Category: ახალი ამბები

“ეს არის განაწყენებული ადამიანი, რომელიც უზენაეს სასამართლოში რომ ვერ დარჩა მოსამართლედ, შესაბამისად… თუ რამე მტკიცებულებები აქვს, წარმოადგინოს. წარმოადგინოს [თუ აქვს მტკიცებულებები]. 12-13 წელია საერთოდ არ მქონია კონტაქტი, საერთოდ არ შევხვედრივარ და არანაირი კონტაქტი მასთან არ მქონია. ვერავითარი მტკიცებულება ვერ ექნება – როგორ აბსურდულ რაღაცას იძახის. […]   რა კაფეში შეხვედრის ეპიზოდი? როგორ გავურჩიე [საქმე]? იძახის, ჩემი ნების გარეშე წამიყვანეს კაფეშიო. რა, საბარგულში ჩავტენე? მერე ხმამაღლა მიყვიროდნენო[…]  რა კაფეში, არა [არ შემდგარა შეხვედრა]. […] არჩევნები რომ არის, უბრალოდ დაგჭირდათ რაღაც და შესაბამისად, ეს თემა წამოწიეთ.[…] მე მიმუშავია ადრეც და მიმუშავია ახლაც და უამრავ მოსამართლეს, თქვენც გაგიპიარებიათ ხოლმე, მიუღია ისეთი გადაწყვეტილებები, რომელიც, საერთოდ, შეიძლება არ აწყობს ხელისუფლებას, მაგრამ ვინმეს რამე ღერი თმა ჩამოვარდნია თმიდან?”

იუსტიციის უმაღლესი საბჭოს წევრი მოსამართლე ლევან მურუსიძე ყოფილი მოსამართლის, ბესარიონ ალავიძის განცხადებებს ეხმაურება.

“კლანის წევრებს და იმ ადამიანებს, რომლებიც დღეს მანტიამოსხმულები არიან უვადოდ, ვურჩევ, რომ დღესვე დაწერონ განცხადება, თუ ისინი გაბედავენ იმას, რომ ჩემს მიმართ განახორციელებენ მუქარას, ან თუ პროკურატურა გაბედავს, რომ შემოატრიალოს ეს საქმე და მე გამომიყვანოს ამ საქმეში დამნაშავე, მე მაქვს პირდაპირი მტკიცებულება, რომელსაც გადმოგცემთ თქვენ, ამასაც მოისმენს მთელი საზოგადოება და ნახავს, კიდევ უფრო მძიმე მოსასმენს, რა ხდება სასამართლოში. როგორ ხდება საქმის გარჩევა, პირდაპირი მტკიცებულება არის ამის. ეს არის მტკიცებულება, რომელიც ადასტურებს, რომ სასამართლო კლანი ურჩევს მოსამართლეს საქმეს და ასახული არის ამ მტკიცებულებაში სქემა, როგორ ხდება მოსამართლეების დანიშვნა, წინასწარ გარიგება და ვაჭრობა მათთან… ეს არის ჩანაწერი, რომელიც ადასტურებს ამ ფაქტებს, რაც მე ვახსენე. მე ვიკავებდი თავს და ჯერჯერობით ვიკავებ იმ მოტივით, რომ აზრი არ აქვს. მე მქონდა იმედი, რომ პარლამენტში შეიქმნებოდა საგამოძიებო კომისია. მიუხედავად იმისა, რომ ძალიან დიდი რისკის ქვეშ ვიყავი, ადვილი არ არის ამხელა ინფორმაცია ატარო და ამდენ ადამიანზე, ამდენი ადამიანის დანაშაულებრივ ქმდებაზე გქონდეს ინფორმაცია და მტკიცებულებები, რთულია მარტო იმოქმედო, რადგან მე არცერთ პოლიტიკურ ძალასთან არ ვთანამშრომლობ“,

განაცხადა უზენაესი სასამართლოს ყოფილმა მოსამართლემ, ბესარიონ ალავიძემ.

