნობიერებს, რომ არჩევნები წაგებული აქვთ, ამიტომ ყველაფერზე არიან წამსვლელი, მათ შორის ტერორისტული აქტების მომზადებასა და ადამიანის მოკვლაზეც კი – დარწმუნებული ვარ, სუს-ში მიმდინარე გამოძიება ყველა საკითხს ნათელს მოჰფენს!.[…]რადიკალური ოპოზიციის მედია საშუალებები, გამოკითხული პირები და მათი ადვოკატები საზოგადოებას უმალავენ, რომ გამოძიება ტერორისტული აქტის მომზადების მუხლითაც მიმდინარეობს.აქ არის მთავარი კითხვა, რაც საზოგადოებას გააჩნია – მეექვსე დღეს რატომ წამოსცდათ ან აღიარეს ამ ადამიანებმა, რომ ამ უმძიმესი მუხლით მიმდინარეობს გამოძიება?!”
ეს განცხადება მედიასთან “ქართული ოცნების” წევრმა რატი იონათამიშვილმა გააკეთა.
-
მდინარაძე ამბობს, რომ ტრამპს ომის პარტიამ ესროლა და ოცნებაზე “ტერაქტსაც” ის გეგმავს
“ერთადერთი [ტერაქტთან დაკავშირებული გამოძიება] მახსენდება გივი თარგამაძის აფეთქების ფაქტი. არ ააფეთქეს თავისიანი იმისათვის, რომ ქვეყანაში არეულობა მოეხდინათ? არ ააფეთქეს? მოგვეჩვენა გივი თარგამაძის აფეთქებაც? თუ ბოლო პერიოდში მოეჩვენა ირაკლი კობახიძეს მინიშნება მკვლელობაზე? თუ ტრამპის ყურთან ჩაწუილებული ტყვია მოგვეჩვენა, და გაკაწრული და არა გარდაცვლილი, საბედნიეროდ, ტრამპი, ესეც მოგვეჩვენა? ფიცოს მკვლელობის მცდელობა მოგვეჩვენა? არ ხდება ეს გლობალური ძალების და გლობალური ომის პარტიის მიერ, რაღაც ძალის მიერ, რომელზეც სულ სპეკულირებთ, რომ არ არსებობს თითქოს? თავისით ემთხვევა?.[…] ტრამპის მკვლელობის მცდელობა, ფიცოს მკვლელობის მცდელობა, ორბანი რომ ავარიას გადაურჩა, კობახიძეს რომ რაღაცაზე მიუთითეს და ა.შ. ეს ყველაფერი შემთხვევით, აგერ მაინცდამაინც 2-3 თვეში დაემთხვა ერთმანეთს? დამთხვევების გჯერათ თქვენ? მე არ მჯერა ასეთი დამთხვევების და თქვენ დაიჯერეთ”
განაცხადა მამუკა მდინარაძემ ჟურნალისტებთან საუბრისას.