Blog

2019 წლის პირველ  კვარტალში სახელმწიფოსგან ყველაზე მეტი ქონება ივანიშვილმა იყიდა-ამის შესახებ ინფორმაციას BMG აქვეყნებს.

2019 წლის პირველ კვარტალში საქართველოს მთავრობამ პრივატიზაციის შედეგად 21,291,197 ლარის ღირებულების ქონება გაყიდა. ეს 2018 წლის ანალოგიურ პერიოდთან შედარებით 38%-ით ნაკლებია. სახელმწიფო ბიუჯეტში პრივატიზაციიდან ფაქტობრივად შესული თანხა (გადახდილი საფასური) 18,665,836 ლარს შეადგენს.

ინფორმაცია BMG-მ  სახელმწიფო ქონების ეროვნული სააგენტოსგან გამოითხოვა.  სტატისტიკის მიხედვით, პირველ კვარტალში ყველაზე მსხვილი გაყიდული ობიექტი აბასთუმანში, ფალიაშვილის ქუჩა 40-ში მდებარე ყოფილი ტუბდისპანსერის საავადმყოფო და მის გარშემო არსებული მიწა იყო, რომლის საერთო ფართობიც 23,585 კვადრატულ მეტრს შეადგენს.

აღნიშნული ტერიტორია 3,540,000 ლარად შპს “სანაპიროს ხედმა” შეიძინა, რომლის 100%-იან წილს პანამაში რეგისტრირებული კომპანია “ლაიმსთოუნ ფაინანს ინთერნეიშენალი” ფლობს. პანამური კომპანიის მფლობელი კი “ქართული ოცნების” თავმჯდომარე ბიძინა ივანიშვილია.

ამავე კომპანიას ეკუთვნის კიდევ ერთი შპს „აბასთუმანი 2019“-, რომელიც 2019 წლის 19 მარტს არის რეგისტრირებული.

“ქართული ოცნების” ხელისუფლების პირობებში სახელმწიფო ქონების პრივატიზაციიდან მიღებული შემოსავალი მაქსიმალური 2015 წელს იყო და 105,947,000 ლარს შეადგენდა. ყველაზე ნაკლები – 64,624,000 ლარის პრივატიზაცია კი 2017 წელს განხორციელდა. 2018 წელს საპრივატიზაციო შემოსავალი 88,714,889 ლარის ტოლი იყო.

2019 წლის დასაწყისში ჯერ კიდევ ეკონომიკის მინისტრის პოსტზე ყოფნისას გიორგი ქობულიამ განაცხადა, რომ მთავრობა გაცილებით უფრო მასშტაბურ – 170 მლნ ლარის პრივატიზების ტალღას გეგმავდა. ამ განცხადების მიუხედავად, 2019 წლის ბიუჯეტით, წელს სახელმწიფო ორჯერ ნაკლები – 70,000,000 ლარის პრივატიზებას გეგმავს.

ქართული ოცნების მხარდამჭერები ზუგდიდის მე-6 სკოლის გარდაცვლილი დირექტორის შვილს დაუპირისპირდნენ. ინციდენტის ამსახველ კადრებს  “რუსთავი 2” ავრცელებს.ბაჩანა შენგელია მისი გარდაცვლილი დედით პოლიტიკურ სპეკულაციაში დაადანაშაულეს. ინციდენტი სოფელ დარცელში მოხდა.

შენეგელიას თქმით, ქართული ოცნების აქტივისტებმა დღეს მიზანმიმართული პროვოკაცია მოაწყვეს, რომლის მიზანიც მისი და მისი ოჯახი დისკრედიტაციაა.

ნაციონალური მოძრაობის” საკრებულოს წევრი ლევან ხაბეიშვილი საქართველოს პრეზიდენტის შეცდომების  გარშემო ატეხილ სკანდალს სოციალურ ქსელში გამოეხმაურა.

“სალომეს ადმინისტრაციაში არ გამორიცხავენ კიბერშეტევას არ გამორიცხავენო, ანუ რომ კითხეს “შალომეს” მისი პასუხიდან ვერც ამათ გამოაქვთ აზრი და ამიტომაც არ გამორიცხავენ,ჩამოართვით ტელეფონი და შეუზღუდეთ ინტერნეტი ხომ ხედავთ – ქაჯია

P.s პრეზიდენტის ტვიტერზე და ფბ – ზე კიბერშეტევაში ეჭვმიტანილი თავად პრეზიდენტია”-წერს ხაბეიშვილი საკუთარ ფეისბუქგვერდზე.

