“ადგილზე გვეყოლება უიტკოფი, კუშნერი. შესაძლოა, ვიცე-პრეზიდენტი ჯეი დი ვენსიც, არ ვიცი. ეს უსაფრთხოების საკითხია,” – განაცხადა ტრამპმა.
ტრამპმა აღნიშნა, რომ ირანის წარმომადგენლების პირისპირ მოლაპარაკებები “ძალიან მალე” გაიმართება.
Category: ახალი ამბები
-
მივესალმებით განცხადებას აშშ-სა და ირანს შორის ცეცხლის შეწყვეტის შესახებ – კობახიძე
„საქართველო მიესალმება განცხადებას ამერიკის შეერთებულ შტატებსა და ირანის ისლამურ რესპუბლიკას შორის ცეცხლის შეწყვეტის შესახებ და დადებითად აფასებს ეფექტიანი მედიაციის ძალისხმევას, რომელმაც ეს შესაძლებელი გახადა. ვიმედოვნებთ, რომ ეს ნაბიჯი ხელს შეუწყობს დეესკალაციას და წაახალისებს დიპლომატიური ჩართულობის გაგრძელებას, რეგიონში ხანგრძლივი მშვიდობის და სტაბილურობის უზრუნველსაყოფად”,
ამის შესახებ “ქართული ოცნების” პრემიერ-მინისტრი ირაკლი კობახიძე სოციალურ ქსელ X-ში წერს.
-
ყველამ კარგად იცის, რა ხდებოდა საქართველოში 2003-2012 წლებში – მათიკაშვილი ადეიშვილზე
„ჩვენ ცალსახად შეგვიძლია ვთქვათ, რომ ეს საერთოდ ყოველგვარი მორალური სტანდარტიდან არის ამოვარდნილი. ქართველმა ხალხმა პირადად ამ ადამიანისგან, ზურაბ ადეიშვილისგან წლების განმავლობაში განიცადა უამრავი ტანჯვა, მიიღო ზღვა ცინიზმი და ცინიკური დანაშაულები. სააკაშვილის ხელისუფლების პირობებში, მისგან და სააკაშვილისგან იყო შექმნილი სადისტური წამების რეჟიმი, მისგან და სააკაშვილისგან იყო შექმნილი მოცემულობა, როდესაც ადამიანის უფლებები საერთოდ არაფერს ნიშნავდა ჩვენს ქვეყანაში, ქუჩებში ახალგაზრდებს ხოცავდნენ, ციხეში პატიმრებს აწამებდნენ და აუპატიურებდნენ, ბიზნესს და მესაკუთრეებს ართმევდნენ ქონებას. ამ ადამიანს, ასე ცინიკურად, ჩვენი ხალხის და ჩვენი სახელმწიფოს მიმართ ყოველგვარი პატივისცემის გამოხატვის გარეშე, ჯერ იყო და დაატარებდნენ ბრიუსელის, თუ ევროპის სხვა დედაქალაქების ადმინისტრაციულ შენობებში და ახლა ის უკრაინის კონკრეტული თანამდებობის პირი გახდა, ინტერპოლის შეფად დაინიშნა, თუ არ ვცდები. ცინიკურ-სასაცილო არ არის?! ადამიანი, რომლის მიმართაც უნდა იყოს ისეთივე მიდგომა – სამართლიანი, როგორიც საქართველოშია, უნდა იყოს მთელ მსოფლიოში. არ შეიძლება არსებობდეს ცხრაგვარი სტანდარტი და 16 სიმართლე. არსებობს ერთი სიმართლე და ეს იცის აბსოლუტურად ყველამ, ვინც ოდნავ მაინც არის დაინტერესებული, თუ რა ხდებოდა საქართველოში 2003-2012 წლებში, მაგრამ თვალებზე ხელებს იფარებენ, არ უნდა ამ ყველაფრის დანახვა უკრაინის ხელისუფლებას. რატომ?! იმიტომ რომ ეს არის იმ პოლიტიკის გაგრძელება, რასაც ზელენსკი აწარმოებს. სააკაშვილი გუბერნატორად ჰყავდათ დანიშნული, დღეს დამნაშავე პირი, მწამებელი და სადისტურ დანაშაულებში მხილებული პირი არის ინტერპოლის შეფად დანიშნული. [უკრაინის] ხელისუფლებამ ყველაფერი გააკეთა და დღესაც აკეთებს ქართულ-უკრაინული ურთიერთობის გასაფუჭებლად. ის, რა