„როგორც გასულ, ისე ამ არჩევნებზეც ხმის ფარულობა იქნება უზრუნველყოფილი. ჩვენ კარგად ვნახეთ ის სპეკულაციური შეფასებები და შეურაცხმყოფელი ბრალდებები იმის თაობაზე, რომ თითქოს ბიულეტენის უკანა მხარეს მარკერის გამოჟონვის კვალი იდენტიფიცირების საშუალებას იძლეოდა, თუ ვის მისცა ხმა ამომრჩეველმა, მაგრამ ეს ასე არ ყოფილა. არ არსებობს არცერთი მტკიცებულება, რომ სადმე დაირღვა ამომრჩევლის ნება. ვნახეთ შემთხვევები, როდესაც სხვადასხვა უფლებამოსილი პირები კენჭისყრის შენობაში კანონსაწინააღმდეგოდ ახორციელებდნენ ფოტო/ვიდეო გადაღებას. ჩვენ როგორც პასუხისმგებლობიანმა ინსტიტუციამ ვნახეთ, რომ ზოგიერთმა დაინტერესებულმა პირმა ეს საკითხი სპეკულაციებისთვის გამოიყენა და მივიღეთ ზომები, რომელიც უზრუნველყოფს იმას, რომ თუნდაც ჩარჩო-ფორმაში არასწორად მოთავსებული ბიულეტენის შემთხვევაში, არ იყოს სივრცე, რომ თუნდაც ამ კვალის იდენტიფიცირება მოხდეს, რომელიც ხელს მისცემს დაინტერესებულ პირებს, რომ ამ არჩევნებზეც ამ საკითხით სპეკულაცია მოახდინონ. ამიტომ მივიღეთ ზომები, რომ სპეკულაციები დავაზღვიოთ და არა ის, რომ ფარულობა ირღვეოდა და ამიტომ რაღაც დამატებითი მექანიზმები უზრუნველყავით.

გასულ არჩევნებზე, შეიძლება იყო გამოჟონვის კვალი, მაგრამ ეს არ ნიშნავს იმას, რომ ვინმეს ჰქონდა იმის შესაძლებლობა, რომ იდენტიფიცირება მოეხდინა თუ ვის მისცა ხმა ამომრჩეველმა. გამოჟონვის კვალი შესაძლოა ნებისმიერ დროს იყოს, მათ შორის წელსაც. ეუთო/ოდირის დასკვნაშია არაფერი წერია ფარულობის დარღვევაზე, იქ წერია ალბათობაზე, კომპრომეტირებულ შემთხვევებზე, სადაც შესაძლოა ყოფილიყო ალბათობა ფარულობის დარღვევასთან დაკავშირებითო და არცერთ შემთხვევაში იქ საუბარი არ არის მტკიცებით ფორმაში, რომ ფარულობა დაირღვა. ბმა ამომრჩეველსა და ბიულეტენს შორის არცერთ ეტაპზე არ არის განსაზღვრული, რაც ნიშნავს, იმას რომ თუნდაც ჩარჩო-ფორმატი არ გამოვიყენოთ ან გამოჟონვის კვალი იყოს, ვერავინ ვერასდროს, ვერ დაადგენს იმას თუ რომელი ბიულეტენი რომელ ამომრთველს მიეკუთვნება, შეუძლებელია იმის იდენტიფიცირება თუ ვის მისცა ამომრჩეველმა ხმა. ეს არის ჩვენი ინსტიტუციის პასუხისმგებლობა, რომ ხმის ფარულობა უზრუნველყოფილი იყოს. ხმის ფარულობა იყო და არის დაცული.

