Category: კავკასია

ამერიკული გამოცემა New York Times–ის წყაროების ინფორმაციით ამერიკის მთავრობიდან, რუსეთის სამხედრო მეთაურობას დისკუსია ქონდა იმის შესახებ, როდის და როგორ შეიძლება რუსეთმა უკრაინაში ტაქტიკური იარაღი გამოიყენოს.

გამოცემის ინფორმაციით, პუტინი ასეთ საუბრებში არ მონაწილეობდა, მაგრამ თავად ფაქტი, რომ ეს საკითხი განიხილებოდა, თეთრ სახლს აშფოთებს, რადგან ის პირდაპირ მიუთითებს, რა მდგომარეობაში არიან რუსი გენერლები უკრაინაში მათი არმიის წარუმატებლობების ფონზე.

იმის შესახებ, რომ ბირთვული იარაღის თემა რუსულ სამხედრო წრეებში განიხილება, ამერიკის დაზვერვამ აშშ–ს ხელისუფლებას ოქტომბრის შუა რიცხვებში აცნობა. ამასთან, ამ ეტაპზე არ შეინიშნება შეიარაღების მომზადების ან რაიმე სხვა მზადების ნიშნები ბირთვული დარტყმისთვის, აზუსტებენ სპეცსამსახურები.

ოთხშაბათს ეს კიდევ ერთხელ დაადასტურა თეთრი სახლის ნაციონალური უსაფრთხოების საბჭოს სტრატეგიული კომუნიკაციების კოორდინატორმა ჯონ კირბიმ. პენტაგონში ვარაუდობენ, რომ რუსეთის განკარგულებაში დაახლოებით ორი ათასი ტაქტიკური ბირთვული ქობინია.

რუსული ბირთვული საფრთხე ვაშინგტონში სერიოზულად აღიქმება – წერს  New York Times და საკუთარ წყაროებზე დაყრდნობით იუწყება, რომ ოქტომბრის შუა პერიოდიდან თერმა სახლმა მის მოკავშირეებთან ერთად რიგი ნაბიჯები გადადგა დაპირისპირების გრადუსის შესამცირებდა.

კერძოდ, საქმე ეხება სატელეფონო საუბრებს დასავლელ და რუს ოფიციალურ პირებს შორის, რომელთა ვინაობა არ სახელდება.

ექსპერტების აზრით, ამერიკული დაზვერვის ინფორმაცია რუსული სამხედრო ელიტის განწყობების შესახებ  ყურადღებას იმსახურებს.

ერთის მხრივ, მათი თქმით ტაქტიკური დარტყმა წინასწარი მომზადების გარეშე ვერ განხორციელდება. აუცილებელია რიგი ნაბიჯების გადადგმა, რომლებსაც დასავლური სპეცსამსახურები აუცილებლად შენიშნავენ.

თუმცა, მეორეს მხრივ, გამოვლენის და შეტყობინების სისტემები არასრულყოფილია, და ძნელი გამოსაცნობია, რამდენად დროულად შეძლებენ დაზვერვები დარტყმის მზადების შესახებ საკუთარი მთავრობების ინფორმირებას.

ამერიკის ომის კვლევის ინსტიტუტის, ISW–ს ანალიზის ერთი პუნქტი ხერსონის საოკუპაციო ხელისუფლების გადაწყვეტილებას ეხება, რომლის მიხედვით მიმოქცევაში რუსულ რუბლთან ერთად უკრაინული გრივნას გამოყენება დასაშვები გახდა. ანალიზის ავტორები ამას ეკონომიკური პრობლემების ნიშნად თვლიან.

ხერსონის რუსულმა საოკუპაციო ადმინისტრაციამ ჯერ კიდევ მაისში განაცხადა, რომ ხერსონის ოლქი სექტემბრიდან მთლიანად გადავიდოდა რუსულ რუბლზე. ახლა კი გრივნას მიმოქცევაში გამოყენება ოფიციალურად გამოაცხადეს ნებადართულად, თუმცა გრივნას მფლობელებისთვის ძალიან არამომგებიანი გაცვლითი კურსით.

ISW–ს ვარაუდით, მათ ამისკენ მძიმე ეკონომიკურმა სიტუაციამ და იმან უბიძგა, რომ გრივნა ისედაც აქტიურად გამოიყენებოდა შავ ბაზარზე.