თქმა უნდა, ამას ვერ მიაღწევს, იმიტომ რომ ჩვენი მეგობარი ხალხია უკრაინელები. დააკვირდით, რა გადაწყვეტილებებს იღებს საქართველოს ხელისუფლება – უკრაინელ ლტოლვილებს შესაბამისი დახმარებები და ბენეფიტები უგრძელდებათ (ამას არავის ვაყვედრი, უბრალოდ მოცემულობაა), მიუხედავად იმისა, რომ პირადად ზელენსკის მხრიდან და ზელენსკის ხელისუფლების მხრიდან ხდება გაუგონარი თავდასხმა იმ ურთიერთობებზე, რომელიც ჩვენ ორ ქვეყანას შორის არსებობს“
ამის შესახებ “ქართული ოცნების”” პარლამენტის საპროცედურო საკითხთა და წესების კომიტეტის თავმჯდომარემ, დავით მათიკაშვილმა განაცხადა, რითაც საქართველოს ყოფილი გენერალური პროკურორის და იუსტიციის ყოფილი მინისტრის, ზურაბ ადეიშვილის უკრაინის ეროვნული პოლიციის საერთაშორისო საპოლიციო თანამშრომლობის დეპარტამენტის დირექტორად დანიშვნას გამოეხმაურა.
-
ცოფის შემთხვევის დაფიქსირების გამო, წალკაში კარანტინი გამოცხადდა
სოფლის მეურნეობის სახელმწიფო ლაბორატორიამ წალკის მუნიციპალიტეტში გარეული ცხოველის მელიის პათოლოგიურ მასალაში ცოფის შემთხვევა დაადასტურა. დაინფიცირებულ პუნქტსა და საფრთხის შემცველ ტერიტორიაზე გამოცხადდა კარანტინი. „მიმდინარე წლის 6 აპრილს სოფლის მეურნეობის სახელმწიფო ლაბორატორიამ წალკის მუნიციპალიტეტში (მისამართი: ქ. წალკა, თამარ მეფის ქუჩა #132-ის მიმდებარე ტერიტორია) გარეული ცხოველის (მელა) პათოლოგიურ მასალაში ცოფის შემთხვევა დაადასტურა.
სურსათის ეროვნული სააგენტოს ქვემო ქართლის დეპარტამენტის ინსპექტორის მოკვლევით დადგინდა, რომ ცოფით დაავადებული მელა ოთხმა უპატრონო ძაღლმა დაგლიჯა.
დაავადების გავრცელების ლოკალიზაცია-ლიკვიდაციის მიზნით, ქვემო ქართლის სახელმწიფო რწმუნებულის განკარგულებით, დაინფიცირებულ პუნქტსა და საფრთხის შემცველ ტერიტორიაზე გამოცხადდა კარანტინი და დაიწყო საკარანტინო ღონისძიებები – ინფექციის კერის დეზინფექცია, დაავადების ამთვისებელი ცხოველების ვაქცინაცია, ცხოველთა გადაადგილებაზე ზედამხედველობა, ცოფით დაინფიცირებაზე საეჭვო ცხოველების იზოლირება და თავშესაფარში გადაყვანა.
მიმდინარე წელს, მთელი ქვეყნის მასშტაბით, ლაბორატორიულად დადასტურებულია ცოფის სამი შემთხვევა.
სურსათის ეროვნული სააგენტო ყოველწლიურად ატარებს ცოფის საწინააღმდეგო უფასო ვაქცინაციას და 300 ათასამდე შინაურ ბინადარ ცხოველს (ძაღლი, კატა) ცრის.
ცოფის პრევენციისა და საფრთხის თავიდან აცილების მიზნით, სააგენტო მოუწოდებს მოსახლეობას, ყოველწლიურად აცრან საკუთარი შინაური ბინადარი ცხოველები (ძაღლი, კატა) ცოფის საწინააღმდეგოდ; ცოფის კონტროლის საერთაშორისო გამოცდილება და კვლევები ერთხმად ადასტურებს, რომ უპატრონო და მიკედლებული ძაღლების პოპულაციის კონტროლი და მათი ვაქცინაცია მნიშვნელოვან როლს ასრულებს დაავადების გავრცელების შემცირებასა და სრულად აღმოფხვრაში“, – ნათქვამია სურსათის ეროვნული სააგენტოს გავრცელებულ ინფორმაციაში.
