Category: ახალი ამბები

დროების კონფიდენციალური წყაროს ინფორმაციით, 23 წლის  გარდაცვლილი პროგრამისტი, თამარ ბაჩალიაშვილი გაუჩინარებამდე რამდენიმე დღით ადრე უნივერსიტეტის ქუჩაზე, ერთერთ შენობაში იმყოფებოდა.

დროების ინფორმაციით, ბაჩალიაშვილი გაუჩინარებამდე ორი კვირით ადრე ახალ სამსახურს ეძებდა და მისი მონაცემები კომპანია “კონექტში” ჰქონდა გადაგზავნილი. კომპანია უნივერსიტეტის ქუჩაზე 17 ნომერში მდებარეობს.

დროებას წყარო უყვება, რომ ამავე კომპანიაში ბაჩალიაშვილს კონკრეტული დავალება მისცეს, რომელიც 20 ივლისს უნდა მიეტანა. რა ტიპის დავალებაზეა საუბარი უცნობია. კომპანიაში აცხადებენ, რომ მათ პროგრამისტისგან მხოლოდ cv მიიღეს.

კომპანია კონექტის შესახებ გამოძიება, სავარაუდოდ, ინფორმირებულია. დროების  ინფორმაციით, გამოძიებამ უკვე იცის სად გაგზავნა, ბაჩალიაშვილმა CV გაუჩინარებამდე ორი კვირით ადრე. ამას ადასტურებს იმავე შენობაში არსებული VTB ბანკის თანამშრომელი, რომელიც ადასტურებს, რომ სამართალდამცველები შენობის სათვალთვალო კამერით დაინტერესდნენ.

კომპანია “კონექტის” მიმდებარე ტერიტორიაზე 4 სათვალთვალო კამერაა დამონტაჟებული. აქედან მხოლოდ ორი – “ვითიბი” ბანკის კამერა მუშაობს. შენობის ბალანსზე არცერთი კამერა არაა. კორპუსის დაცვის სამსახურის ხელმძღვანელი გვიყვება, რომ დაახლოებით ორი კვირის წინ სამართალდამცველებმა კამერები ნამდვილად მოიკითხეს, თუმცა მისი ინფორცმაციით ეს ამ რეზონანსულ საქმეს არ ეხებოდა. კომპანია კონექტის ხელმძღვანელი გამოკითხვაზე ამ დრომდე არ დაუბარებიათ.

პროკურატურამ 4 სექტემბერს ბაჩალიაშვილის ვიდეოკადრები გამოაქვეყნა, რომელზეც ჩანს, რომ 17 ივლისს რამდენიმე სხვადასხვა აფთიაქში წამლები იყიდა, თუმცა ამ დრომდე არ არის გასაჯაროებული დრონის კადრები, სადაც ბაჩალიაშვილის სამძებრო ოპერაცია უნდა ასახულიყო.

ამ დრომდე საქმეზე გამოძიება თავისუფლების უკანონო აღკვეთისა და თვითმკვლელობამდე მიყვანის მუხლით მიმდინარეობს. ოჯახი საგამოძიებო უწყებას უნდობლობას უცხადებს და სუიციდის ვერსიის ისევ არ სჯერა.

ბათუმში “ორბის” ერთ-ერთ თანამშრომელს კორონავირუსი დაუდასტურდა.აჭარის ჯანდაცვის სამინისტროს პრესსამსახურის ინფორმაციით, ინფიცირებული ქალი დასუფთავების სამსახურის თანამშრომელია, თუმცა ის სამსახურში ბოლო ორი კვირის განმავლობაში არ ყოფილა და Covid-19 რამდენიმე დღის წინ დაუდასტურდა. ქალის ინფიცირების წყარო, სავარაუდოდ, საკონდიტრო “დონაა”.

როგორც ცნობილია, ინფიცირებული ქალი საკონსტიტუციო სასამართლო სახელმწიფო დაცვის სპეციალური სამსახურის თამაშრომლის დედაა, რომელსაც რამდენიმე დღის წინ ასევე  დაუდასტურდა კორონავირუსი.

ცნობისთვის, კორონავირუსით ინფიცირების 29 ახალი შემთხვევიდან 15 ბათუმს უკავშირდება, მათ შორის 2 საკონდიტრო დონას კლასტერს.

შეგახსენებთ, რომ დღეს, 6 სექტემბერს, საქართველოში კორონავირუსის 29 ახალი შემთხვევა დადასტურდა.

