Blog

სანქციები ბიძინა ივანიშვილს, მის გარემოცვასა და პროპაგანდისტულ მედიებს, პოლიტპატიმრების გათავისუფლების მოთხოვნა  და ვიზალიბერალიზაციის შეჩერების საფრთხე მთელი მოსახლებისთვის –  ევროპარლამენტის საგარეო საქმეთა კომიტეტმა 53 ხმით, 14-ის წინააღმდეგ, მიიღო რიგით მეორე კრიტიკული ანგარიში საქართველოს, როგორც კანდიდატი ქვეყნის შესახებ. ანგარიში 2025 წელს მიმოიხილავს.

დოკუმენტში, სხვა საკითხებთან ერთად, დაგმობილია დემოკრატიული უკუსვლა და „ქართული ოცნების“ ავტორიტარიზმისკენ სვლა, რეპრესიული კანონების მიღება და პოლიტიკოსების და მოქალაქეების დაპატიმრება. ასევე ნათქვამია, რომ საქართველო კვლავ არ უერთდება რუსეთის, ბელარუსისა და ირანის წინააღმდეგ დაწესებული სანქციების აბსოლუტურ უმრავლესობას. ანგარიშით ევროპარლამენტარები მოუწოდებენ ევროკავშირის ყველა ქვეყანას, მიიღონ კოორდინირებული შემზღუდავი ზომები ყველა პასუხისმგებელი პოლიტიკოსის, ოფიციალური პირისა და ხელშემწყობის წინააღმდეგ. დოკუმენტის მიხედვით ეს მოიცავს სანქციების სიების გაფართოებას, აქტივების ყოვლისმომცველ გაყინვას და სავიზო აკრძალვებს მათთვის, ვინც პასუხისმგებელია სახელმწიფოს მიტაცებაზე, რეპრესიებსა და რეჟიმის მიერ დაფინანსებულ პროპაგანდაზე. ანგარიში მოითხოვს დაუყოვნებლივი და მიზანმიმართული პერსონალური სანქციების დაწესებას ბიძინა ივანიშვილის, მისი ოჯახის წევრებისა და კომპანიების წინააღმდეგ.

“ევროპარლამენტარები მოუწოდებენ ევროკავშირის ყველა ქვეყანას, მიიღოს კოორდინირებული, ევროკავშირის მასშტაბის შეზღუდვითი ღონისძიებები ყველა პასუხისმგებელი პოლიტიკოსის, მაღალჩინოსნისა და ხელშემწყობის წინააღმდეგ — სანქციების სიების გაფართოების, სახელმწიფოს მიტაცებაში, რეპრესიებსა და რეჟიმის მიერ დაფინანსებულ პროპაგანდაში პასუხისმგებელ პირთა ქონების სრული გაყინვისა და სავიზო შეზღუდვების ჩათვლით. ევროპარლამენტარები დაჟინებით მოუწოდებენ ევროკავშირს, დაუყოვნებლივ დააწესოს პირადი, მიზანმიმართული სანქციები „ქართული ოცნების“ დამფუძნებლის და ყოფილი პრემიერ-მინისტრის, ბიძინა ივანიშვილის, მისი ოჯახის წევრებისა და მისი კომპანიების წინააღმდეგ, ხოლო ევროკავშირს მოუწოდებენ, გაყინოს მისი აქტივები და ითანამშრომლოს სხვა იურისდიქციებთან, კერძოდ, გაერთიანებულ სამეფოსთან და შეერთებულ შტატებთან. ანგარიშში ნათქვამია, რომ იმ შემთხვევაში, თუ ევროპულ საბჭოში ამ საკითხში ერთსულოვნება ვერ იქნება მიღწეული, წევრმა სახელმწიფოებმა გამოიკვლიონ სხვა კოლექტიური მექანიზმები ეფექტიანი და ერთიანი ევროკავშირის პასუხის უზრუნველსაყოფად.“–წერია ანგარიშში.