-
პროკურატურამ ბურჭულაძეს, მის ყოფილ მოადგილეს და ცოლის ძმას საპროცესო არ გაუფორმა
საქართველოს გენერალურმა პროკურატურამ თავდაცვის ყოფილ მინისტრს, ჯუანშერ ბურჭულაძეს, მის ცოლისძმას, ვასილ მხეიძესა და ყოფილ მოადგილეს, გიორგი ხაინდრავას საპროცესო შეთანხმების გაფორმებაზე უარი უთხრა. დღევანდელ პროცესზე ბრალდების მხარემ სამივე მათგანის მიმართ გამამტყუნებელი განაჩენის გამოტანა მოითხოვა.
საპროცესო შეთანხმება მხოლოდ ერთ ბრალდებულთან – თავდაცვის სამინისტროს შესყიდვების დეპარტამენტის ყოფილ უფროსთან, ვლადიმერ ღუდუშაურთან გაფორმდება. პროკურორ ანი ლეკიაშვილის განმარტებით, ღუდუშაურმა გამოძიებასთან პირველივე დღეებიდან ითანამშრომლა.
დღევანდელ პროცესზე პროკურატურამ ბურჭულაძის, ხაინდრავასა და მხეიძის მიმართ გამამტყუნებელი განაჩენის გამოტანა მოითხოვა.
“ბრალდების მხარემ განიხილა საქმეში არსებული ინფორმაცია, განცხადებები, ბრალდებულების დამოკიდებულება – არსებობდა თუ არა მათი მხრიდან მზაობა, რომ გაფორმებულიყო საპროცესო შეთანხმება, მოცემულ შემთხვევაში პროკურატურამ გადაწყვეტილება მიიღო, რომ მათ შორის, თანამშრომლობიდან გამომდინარე, საპროცესო შეთანხმება გაფორმებულიყო ვლადიმერ ღუდუშაურთან. […]
ფაქტობრივად, დასკვნით სიტყვებზე ვიყავით უკვე მოსულები, როდესაც მოგვმართეს [საპროცესოს გაფორმების თხოვნით]. ბრალდების მხარემ თქვა დასკვნითი სიტყვა, რომლითაც მოითხოვა მათ მიმართ არსებითი განხილვის შედეგად, გამამტყუნებელი განაჩენის დადგენა” – განაცხადა საქმის პროკურორმა, ანი ლეკიაშვილმა.
ჯუანშერ ბურჭულაძე, რომელიც თავდაცვის უწყებას 2021-2024 წლებში ხელმძღვანელობდა, წარდგენილ ბრალს არ აღიარებს. მას 9-დან 12 წლამდე პატიმრობა ემუქრება.
-
რუსი ოკუპანტების მიერ უკანონოდ დაკავებული მოქალაქე თავისუფალია – სუს
სახელმწიფო უსაფრთხოების სამსახურის ცნობით, 2 აპრილს უკანონოდ დაკავებული საქართველოს მოქალაქე თავისუფალია და ცენტრალური ხელისუფლების მიერ კონტროლირებად ტერიტორიაზე იმყოფება.
“საქართველოს მოქალაქის უკანონო პატიმრობიდან გათავისუფლების პროცესში აქტიურად გამოიყენებოდა როგორც საქართველოში ევროკავშირის მონიტორინგის მისიის (EUMM) უშუალო ჩართულობით მოქმედი „ცხელი ხაზის“ მექანიზმი, ისე ცენტრალური ხელისუფლების ხელთ არსებული ყველა რელევანტური ინსტრუმენტი. ცენტრალური ხელისუფლება, სახელმწიფო უსაფრთხოების სამსახური განაგრძობს აქტიურ მუშაობას ოკუპირებულ ტერიტორიებზე უკანონო პატიმრობაში მყოფი საქართველოს ყველა მოქალაქის გასათავისუფლებლად”. – ნათქვამია უწყების განცხადებაში.