“რუსეთის საოკუპაციო ადმინისტრაციის განზრახვის ჩავარდნა, თავზე მოეხვიათ მოსახლეობისთვის რუსული რუბლი, მეტყველებს, რომ მისი მცდელობები, ხერსონიდან უკრაინული თვითშეგნება ამოეძირკვათ, წარუმატებლად დასრულდა.

“უკრაინული თვითშეგნება და პატრიოტიზმი რუსეთის მიერ ოკუპირებულ ტერიტორიებზე ნარჩუნდება. მართალია უკრაინისთვის მძიმე იქნება აქ ხელახლა ააშენოს ინსტიტუტები და რეგიონული ეკონომიკა, რომელსაც უკრაინული არმიის მიერ ახალი ტერიტორიების გათავისუფლების კვალდაკვალ რუსი ოკუპანტები ანადგურებენ“.–ნათქვამია ანგარიშში.

ერთ–ერთი სატელეფონო საუბრისას აშშ–ს პრეზიდენტმა ხმას აუწია და უკრაინის პრეზიდენტს შეახსენა, რომ აშშ–ს მოსახლეობა და მთავრობა ისედაც არსებით დახმარებას უწევს მის ქვეყანას.

ზელენსკისა და ბაიდენის სატელეფონო საუბრის შესახებ, რომელიც 5 თვის წინ, ივნისში გაიმართა ამერიკული ტელეარხი NBC News ყვება და რამდენიმე წყაროს ეყრდნობა, რომელთათვისაც საუბრის შინაარსი ცნობილია.

ტელეარხის ინფორმაციით, საუბრის დასაწყისში პრეზიდენტი ბაიდენი მოუყვა ზელენსკის, რომ აშშ–ს ადმინისტრაციამ ცოტა ხნის წინ კიევისთვის 1 მილიარდიანი დახმარების გამოყოფა დაამტკიცა, რის შემდეგაც ზელესკიმ მაშინვე დაიწყო შეიარაღების ჩამოთვლა, რომელიც უკრაინის შეიარაღებულ ძალებს რუსული არმიისგან დასაცავად ჭირდებოდა, და რომელიც უკრაინას იმ მომენტისთვის ჯერ კიდევ არ ქონდა მიღებული.

როგორც ტელეარხის წყარო ყვება, ამ დროს ბაიდენმა ხმას აუწია და უკრაინის პრეზიდენტს უთხრა, რომ ჯობდა მეტი მადლიერება გამოეჩინა უკვე აღმოჩენილი დახმარებისთვის, რადგან ამერიკელი ხალხი ისედაც ძალიან გულუხვი იყო, ქვეყნის ადმინისტრაცია და მისი სამხედრო უწყება კი უკრაინის დასახარებლად დაუღალავად მუშაობდნენ.

ტელეარხის ცნობით, აშშ–ს ნაციონალური უშიშროების საბჭომ უარი თქვა ამ ინფორმაციის კომენტირებაზე. ზელენსკის წარმომადგენელმა კი კომენტარის მოთხოვნას არც უპასუხა.

NBC–ს საკუთარ წყაროებზე დაყრდნობით ამბობს, რომ აშშ–ს კონგრესში, თანაც ორივე პარტიაში, უკრაინის პრეზიდენტის გარემოცვაში, ასევე ზოგიერთი ევროპული ქვეყნის მთავრობაში არსებობს გარკვეული ფრუსტრაცია ბაიდენის ადმინისტრაციის მეტისმეტი სიზანტის გამო სამხედრო დახმარების შესახებ კიევის მოთხოვნების საპასუხოდ.

თეთრი სახლი თავიდან ვერ იღებს გადაწყვეტილებას ზოგიერთი ტიპის შეიარაღების მიწოდების შესახებ, რომელსაც უკრაინა სასწრაფოდ ითხოვს, და მხოლოდ კვირების და თვეების შემდეგ ემორჩილება ზეწოლას – ამბობს ტელეარხი.

უკრაინის დაჟინებული მოთხოვნის მიუხედავად თეთრმა სახლმა დღემდე არ მიაწოდა მას შორეული მოქმედების რადიუსის რაკეტები, ტანკები, ჯავშანმანქანები და ავიაცია, რასაც კონფლიქტის შესაძლო ესკალაციის შიშით ხსნის.