ანგარიშში ნათქვამია, რომ საქართველოში დემოკრატიული უკუსვლის სერიოზული გაგრძელების ფონზე, ევროპარლამენტარები სინანულით აღნიშნავენ, რომ „ქართულმა ოცნებამ“ არანაირი ნაბიჯი არ გადადგა ნეგატიური ტენდენციების უკუქცევისთვის. დოკუმენტში ხაზგასმულია, რომ ევროკავშირის და წევრი სახელმწიფოების ქართულ ხელისუფლებასთან ჩართულობა მკაცრად უნდა იყოს დამოკიდებული იმაზე, გადადგამს თუ არა ხელისუფლება ხელშესახებ და გადამოწმებად ნაბიჯებს – დემოკრატიული რეგრესის, რეპრესიების და რუსული სტილის ანტიევროკავშირული დეზინფორმაციის შეჩერების მიმართულებით. როგორც ანგარიშში წერია,  დოკუმენტი გამოხატავს სრულ სოლიდარობას ქართველი ხალხის მიმართ, რომელიც კვლავ მიისწრაფის ევროპული და დემოკრატიული საქართველოსთვის. ამასთანავე, მოხსენება ინარჩუნებს ევროპარლამენტის წინა პოზიციას საქართველოს პარლამენტის და მის მიერ დანიშნული პრეზიდენტის ლეგიტიმურობის არაღიარების შესახებ.

ფრაგმენტი ანგარიშიდან  საქართველოს შესახებ

ევროპარლამენტარები, რომლებიც დიდი ხანია, 2024 წლის ოქტომბრის საქართველოს საპარლამენტო არჩევნებს გაყალბებულად მიიჩნევენ, გმობენ „ქართული ოცნების“ მიერ სრული ავტოკრატიისკენ გააქტიურებულ სვლას. ეს მოიცავს: დაუსჯელობის სისტემის შექმნას პოლიტიკური რეპრესიებისთვის პასუხისმგებელი მაღალჩინოსნებისა და ინსტიტუტებისთვის; ჟურნალისტებისა და ადამიანის უფლებადამცველების შევიწროებას; ოპოზიციური ფიგურების დევნას; ოპოზიციური ხმების, დამოუკიდებელი მედიის და სამოქალაქო საზოგადოების წინააღმდეგ მიმართული შემზღუდველი კანონმდებლობის მიღებას; ოპოზიციური პარტიების აკრძალვის მცდელობებს და პლურალისტური საარჩევნო გარემოს განადგურებას; საგანმანათლებლო დაწესებულებებზე ცენტრალიზებული კონტროლის დამყარებას; ასევე, სამართალდამცველთა მხრიდან მომიტინგეებზე, დაკავებულებსა და პოლიტიკურ პატიმრებად მიჩნეული პირების მიმართ ძალის გადაჭარბებული გამოყენების, წამებისა და არაადამიანური მოპყრობის ბრალდებებს

ანგარიშში ასევე არის მოწოდება, „ქართულმა ოცნებამ“ გაათავისუფლოს პოლიტიკური ნიშნით დაპატიმრებული ადამიანები და აღნიშნავს, რომ ასეთი პატიმრების არსებობა შეუთავსებელია ქვეყნის ვალდებულებებთან ევროკავშირთან ასოცირების შეთანხმების ფარგლებში. დოკუმენტის თანახმად  „ქართულმა ოცნებამ“ არა მხოლოდ შეაჩერა, არამედ ფაქტობრივად შეცვალა საქართველოს ევროპული ინტეგრაციის კურსი. როგორც ანგარიშშია ხაზგასმული საქართველოს ხელისუფლების მხრიდან უმოქმედობის გაგრძელებამ შეიძლება გამოიწვიოს მთელი მოსახლეობისთვის უვიზო მიმოსვლის შეჩერება, რაზეც „ქართული ოცნება“ სრულად იქნება პასუხისმგებელი.

“ევროპარლამენტი აღნიშნავს კომისიის წინადადებას, შეაჩეროს უვიზო მიმოსვლა ქართული დიპლომატიური, სამსახურებრივი და ოფიციალური პასპორტების მფლობელებისთვის ევროკავშირის ყველა წევრ სახელმწიფოში, როგორც „ქართული ოცნების“ რეჟიმის მიერ ფუნდამენტური ღირებულებების დარღვევის პირდაპირი შედეგი; წუხს, რომ დემოკრატიულ უკუსვლასა და რეპრესიებზე პასუხისმგებელი ქართველი თანამდებობის პირებისთვის ევროკავშირის მასშტაბით ვიზების აკრძალვა შეუძლებელი გახდა უნგრეთისა და სლოვაკეთის წინააღმდეგობის გამო; აფრთხილებს, რომ საქართველოს ხელისუფლების მხრიდან უმოქმედობის გაგრძელებამ შეიძლება გამოიწვიოს მთელი მოსახლეობისთვის უვიზო მიმოსვლის შეჩერება, რაზეც სრულად პასუხისმგებელი „ქართული ოცნება“ იქნება.“– ნათქვამია ანგარიშში