-
ბორჯომი-ბაკურიანის ე.წ. კუკუშკას რეაბილიტაცია ჩაუტარდება – კობახიძე
“ქართული ოცნების” პრემიერის, ირაკლი კობახიძის თქმით, ბორჯომი-ბაკურიანის მატარებელს, ე.წ. კუკუშკას, რომელიც 2020 წლიდან გაჩერებული იყო, ეაბილიტაცია ჩაუტარდება და ის მგზავრებს 2027 წლის იანვრიდან მოემსახურება.
“ბორჯომი-ბაკურიანის ისტორიული მატარებლის, ე.წ. კუკუშკას რეაბილიტაციის გადაწყვეტილება მივიღეთ. სრული რეაბილიტაცია ჩაუტარდება როგორც მატარებელს, ასევე სარკინიგზო ინფრასტრუქტურას – რეაბილიტაცია ჩაუტარდება 5 შესაბამის სარკინიგზო სადგურს. გეგმის მიხედვით, მატარებელი მგზავრებს 2027 წლის იანვრიდან მოემსახურება”. – თქვა კობახიძემ ივანიშვილის მთავრობის სხდომაზე.
-
პლასტმასის ბოთლებში სასმლის აკრძალვის რეგულაცია 4 წლით გადავადდება – კობახიძე
“როგორც მოგეხსენებათ პლასტმასის მოხმარება ზიანს აყენებს როგორც ადამიანის ჯანმრთელობას, ისე გარემოს და რამდენიმე მნიშვნელოვანი ნაბიჯი უკვე გადაიდგა პლასტმასის მოხმარების შემცირების მიმართულებით, ეს პროცესი ეტაპობრივად გაგრძელდება.
თუმცა, ამავდროულად ჩვენ უნდა გავითვალისწინოთ ამ პროცესთან დაკავშირებული გვერდითი ფაქტორები, მათ შორის არის ბიზნესის სუბიექტური ინტერესები, ასევე კონკრეტული რეგულაციის შესაძლო გავლენა სამომხმარებლო ფასებზე.
ბიზნესსექტორთან გვქონდა აქტიური კონსულტაციები და ამ კონსულტაციების შემდეგ, მივიღეთ გადაწყვეტილება პლასტმასის ბოთლებში სასმლის წარმოების, იმპორტისა და ბაზარზე განთავსების რეგულაციის ამოქმედება გადავავადოთ 4 წლით, 2031 წლის პირველ თებერვლამდე”
განაცხადა, “ქართული ოცნების” პრემიერმა, ირაკლი კობახიძემ.
-
ისრაელმა ირანში ხიდებსა და რკინიგზის მონაკვეთებს დაარტყა
ისრაელმა იერიშები მიიტანა, ირანში ხიდებსა და რკინგზის მონაკვეთებზე. ინფორმაციას ისრაელის პრემიერმინისტრი, ბენიამინ ნეთანიაჰუ ადასტურებს.
მისი განცხადებით, ირანის ისლამური რევოლუციის გუშაგთა კორპუსი ამ ინფრასტრუქტურას იარაღის დასამზადებელი პროდუქტების გადასატანად იყენებდა. მა ასევე აღნიშნა, რომ სამიზნე არა ირანის მშვიდობიანი მოსახლეობა, არამედ მათი მთავრობაა.
“ეს არ არის იგივე ირანი და არც იგივე ისრაელის. ჩვენ ძალთა ბალანსს პირველიდან მეორის სასარგებლოდ ვცვლით.” – თქვა ისრაელის პრემიერმა.
-
რეპერ კანიე უესტს ბრიტანეთში შესვლაზე უარი უთხრეს. მისი მონაწილეობით დაგეგმილი ფესტივალი გაუქმდა
დიდი ბრიტანეთის მთავრობამ უარი თქვა რეპერ კანიე უესტისთვის ქვეყანაში შესვლის ნებართვის გაცემაზე, მისი ლონდონში, ზაფხულის მუსიკალურ ფესტივალ Wireless-ზე ჰედლაინერის სტატუსით დაგეგმილი გამოსვლის გარშემო ატეხილი სკანდალის გამო. მოგვიანებით ცნობილი გახდა, რომ ფესტივალი გაუქმდა.