ამერიკული ტელეარხის წყაროს ინფორმაციით, ივნისის სატელეფონო საუბრისას ბაიდენის მხრიდან უკმეხი ტონის გამოყენების შემდეგ ზელენსკის გუნდმა გადაწყვიტა დაძაბულობა გაენეიტრალებინა, რადგან მათი აზრით აშშ–ს პრეზიდენტთან დაპირისპირება არაპროდუქტიული იქნებოდა.

დილიდან უკრაინის ქალაქებში საჰაეროგანგაშის ხმა ისმის.

დილიდან არაერთი აფეთქების ხმა გაისმა კიევსა და უკრაინის სხვა ქალაქებში. კიევში აფეთქებების შემდეგ ელექტროენერგია გაითიშა და კავშირი შეწყდა.

კიევის მერმა, ვიტალი კლიჩკომ დაადასტურა,რომ კიევის ნაწილი ელექტროენერგიის გარეშეა დარჩენილი კრიტიკულ ინფრასტრუქტურაზე სარაკეტო დარტყმების შედეგად. ზოგიერთ რაიონს წყალი არ მიეწოდება. ხელისულება ასევე აცხადებს ენერგეტიკული ინფრასტრუქტურის ობიექტების დაზიანების შესახებ დნეპროპეტროვსკის და ხარკოვის ოლქებში. ვრცელდება ინფორმაცია აფეთქებების შესახებ ვინიცკის, პოლტავსკის, ჟიტომირის, როვნევსკის და სხვა ოლქებში.

ადგილობრივი მედიის ინფორმაციით აფეთქებები მოხდა ჩერკასკის და ზაპოროჟიეს კრიტიკული ინფრასტრუქტურის ობიექტებზეც.

ვინიცკის ოლქის ხელმძღვანელობა ამბობს, რომ ჩამოგდებული რაკეტა სამოქალაქო ობიექტს დაეცა.

ხარკოვის ოლქის ხელისუფლება აკონკრეტებს, რომ ადგილობრივი დროით დილის 8 საათზე სარაკეტო ტარტყმები მიიტანეს ხარკოვის და ჩუგუევსკის რაიონებზე. შედეგად დაზიანებულია კრიტიკული ინფრასქტრუქტურის ობიექტები და შეფერხებულია ელექტროენერგიის მიწოდება.

რუსეთის თავდაცვის სამინისტროს ჯერჯერობით უკრაინის ენერგოობიექტებზე ახალი შეტევის შესახებ არაფერი უთქვამს. უკრაინის კრიტიკული ინფრასტრუქტურის ობიექტებს რუსეთი თითქმის ერთი თვეა ბომბავენ.

ცნობილი გახდა უკრაინაში დაღუპული კიდევ ერთი ქართველი მებრძოლის ვინაობა.გურგენ (გუგა)  გაგნიძე ბახმუტთან ახლოს მოწინააღმდეგესთან კონტაქტურ ბრძოლაში დაიღუპა.

გუგა გაგნიძე ბახმუტთან, კონტაქტური ბრძოლის დროს, მაშინ დაიღუპა, როცა ჯგუფთან ერთად ტყვეების ასაყვანად დაგეგმილ ოპერაციაში მონაწილეობდა. ჯგუფი “ვაგნერელების” ჩასაფრებაში მოჰყვა. როგორც თვითმხილველები და გადარჩენილი თანამებრძოლები ამბობენ, გუგამ ბოლომდე არ დატოვა ბრძოლის ველი და გმირულად დაეცა.

40 წლის გუგა გაგნიძე უკრაინის შეიარაღებული ძალების 25-ე სადესანტო–მოიერიშე ბრიგადაში მსახურობდა. ის ოცმეთაური იყო და არაერთ ოპერაციაში მონაწილეობდა. ის არის 23-ე ქართველი, რომელიც თებერვლის შემდეგ უკრაინაში რუსეთის მიერ გაჩაღებულ ომში დაიღუპა.

სამხედროს დაღუპვის შესახებ ცნობა უკრაინაში მყოფმა ქართველმა მებრძოლებმა გაავრცელეს.