გორში ავტოსაგზაო შემთხვევის შედეგად 12 წლის მოზარდი გარდაიცვალა. გორი-ტყვიავის საავტომობილო გზაზე მოძრავი ოპელის მარკის ავტომობილი ხეს შეეჯახა, მანქანას ბავშვის მამა მართავდა.

თვითმხილველები ამბობენ, რომ მძღოლი არაფხიზელ მდგომარეობაში იმყოფებოდა და მას მართვისას 12 წლის შვილი კალთაში ეჯდა.

სასწრაფო დახმარების ჯგუფმა მოზარდი კლინიკა “გორმედში” გადაიყვანა, თუმცა მედპერსონალის განცხადებით, კლინიკაში შეყვანისას ბავშვი გარდაცვლილი იყო. თავად ავტომობილის მძღოლს, ბავშვის მამა დაზიანებები არ მიუღია.

ადგილზე იმყოფებიან შსს-ს თანამშრომლები.

“მობრძანდეს… მობრძანდეს”. – ასე ეხმიანება პრემიერმინისტრი გიორგი გახარია მიხეილ სააკაშვილის განცხადებას, რომ ჩამოსვლასთან დაკავშირებულ გეგმებზე ხვალ ისაუბრებს.

“ხვალ გავაკეთებ მიმართვას ჩემი დაბრუნების გეგმასთან დაკავშირებით”. – წერს სააკაშვილი ფეისბუქ გვერდზე.

მან 27 სექტემბერს ვიდეომიმართვაც გაავრცელა, რომელშიც განაცხადა, რომ საქართველოში ბრუნდება.

აჭარის საზოგადოებრივი მაუწყებლის ტელევიზიისა და რადიოს დირექტორის, გიორგი კოხრეიძის ინფორმაციით, აჭარის ტელევიზია მაუწყებლობას ხვალიდან განახლდება.

“აჭარის ტელევიზია ხვალ აღადგენს მაუწყებლობას. თანამშრომლები დაემორჩილებიან იმ ინსტრუქტაჟს, რაც დაავადებათა კონტროლის ცენტრმა მოგვცა. თვითიზოლაციაში და კარანტინში მყოფი თანამშრომლები 12 დღის შემდეგ ხელახლა გაიტესტებიან და უარყოფითი პასუხის შემთხვევაში დაუბრუნდებიან სამუშაო ადგილს”,– თქვა კოხრეიძემ.

რამდენიმე დღის წინ აჭარის საზოგადოებრივი მაუწყებლის ერთერთ თანამშრომელს კორონავირუსი დაუდასტურდა. ამის გამო 5 სექტემბერს ტელევიზიამ მაუწყებლობა შეწყვიტა.

თამარ ბაჩალიაშვილის ბებიის, რიტა ზურაბიშვილი ჩვენებაში ყვება, რომ მისი შვილიშვილი ჩაკეტილი და ემოციური ადამიანი იყო.

მისი ჩვენების მიხედვით, ბაჩალიაშვილი ამზადებდა პროექტს, მაგრამ რა ტიპის პროექტზეა საუბარი, გარდაცვლილის ბებიისთვის უცნობია.

“თამარ ბაჩალიაშვილთან მქონდა ძალიან ახლო, ბებია-შვილიშვილური ურთიერთობა. იგი ჩემს საცხოვრებელ სახლში ატარებდა საკმაოდ დიდ დროს. ჩვენ ხშირად ვსაუბრობდით სხვადასხვა თემაზე, თუმცა თამარი იყო ძალიან ჩაკეტილი პიროვნება და პირად თემებზე, გრძნობებზე ან განცდებზე ფაქტიურად არ საუბრობდა. თამარი იყო ძალიან ემოციური ადამიანი, ამიტომაც მე ვცდილობდი მასთან მესაუბრა პოზიტიურ თემებზე, დამეყენებინა კარგ ხასიათზე, თუმცა კონკრეტულად რას განიცდიდა, ამაზე ჩემთან არ საუბრობდა. ჩემთვის ცნობილი იყო, რომ თამარი მუშაობდა დეველოპერულ კომპანიაში, რომელიც მდებარეობდა თბილისში, ჭავჭავაძის გამზირზე. თავად საუბრობდა, რომ ამზადებდა პროექტს, თუმცა რა პროექტზეა საუბარი, არ ვიცი, რადგან ვერ ვერკვევი კომპიუტერულ საკითხებში. ერთხელ ჩვენ ერთად გამოვაცხეთ ნამცხვრები, რომელიც თამარმა მიართვა თავის თანამშრომლებს”, – წერს ჩვენებაში რიტა ზურაბიშვილი.