შინაგან საქმეთა სამინისტრომ BBC-ს აცნობა, რომ ორშაბათს რეპერმა ბრიტანეთში შესვლის განაცხადი შეიტანა ელექტრონული ავტორიზაციის სისტემის (Electronic Travel Authorisation, ETA) მეშვეობით.
განცხადებაში ნათქვამია, რომ უარის გადაწყვეტილება მიღებულ იქნა იმ საფუძვლით, რომ არტისტის ყოფნა საზოგადოებრივ კეთილდღეობას არ წაადგებოდა.
ბოლო წლებში უესტი მკაცრად გააკრიტიკეს ანტისემიტური, რასისტული და პრო-ნაცისტური განცხადებების გამო.
„ებრაული საზოგადოება ელოდება გულწრფელ სინანულსა და ცვლილებებს, სანამ დაიჯერებს, რომ Wireless-ის მთავარი სცენა ამ გულწრფელობის შესამოწმებლად შესაფერისი ადგილია,“ — განაცხადა საბჭოს ხელმძღვანელმა ფილ როზენბერგმა.
ფესტივალი Wireless უნდა გამართულიყო ლონდონის ფინსბერი პარკში 10-12 ივლისს, მისი ორგანიზატორია კომპანია Festival Republic. მას შემდეგ, რაც უესტისთვის შესვლაზე უარი გახდა ცნობილი, კომპანიამ განაცხადა, რომ წელს ფესტივალი არ ჩატარდება. ბილეთების მფლობელებს თანხა დაუბრუნდებათ.
„როგორც ყოველთვის, სანამ მოვიწვევდით, კონსულტაციები გაიმართა მრავალ მხარესთან და იმ დროს არანაირი შეშფოთება არ გამოთქმულა,“ — ნათქვამია ორგანიზატორების განცხადებაში.
„ანტისემიტიზმი ნებისმიერი ფორმით მიუღებელია, და ჩვენ ვაცნობიერებთ, რა რეალური და პირადი გავლენა მოახდინა ამ პრობლემამ. როგორც დღეს მან თქვა, სიტყვები საკმარისი არ არის, თუმცა ის მაინც იმედოვნებს, რომ მიეცემა შესაძლებლობა დაიწყოს დიალოგი ბრიტანეთის ებრაულ საზოგადოებასთან.“
ორგანიზაცია „კამპანია ანტისემიტიზმის წინააღმდეგ“-ის წარმომადგენელმა განაცხადა:
„მთავრობამ აშკარად სწორი გადაწყვეტილება მიიღო. მან დაამტკიცა, რომ ანტისემიტიზმს ბრიტანეთში ადგილი არ აქვს — არა მხოლოდ სიტყვებით, არამედ მოქმედებითაც.“„ადამიანი, რომელიც ამაყობდა იმით, რომ ათობით მილიონი დოლარი გამოიმუშავა სვასტიკიანი მაისურების გაყიდვით და სულ რამდენიმე თვის წინ გამოუშვა სიმღერა სახელწოდებით ‘Heil Hitler’, აშკარად არ ემსახურება საზოგადოებრივ კეთილდღეობას დიდ ბრიტანეთში,“ — დასძინა მან.
მანამდე, სამშაბათს, უესტმა განაცხადა, რომ მადლიერი იქნებოდა, თუ შესაძლებლობა მიეცემოდა შეხვედროდა ბრიტანეთის ებრაული საზოგადოების წარმომადგენლებს სკანდალის შემდეგ.
თავის განცხადებაში რეპერმა, რომელიც ახლა თავს Ye-ს უწოდებს, თქვა, რომ „ადევნებდა თვალს Wireless-ის გარშემო მიმდინარე დისკუსიას“ და შესთავაზა საზოგადოებას პირადად შეხვედრა „მოსასმენად“.
„ვიცი, რომ სიტყვები საკმარისი არ არის,“ — დაამატა მან. — „ცვლილებები ჩემი მოქმედებებით უნდა დავამტკიცო. თუ თქვენ მზად ხართ, მეც მზად ვარ.“
ბრიტანეთის ებრაელი დეპუტატების საბჭომ საპასუხოდ განაცხადა, რომ მზად არის შეხვდეს რეპერს იმ პირობით, თუ ის უარს იტყვის Wireless-ზე გამოსვლაზე.