ამერიკის ომის კვლევის ინსტიტუტის (ISW) ახალ ანალიზში საუბარია იმის შესახებ, რომ რუსეთის პრეზიდენტი სავარაუდოდ ემზადება ხანგრძლივი ომისთვის  ჩვეულებრივი სამხედრო საშუალებებით, ამჟამად ოკუპირებული ტერიტორიების შენარჩუნებისა და ახალი ტერიტორიების დაპყრობისთვის, და არა მკვეთრი ესკალაციისთვის, მაგალითად ბითვული იარაღის გამოყენებით, ან პირიქით, ზავისთვის.

ორგანიზაციის ანალიტიკოსები თვლიან, რომ ამაზე მეტყველებს პუტინის მიერ “ნაწილობრივი მობილიზაციის“ გამოცხადება.

“მან ამ მობილიზაციისთვის ძალიან მაღალი პოლიტიკური ფასი გადაიხადა ათასობით რუსის სხვა ქვეყნებში გაქცევის, უპრეცედენტო პროტესტის და ასევე უპრეცედენტო კრიტიკის სახით რუსი სამხედროების და ხელისუფლების მიმართ. ამ ფასს აზრი ექნება, თუ პუტინი აპირებს ომი გააგრძელოს და ესმის, რომ უკრაინაში სასწრაფოდ უნდა გაგზავნოს დამხმარე ძალა, რათა პოზიციები შეინარჩუნოს იქამდე, სანამ ახალი გაწვევა მოუსწრებს და სიტუაციას მისთვის სასარგებლოდ შემოატრიალებს“– წერენ ანგარიშის ავტორები.

მათი აზრით, პუტინს იმედი აქვს რომ ახლა მობილიზებული რეზერვისტები შეძლებენ უკრაინაში პოზიციების შენარჩუნებას გაზაფხულამდე, მანამდე კი 4–6 თვიანი მომხადების გავლას შეძლებენ შემოდგომაზე გაწვეული წვევამდელები და სწორედ მათი ფრონტზე გაშვების შემდეგ შეძლებს ახალ შეტევებზე გადასვლას.

ამავე დროს, ISW–ს ვარაუდით პუტინი ოცნებობს, რომ ცივი ზამთავრი და საწვავის დეფიციტი ზოგიერთ ევროპულ ქვეყანას აიძულებს უკრაინას დახმარება შეუმციროს და რუსეთის მიმართ უფრო დამთმობი გახდეს.

ISW ხაზს უსვამს, რომ ის წერს მხოლოდ იმაზე, თუ რას ფიქრობს პუტინი, და არა იმაზე, თუ სინამდვილეში რა გავლენა შეიძლება მოახდინონ მობილიზებულებმა ომის მსვლელობაზე. ამერიკელი ანალიტიოსები გვახსენებენ, რომ რეზერვისტების დაახლოებით მესამედი, თავად პუტინის სიტყვებითვე უკვე ჩავიდნენ უკრაინაში, მაგრამ არსებითი ცვლილებები მათ ჩასვლას არ მოჰყოლია. სავარაუდოდ გარდატეხას ვერც ნაჩქარევად მომზადებული წვევამდელები შეიტანენ ფრონტზე.

“თუმცა, პუტინს როგორც ჩანს, არ უნდა ამ ფაქტების აღიარება და პირიქით, იმედი აქვს რომ ასეთი მაღალი პოლიტიური ფასის შედეგად შეგროვილ რეზერვებს შეუძლიათ ფრონტზე სიტუაციის შეცვლა“– წერენ ანალიტიოსები.

30 ოქტომბერს გამოქვეყნებული მონაცემებით ბოლო დღეღამის განმავლობაში უკრაინულმა არმიამ 950 რუსი სამხედრო გაანადგურა, რის შემდეგაც რუსული არმიის დანაკარგმა 71200–ს მიაღწია.

რატომაა მნიშვნელოვანი რუსების ეს დანაკარგები, რონდელის ფონდის მკვლევარი, ექსპერტი ზურა ბატიაშვილი განმარტავს:

“უკრაინული მხარის მონაცემებით, რუსების ცოცხალი ძალის დანაკარგები 70 000-ს გადასცდა. ვთქვათ, ცოტათი გადაჭარბებულია და ვიანგარიშოთ 60 000. დაღუპულებისა და დაჭრილების თანაფარდობა დაახლოებით ერთი სამზეა ხოლმე. ანუ დაჭრილია მინიმუმ 180 000 რუსი ჯარისკაცი. ომიდან გამოთიშულების საერთო ციფრი დაახლოებით გამოდის 180 000 + 60 000 = 240 000. და ეს თითქმის სულ პროფესიული ჯარი იყო.