ყოველწლიური ანგარიში, რომელზეც ევროპარლამენტში მუშაობა მიმდინარეობს, წარმოადგენს ევროპარლამენტის პასუხს ევროკომისიის გაფართოების ანგარიშებზე კანდიდატი და პოტენციური კანდიდატი სახელმწიფოების შესახებ. ამ შემთხვევაში ევროპარლამენტი აფასებს საქართველოს პროგრესს კომისიის 2025 წლის ანგარიშის საფუძველზე და მიიღებს რეზოლუციას, რომელიც წარმოადგენს პარლამენტის ოფიციალურ პოზიციას საქართველოს შესახებ. საკითხზე მომხსენებელია ლიეტუველი ევროპარლამენტარი „ევროპის სახალხო პარტიიდან“ რასა იუკნევიჩიენე. კომიტეტის სხდომაზე მან  განაცხადა,რომ , „ქათულმა ოცნებამ” ყველაფერი გააკეთა განსხვავებული პოლიტიკური შეხედულების ადამიანების დასარწმუნებლად, რომ ქვეყანაში არსებული ვითარება არ აკმაყოფილებს ევროკავშირის კანდიდატობის კრიტერიუმებს.

ევროპარლამენტარი რასა იუკნევიჩიენე ამბობს:

“მინდა მადლობა გადავუხადო ყველა მომხსენებელს ამ დოკუმენტის მომზადებაში მათი წარმოუდგენელი ერთიანობისთვის. როგორც ჩანს, საქართველოს ამჟამინდელმა მთავრობამ ყველაფერი გააკეთა იმისათვის, რომ დაერწმუნებინა სრულიად განსხვავებული პოლიტიკური შეხედულების მქონე ადამიანები, პოლიტიკური ჯგუფები, პროევროპული პოლიტიკური ჯგუფები, რომ ქვეყანაში არსებული ვითარება არ აკმაყოფილებს ევროკავშირის კანდიდატობის არცერთ კრიტერიუმს. მეორეს მხრივ, ჩვენ ამ ანგარიშს ერევანში სპეციალური ფორუმის ფონზე ვიღებთ. ვფიქრობ, ყოველი პროდასავლურად განწყობილი ქართველი ბედნიერია, რომ სამხრეთ კავკასიაში ევროკავშირის პერსპექტივა ცოცხალია, თუმცა მესმის მათი – ქართველების – იმედგაცრუება, რომ თბილისი ამის მიღმა დარჩა. ამ ეტაპზე მე მჯერა საქართველოსა და ქართველი ხალხის ევროპული პერსპექტივის.“

ანგარიშის პირვანდელ ვერსიას თან ერთვის ათობით შესწორების პროექტი, რომელთა უმეტესობაც ასევე კრიტიკულია ხელისუფლებისადმი, თუმცა ნაწილი მხარს უჭერს „ქართული ოცნების“ მთავრობას. მათ უმეტესობას კომიტეტმა მხარი დაუჭირა. ევროპარლამენტარების, რასა იუკნევიჩიენესა და მირიამ ლექსმანის შესწორების თანახმად, ევროპარლამენტი გმობს „იმედისა“ და „პოსტივის“ მიერ „ევროკავშირის წინააღმდეგ სისტემური დეზინფორმაციისა და მტრული პროპაგანდის გავრცელებას და იწონებს ბრიტანეთის გადაწყვეტილებას, დაეწესებინა ფინანსური სანქციები ამ ორი მაუწყებლისთვის. შესწორების კიდევ ერთ პროექტში, „იმედთან“ და „პოსტივისთან“ ერთად ნახსენებია „რუსთავი 2“,  სამივე ტელეარხი მოხსენიებულია, როგორც „ქართული ოცნების” რეჟიმის დე ფაქტო კომუნიკაციების დეპარტამენტი. ევროპარლამენტარები ასევე ითხოვენ საქართველოს საზოგადოებრივი მაუწყებლისა და კომუნიკაციების ეროვნული კომისიის ხელმძღვანელი პირების სანქცირებას. ანგარიში, რომელსაც საგარეო კომიტეტმა მხარი დღეს  დაუჭირა, პლენარულ სესიაზე კენჭისყრაზე ივნისში გავა.

გერმანიის ქალაქ ლაიფციგის ცენტრში ავტომობილი ხალხის მასაში შევარდა. პოლიციის მონაცემებით, დაიღუპა ორი ადამიანი, რამდენიმე კი მძიმედ დაშავდა.

ლაიფციგის მერმა ბურკჰარდ იუნგმა განაცხადა, რომ ეჭვმიტანილი დაკავებულია. მისივე თქმით, დანაშაულის მოტივი ჯერ უცნობია, ხოლო შემთხვევის ადგილის მიმდებარე ტერიტორია გადაკეტილია.