რაც შეეხება სპეციალურ საფარს, ეს არის ხმის მთვლელ აპარატზე, ბიულეტენის მოთავსების ჭრილის თავზე მოთავსებული ქაღალდის მყარი საფარი, ეს არის იმისთვის, რომ ამომრჩევლის მიერ ბიულეტენის ხმის მთვლელ აპარატში მოთავსებისას, მარკერის კვალის გამოჟონვის შემთხვევაში შეუძლებელი იყოს მარკერის კვალის იდენტიფიცირება“,

ამის შესახებ ცენტრალური საარჩევნო კომისიის თავმჯდომარემ, გიორგი კალანდარიშვილმა ბრიფინგზე განაცხადა.

”საქართველოს ოდესღაც რეგიონში ყველაზე წარმატებული და პერსპექტიული სამოქალაქო საზოგადოება ჰყავდა, რომელიც ახლა არსებობის საფრთხის წინაშეა” – განაცხადა ამის შესახებ, ევროსაბჭოს საპარლამენტო ასამბლეაში (PACE), რეზოლუციის – „დემოკრატიისა და კანონის უზენაესობის მხარდაჭერა საქართველოში“ თანაწამრდეგენმაი, საბინა ჩუდიჩიმ.

“საქართველოში დღეის მდგომარეობით, არ არსებობს დემოკრატიული პრაქტიკის სეგმენტი, რომელიც კოლოსალური და სახიფათო წნეხის ქვეშ არ იმყოფება. კერძოდ, ჩვენ ვხედავთ უწყვეტ თავდასხმებს სამოქალაქო სექტორზე, დაპატიმრებებსა და საბანკო ანგარიშების გაყინვებს.

უნდა შეგახსენოთ, რომ საქართველოს ოდესღაც რეგიონში ყველაზე წარმატებული და პერსპექტიული სამოქალაქო საზოგადოება ჰყავდა, რომელიც ახლა არსებობის საფრთხის წინაშეა მიღებული კანონმდებლობის გამო, რომელიც საკუთარ ორგანიზაციებს უცხოელ აგენტებად მიიჩნევს. გარდა ამისა, თუ დავაკვირდებით 4 ოქტომბრის ადგილობრივ არჩევნებს, რომელიც საქართველოში მოახლოვდა – არ არსებობს არანაირი მტკიცებულება იმისა, რომ ეს არჩევნები თავისუფალი და სამართლიანი იქნება. ეს იმის გათვალისწინებით, რომ სამოქალაქო საზოგადოების მხრიდან ზედამხედველობა არ იარსებებს. უპირველეს ყოვლისა, იმ უდიდესი ზეწოლის გამო, რომლის ქვეშაც საქართველოს სამოქალაქო სექტორია, და მეორე – არ არსებობს თანამშრომლობა არჩევნების მონიტორინგის საკითხზე საერთაშორისო ორგანიზაციებთან. ეუთო-ს დემოკრატიული ინსტიტუტებისა და ადამიანის უფლებათა ოფისისთვის მოწვევა დაგვიანებით გაიგზავნა, რამაც აზრიანი ზედამხედველობა გამორიცხა და ოდირმაც შესაბამისად, უარი განაცხადა მონაწილეობაზე. და, რა თქმა უნდა, ევროპის საბჭოს ადგილობრივი და რეგიონული ხელისუფლების კონგრესი არ იქნა მიწვეული არჩევნების მონიტორინგისთვის.

საქართველოს დემოკრატიული ცხოვრების შემდეგი კომპონენტი ჟურნალისტები და თავისუფალი მედიაა. კიდევ ერთხელ, ვხედავთ, რომ სივრცე, სადაც ჟურნალისტური თავისუფლებებია შეზღუდული და ჟურნალისტებზე თავდასხმებიც კვლავ გრძელდება. ამ მხრივ, გამოვყოფდი მზია ამაღლობელს, რომელიც პოლიტიკური ბრალდებებით პატიმრობაში რჩება.

სამოქალაქო საზოგადოების 60-ზე მეტი ორგანიზაციაა თავდასხმის ობიექტი და მათი საბანკო ანგარიშები გაყინვით არის დაშინებული“