ცნობისთვის, ბაჩალიაშვილის დედამ, თეონა თამაზაშვილმა განაცხადა, რომ რიტა ზურაბიშვილმა უთხრა, რომ ნიკა გვარამიასთან ინტერვიუზე არ წასულიყო და “შემოლაწუნებით” დაემუქრა. მანვე აღნიშნა, რომ ის თამარის გამზრდელი ბებია არ არის და იბრალებს.

ზესტაფონის ბაზრის მიმდებარე ტერიტორიაზე გზა ჩავარდა, რომელშიც 7 ადამიანი ჩავარდა. მათგან 4 დაშავდა.

შინაგან საქმეთა სამინისტროს ინფორმაციით, მომხდარზე გამოძიება სისხლის სამართლის კოდექსის 170-ე მუხლით დაიწყო, რაც შრომის დაცვის წესის დარღვევას გულისხმობს, რამაც ჯანმრთელობის დაზიანება გამოიწვია.

ზუგდიდისა და ცაიშის ეპარქიის მიტროპოლიტ მეუფე გერასიმეს სასიყვარულო მიმოწერისა და საქმეში ე.წ. “კანონიერი ქურდების” ჩართვაზე “მთავარ” არხზე გასულ რეპორტაჟს, მეუფე ნიკოლოზი ეხმაურება. მისი თქმით, კანონიერ ქურდებათ ეკლესიას ურთიერთობა გაწყვეტილი აქვს, ხოლო მიმოწერას “გააჩნია როგორ შეხედავ”

“ძალიან ბევრი ადამიანი მიყვარს. ბევრ ადამიანზე ვზურნავ – მამაკაცზეც და ქალზეც. ქალებთან, ახლა ჩემი ტელეფონი რომ ნახოთ, გააჩნიათ როგორ შეხედავთ, სხვა თვალით შეიძლება რომ შეხედოთ და ჩათვალოთ, რომ ეს არის უზნეობა ან უმსგავსობა, მაგრამ არ არის ასე. [მეუფე გერასიმეს] თუ აქვს ვიღაცასთან ურთიერთობა, ეს ადამიანური ურთიერთობა იქნება, ალბათ. ყოველ შემთხვევაში, საეკლესიო ურთიერთობები კანონიერ ქურდებთან არ არსებობს – შეწყვეტილი გვაქვს – ამბობს მეუფე ნიკოლოზი.

ევროპული საქართველოს ფოთის მაჟორიტარობის კანდიდატის, გიგა ბოკერიას განცხადებით, მიხეილ სააკაშვილსა და „ნაციონალურ მოძრაობას“ 2012 წლამდე არსებული ვითარების დაბრუნება უნდა.

მისი თქმით, ამის პარალელურად ივანიშვილს სურს დღევანდელი ვითარების შენარჩუნება, “სადაც კიდევ უფრო მეტი ძალაუფლება აქვს და ხალხი ფეხებზე ჰკიდია”,  ხოლო „ევროპული საქართველოს“ ამოცანაა გარდამტეხი ცვლილებები.

ბოკერია აღნიშნავს, რომ პოლიტიკური დევნა უნდა დასრულდეს, თუმცა, „ევროპული საქართველოს“ გეგმები ვინმეს დაბრუნებასთან დაკავშირებული არ არის.

„ჩვენი „ევროპული საქართველოს“ გეგმა უკავშირდება არა ვინმეს ჩამოსვლას ან არჩამოსვლას ან მუქარას, არამედ ამ ქვეყნის მომავალს, გარდამტეხ ცვლილებებს, სწორ გზაზე დადგომას სწორი კომპასით, რომ ადამიანების ცხოვრება გაუმჯობესდეს ყველა მიმართულებით და ეს პოლიტიკური მარაზმი, რაც ივანიშვილმა შექმნა, დასრულდეს. ყველას დევნა უნდა დასრულდეს, მაგრამ ჩვენი გეგმები არ არის დაკავშირებული ერთ კაცთან ან ვინმეს დაბრუნებასთან“, – განაცხადა ბოკერიამ.