„ეს შოკისმომგვრელია. ამ წუთას ერთადერთი, რაც შემიძლია, არის სოლიდარობა გამოვუცხადო დაღუპულთა ოჯახებს“, — უთხრა იუნგმა ჟურნალისტებს შემთხვევის ადგილზე. „ყველა დანარჩენი დეტალი პოლიციისა და საგამოძიებო ორგანოების მუშაობის შედეგად უნდა დადგინდეს“.

პოლიციის ცნობით, დაკავებული 33 წლის გერმანიის მოქალაქე მამაკაცია.

საქსონიის პრემიერ-მინისტრმა მიხაელ კრეჩმერმა განაცხადა, რომ ეჭვმიტანილს შესაძლოა ფსიქიკური ჯანმრთელობის პრობლემები ჰქონოდა.

„ეს სულის სიღრმემდე მზარავს“, — დაწერა მან X-ზე გამოქვეყნებულ პოსტში. „მსგავსი ქმედება სიტყვებს გვაკარგვინებს და გვაიძულებს, მტკიცედ ვიმოქმედოთ. ყველაფერს გავაკეთებთ, რომ ეს შემთხვევა სწრაფად და საფუძვლიანად იქნას გამოძიებული. კანონის უზენაესობა მთელი ძალით იმოქმედებს“.

ლაიფციგის სახანძრო სამსახურის უფროსმა აქსელ შუხმა განაცხადა, რომ დაშავდა 22 ადამიანი, მათგან ორი — მძიმედ. მისი თქმით, შემთხვევის ადგილზე იმყოფება დაახლოებით 40 მეხანძრე და 40 პარამედიკოსი, ასევე ორი ვერტმფრენი.

თვითმხილველების თქმით, Volkswagen-ის ჯიპმა, რომელშიც ერთი ადამიანი იმყოფებოდა, მაღალი სიჩქარით გაიარა ქვეითთა ზონაში.

პოლიციამ დაადასტურა, რომ ქალაქის ცენტრში, გრიმაიშე-შტრასეზე, ავტომობილი რამდენიმე ადამიანს დაეჯახა, რის შემდეგაც შემთხვევის ადგილიდან მიიმალა.

მოგვიანებით მძღოლი დააკავეს და, პოლიციის განცხადებით, „ამჟამად ის საფრთხეს აღარ წარმოადგენს“.

ბოლო წლებში გერმანიაში, ისევე როგორც ევროპის სხვა ქვეყნებში, ხალხის დიდ მასებში ავტომობილით შევარდნის არაერთი შემთხვევა მოხდა. მათი ნაწილი რელიგიური ან პოლიტიკური მოტივებით იყო განპირობებული, ნაწილი კი ფსიქიკური პრობლემების მქონე ადამიანებმა ჩაიდინეს.

2025 წლის თებერვალში მძღოლმა, რომელიც მიუნხენში ქუჩაზე ხალხის კოლონაში შევარდა, ქალი და მისი ქალიშვილი მოკლა და დაახლოებით 30 ადამიანი დაჭრა. 2024 წლის დეკემბერში, აღმოსავლეთ გერმანიის ქალაქ მაგდებურგში, საშობაო ბაზრობის სტუმრებზე ავტომობილის შევარდნის შედეგად სულ მცირე ექვსი ადამიანი დაიღუპა და ასობით დაშავდა. 2016 წელს კი ბერლინში 13 ადამიანი დაიღუპა მას შემდეგ, რაც სატვირთო ავტომობილი ქალაქის ცენტრში საშობაო ბაზრობაზე შეკრებილ ხალხში შევარდა.

სომხეთის პრემიერ-მინისტრმა, ნიკოლ ფაშინიანმა და დიდი ბრიტანეთის პრემიერმა, კირ სტარმერმა ქვეყნებს შორის სტრატეგიული პარტნიორობის შესახებ დეკლარაციას მოაწერეს ხელი.

„დღევანდელი ერთობლივი დეკლარაციით სომხეთსა და გაერთიანებულ სამეფოს შორის სტრატეგიული პარტნიორობის შესახებ, ჩვენ ვხსნით ახალ და პერსპექტიულ თავს სომხეთ-ბრიტანეთის ურთიერთობებში“, – დაწერა ნიკოლ ფაშინიანმა X-ზე.

With today’s Joint Declaration with @Keir_Starmer on a Strategic Partnership between Armenia & the UnitedKingdom, we open a new & promising chapter in 🇦🇲 🇬🇧 relations built on shared values & strengthened cooperation. pic.twitter.com/3hRLzQVyrA

— Nikol Pashinyan (@NikolPashinyan) May 4, 2026