შეგახსენებთ, რომ სალომე ზურაბიშვილი სოციალურ ქსელებში დაშვებული შეცდომების გამო სკანდალში გაეხვა.საქართველოს პრეზიდენტის ადმინისტრაცია სალომე ზურაბიშვილის „ტვიტერის“ გვერდზე შესაძლო კიბერთავდასხმის ფაქტს განიხილავს. ამასთან დაკავშირებით მოკვლევა შსს-მ დაიწყო. შესაძლოა, სალომე ზურაბიშვილის ოფიციალურ  გვერდებზე დაშვებული შეცდომების გამო სისხლის სამართლის საქმეზე გამოძიება კიბერდანაშაულის მიმართულებით დაიწყოს.

საქართველოს პრეზიდენტ სალომე ზურაბიშვილის „ტვიტერის“ ოფიციალურ გვერდზე აშშ-ის პრეზიდენტის პოსტი გაზიარდა, სადაც ტრამპი პრეზიდენტობის დემოკრატ კანდიდატ ჯო ბაიდენს „მძინარას“ უწოდებს. საქართველოს პრეზიდენტის გვერდიდან აღნიშნული პოსტი გარკვეული პერიოდის შემდეგ წაიშალა.

ადმინისტრაციის განმარტების პარალელურად, ზურაბიშვილის ოფიციალურ გვერდზე კიდევ ერთი უხერხული შეცდომა გამოჩნდა.ზურაბიშვილმა ერთ-ერთი ფეისბუქგვერდის – “​ხელოვნება და ისტორიკოსების” პოსტი გააზიარა, სადაც ქართველი მხატვრის ფელიქს ვარლამიშვილის ნამუშევრებია გამოქვეყნებული.

პრეზიდენტის გვერდზე ეწერა რომ “ვარლამიშვილს რუს ემიგრანტად ასაღებენ”. თუმცა პოსტში განმარტებული იყო, რომ ნამუშევრების ავტორი ქართველი მხატვარი იყო.

28 აპრილს, აღდგომის დღესასწაულზე, ლანჩხუთის მუნიციპალიტეტის სოფელ ნიგოითში 25 წლის მამაკაცი საკუთარ ეზოში ჩამომხრჩვალი იპოვეს.

„გურიის მოამბის“ ინფორმაციით, გარდაცვლილმა ნ.კ-მ თავი ბათუმში მომხდარი ავტოსაგზაო შემთხვევის შემდეგ მოიკლა,რომელშიც მისი ბრალეულობა იკვეთებოდა.

გამოძიება სისხლის სამართლის კოდექსის 115-ე მუხლით მიმდინარეობს, რაც თვითმკვლელობამდე მიყვანას გულისხმობს.

29 აპრილს, საბაჟო გამშვებ პუნქტში ,,ქუთაისის აეროპორტი“, ფინანსთა სამინისტროს შემოსავლების სამსახურის მებაჟე ოფიცრებმა, ეჭვის საფუძველზე, საქართველოს მოქალაქე ი.მ-ს კუთვნილი ხელბარგის დათვალიერების შედეგად, ფსიქოტროპული ნივთიერების შემცველი მედიკამენტი (Lyrica – 56 აბი) გამოავლინეს.

შინაფან საქმეთა სამინისტროში გამოძიება ფსიქოტროპული ნივთიერების უკანონო შეძენა-შენახვის ფაქტზე მიმდინარეობს, სსკ-ს 261-ე მუხლის 1 -ლი ნაწილით.

პანკისის სახალხო კრება  საქართველოს ხელისუფლებას, საზოგადოებას, დიპლომატიურ კორპუსსა და საზოგადოებრივ ორგანიზაციებს მიმართავს, მონაწილეობა მიიღონ პანკისის ხეობაში 21 აპრილს შექმნილი კრიზისის დაძლევაში. კრების წევრები მწუხარებას გამოთქვამენ სოფელ ძიბახევში განვითარებული პროცესების გამო.

“რაოდენ დიდი კრიტიკაც არ უნდა გვქონდეს 21აპრილის წინარე პოლიტიკურ პროცესებთან დაკავშირებით, რომელიც ჩვენს ხეობაში ჰესების კასკადის მშენებლობის საკითხს და მასთან დაკავშირებულ პოლიციის გაუმართლებელ ქმედებებს შეეხება,ჩვენ ცალსახად მიუღებლად და დაუშვებლად მივიჩნევთ მოსახლეობის მხრიდან პროტესტის ძალადობრივი ფორმების გამოყენებას და როგორც ჩვენი ქვეყნის ერთგულ შვილებს ღრმად გვჯერა, რომ თითოეული მოქალაქის უმთავრეს საზრუნავს ჩვენი ქვეყნის უსაფრთხოების დაცვა წარმოადგენს.

ჩვენი ქვეყანა რთულ გეოპოლიტიკურ რეალობაში არსებობს და შიდა პოლიტიკური და სოციალური პროცესები ხშირად ექცევა ქვეყნის მტრების ყურადღების და ინტერესის ქვეშ.

შესაბამისად, ვაცნობიერებთ რა იმას, რომ 21 აპრილს განვითარებულმა მოვლენებმა გარკვეულწილად შეიძლება რისკები შეუქმნას ჩვენი ქვეყნის უსაფრთხოების საკითხს, ვგრძნობთ მაღალ მოქალაქეობრივ პასუხისმგებლობას და გამოვხატავთ მზაობას ჩვენი შესაძლებლობების ფარგლებში ვიღონოთ ყველაფერი, რათა აღარ დავუშვათ მსგავსი ქმედებების განმეორება პანკისის ხეობაში და პროცესების შემდგომი ესკალაცია.

თავის მხრივ, სახალხო კრების თავდაპირველი შეკრების მიზანი იყო სწორედ ჰესების მშენებლობის წინააღმდეგ ხეობაში არსებული სახალხო პროტესტის დარეგულირება და ასევე პროტესტის მშვიდობიანი ფორმით გამოხატვის უზრუნველყოფის მცდელობა. თუმცა, სამწუხაროდ ჰესების მშენებლობის საკითხზე მიმდინარე მოლაპარაკებების დასრულების გარეშე, სრულიად მოულოდნელად დაიწყო მასშტაბური საპოლიციო ღონისძიება ხეობაში, რაც მოვლენების სპონტანურად განვითარებისა და ადგილობრივების ჭარბი უკმაყოფილების მიზეზი გახდა.

ამ უკმაყოფილების და შელახული ნდობის საფუძველს კი წლების განმავლობაში ჩვენს ხეობაში სოციალურ კონტროლსა და დასჯაზე ორიენტირებული პოლიტიკა ქმნიდა. ადგილობრივ მოსახლეობასთან დემოკრატიულ კომუნიკაციას მოკლებული გადაწყვეტილებების გამო მივიღეთ არასასურველი შედეგი, რომელიც ჩვენი ქვეყნის არც ერთი მოქალაქის ინტერესებში არ შედის.
ამავე დროს, ჩვენ მნიშვნელოვნად მივიჩნევთ საქართველოს შინაგან საქმეთა მინისტრის, გიორგი გახარიას მიერ პროცესის დეესკალაციისთვის მიღებულ მყისიერ გადაწყვეტილებას.

ჩვენი შეფასებით, ეს იყო გონიერი და სახელმწიფოებრივ ინტერესებზე დაფუძნებული ქმედება და არც ერთ შემთხვევაში არ შეიძლება განხილულ იქნას, როგორც ხეობაში მართლწესრიგის დასუსტების ნაბიჯი. ასევე, გვჯერა რომ ხელისუფლება გააგრძელებს გონიერ პოლიტიკას ხეობაში და არ დაუშვებს პროცესების შემდგომ გამწვავებას.

ზემოთ აღნიშნულის გათვალისწინებით, მივმართავთ საქართველოს პარლამენტისა და მთავრობის წევრებს, მათ შორის, შინაგან საქმეთა მინისტრს და შერიგებისა და სამოქალაქო თანასწორობის საკითხებში სახელმწიფო მინისტრს დროულად შეგვხდეს ადგილობრივ მოსახლეობას და ერთად ვიმუშავოთ შექმნილი სირთულეების დაძლევის და თანამშრობლობის ახალი ეტაპის დასაწყებად, რომელიც მიღებული გადაწყვეტილებების და შეცდომების ორმხრივ თვითკრიტიკას დაეფუძნება.

ჩვენ ვითხოვთ ხეობაში სამართლიანი და დემოკრატიული პოლიტიკის გატარებას და გვესმის, რომ ამგვარი პოლიტიკის გატარება შეუძლებელია ხელისუფლების და ადგილობრივი საზოგადოების თანამშრომლობის და დემოკრატიული კომუნიკაციის გარეშე.” -ნათქვამია ერთობლივ განცხადებაში.

სამხედრო მოსამსახურეებისთვის  მახათას მთაზე ბინების მშენებლობა დაიწყება. ამის შესახებ პრემიერ-მინისტრმა მამუკა ბახტაძემ  განაცხადა. ბახტაძემ სამხედროებს  პროფესიული დღე მიულოცა და ახალი ინიციატივა გააჟღერა.

პრემიერ მინისტრის თქმით,  საცხოვრებელ ფართებს მაღალი რანგის ოფიცრები და სერჟანტები მიიღებენ.ინიციატივის მიხედვით, ბინის საფასურის 40 პროცენტს სახელმწიფო დაფარავს.

“დღეს ჩვენ ვიწყებთ მშენებლობას ახალი უბნის ჩვენი სამხედროებისა და მათი ოჯახებისთვის. ეს არის ძალიან მნიშვნელოვანი, ემოციური პროექტი პირადად ჩემთვის.

მე განსაკუთრებული სიამაყით მინდა აღვნიშნო, ის რომ უკვე 700-მდე სამხედრო მოსამსახურემ გამოთქვა სურვილი და გაწევრიანდება იმ ამხანაგობაში, რომელშიც ჩვენ ყველა ერთად აქ ავაშენებთ ამ ახალ უბანს ჩვენი სამხედროებისა და მათი ოჯახის წევრებისთვის. ეს არის მხოლოდ პირველი ნაბიჯი, ამას მოჰყვება კიდევ ბევრი სხვა” – განაცხადა  ბახტაძემ.

ოკუპირებული გალის რაიონის სოფელ თაგილონში ე.წ. საზღვრის უკანონოდ კვეთისთვის 1986 წელს დაბადებული ზაზა შარია დააკავეს. ინფორმაციას საოკუპაციო რეჟიმი ავრცელებს.

ოკუპირებული აფხაზეთის ე. წ. შსს-ის ინფორმაციით,  ზაზა შარია 2013 წელს გალის პროკურატურამ ყაჩაღობაში ეჭვმიტანილად გამოაცხადა.

მათი ინფორმაციით, შარიას თოფურიების ოჯახზე ყაჩაღური თავდასხმის ბრალდებით 2014 წელსაც ეძებდნენ.

ოკუპანტების მიერ საქართველოს მოქალაქის დაკავების შესახებ ინფორმაციას საქართველოს სახელმწიფო უსაფრთხოების სამსახურშიც ადასტურებენ.

“ტონა ტუალეტის ქაღალდს ნუ იყიდით, ბავშვებს აჭამეთ საჭმელი”-ინაშვილი ახალი ინიციატივით გამოდის. “პატრიოტთა ალიანსის” ლიდერის ინიციატივით, საჯარო სკოლებში ბავშვთა კვება უფასო უნდა გახდეს .

ინაშვილი აცხადებს რომ  ხელისუფლების ერთ-ერთი გამოწვევა ბავშვთა სიღარიბეა, რომელიც ქმედითი ნაბიჯებით უნდა დაძლიონ.

“ჩვენ ვნახეთ, რომ სკოლებში ე.წ. ნისიების რვეული არსებობს. ბავშვები ნისიად იღებენ სკოლებში ფუნთუშას, ხაჭაპურს, შემდეგ ვერც ახერხებენ მათი მშობლები ამ ვალის გადახდას, ეს კატასტროფაა, დიდი ტრაგედიაა. ეს არის საქართველოს პარლამენტის თითოეული წევრის სირცხვილი, საქართველოს მთავრობის სირცხვილი. დღეს მინდა შემოვიდე ინიციატივით, რომ საჯარო სკოლებში ბავშვთა კვება გახდეს უფასო, ჩვენ გვაქვს ამის საშუალება. საქართველოს ბიუჯეტში არის იმის საშუალება, რომ გამოიძებნოს სახსრები. მზად ვართ ხელისუფლების ეკონომიკურ გუნდთან ერთად ვიმუშაოთ ამ საკითხთან დაკავშირებით, რადგან არ არსებობს უფრო მნიშვნელოვანი თემა, ვიდრე ბავშვთა შიმშილის დაძლევაა. დარწმუნებული ვარ, რომ ბავშვებისგან საქართველოს მასშტაბით მარტო მე არ ვიღებ გზავნილებს – მშია. 146 ათასი ბავშვი ხელისუფლებისგან 50 ლარიან დახმარებას იღებს. ეს რომ გამოვიანგარიშოთ დღეში 2 ლარიც არ არის.

თქვენს ან მინისტრების შვილებს სკოლებში 2 ლარი ჰყოფნის? როგორ შეიძლება დღეში 2 ლარი ჩვენი თანამოქალაქეების შვილებს ეყოთ?”, – აღნიშნა ირმა ინაშვილმა პარლამენტის პლენარულ სხდომაზე სიტყვით გამოსვლისას.