ახლა მობილიზებულებზე. მნიშვნელოვანია, რომ ბოლო დღეებში რუსებში მსხვერპლი გასამმაგდა და ზოგიერთ შემთხვევაში გაოთხმაგდა კიდეც. აქ მოყვანილი 950 დაღუპული 1 დღეში სწორედ მაგას აჩვენებს. ეს ბუნებრივიცაა, რადგან თუ აქამდე პროფესიონალი სამხედრობი იბრძოდნენ, ახლა უკვე მოხალისეების დიდი მასაა იქ (შოიგუმ გამოაცხადა, რომ 80 000 უკვე გაუშვეს ფრონტის ხაზზე), რომელთა დიდმა ნაწილმა ისიც კი არ იცის, როგორ მოიქცეს მაგალითად დაბომბვების დროს, რაც ზრდის მსხვერპლის რაოდენობას.

აქ ისიც გასათვალისწინებელია, რომ დასავლეთიდან მოიმატა უკრაინისთვის შეიარაღების მიწოდების ტემპმა.

ეს ყველაფერი ნიშნავს, რომ:
1. დიდი იქნება მსხვერპლი მობილიზებულებში და რუსეთში მობილიზაციის შედეგად წარმოქმნილი ერთგვარი ენთუზიაზმი მალე მინელდება;
2. უკრაინელები გაათავისუფლებენ კიდევ უფრო მეტ ტერიტორიებს;
3. სამხედრო მარცხისა და მობილიზებულებში დიდი მსხვერპლის ფონზე რუსეთში მოიმატებს უკმაყოფილება, რისიც ყველაზე მეტად ეშინია პუტინის რეჟიმს.

საბოლოო ჯამში, ეს ყველაფერი გარდაუვალს ხდის და აახლოებს რუსეთის კრახს.“– ამბობს ბატიაშვილი.

უცნობმა მამაკაცმა 3 ბოთლი მოლოტოვის კოქტეილი ესროლა მიგრანტების ცენტრს სამხრეთ ინგლისის პორტ დუვრში. ამის შემდეგ კი თავი მოიკლა. ამის შესახებ სააგენტო როიტერის ფოტოგრაფმა განაცხადა, რომელიც ტრაგედიის თვითმხილველი გახდა.

თავდამსხმელი ცენტრს დილით დაახლოეით 11:20 საათზე ჯიპით მიუახლოვდა. შემდეგ 3 ბოთლი “მოლოტოვის კოქტეილი“ ესროლა, საიდანაც ორს ცეცხლი მოეკიდა.

ამის შემდეგ ის ავტომობილით უახლოეს ბენზოგასამართ სადგურთან წავიდა, მეტალის ბოძს თოკი მიაბა, რომლის ყულფი კისერზე ჩამოიცვა და მანქანა დაძრა.

მოწმე ბრაიან ვუდი ყვება, რომ დაახლოებით 200 მეტრის მანძილზე იყო მიგრანტთა ცენტრიდან, როცა სამი აფეთქების ხმა გაიგო და კვამლი დაინახა.

ამის შემდეგ კი ყვირილის და სიგნალიზაციის ხმა გაიგო.

კენტის საგრაფოს პოლიცია აღნიშნავს, რომ ხანძრის შედეგად ცენტრში 1 ადამიანი დაშავდა. თავდამსხმელის ვინაობა მოგვიანებით გაირკვა.

ბიბისის რადიოს ინფორმაციით, პოლიციამ მამაკაცის სიკვდილი არ დაადასტურა. გამოძიება გრძელდება. თავდასხმის მოტივები უცნობია.

თავდასხმა დაემთხვა მწვავე პოლიტიკურ დებატებს დიდ ბრიტანეთში მიგრანტების მიღებასთან დაკავშირებით. ბოლო დროს მკვეთრად გაიზარდა იმ ადამიანების რაოდენობა, ვინც ლა–მანშის სრუტის გადალახვის გზით დიდ ბრიტანეთში შეღწევას ცდილობენ.

სწორედ მიგრანტთა ამ კომპლექსში მიჰყავთ ადამიანები, რომლებმაც ლა–მანში პატარა ნავებით გადალახეს. დღევანდელ ინციდენტს წინ უძღვოდა 29 ოქტომბერს დიდ ბრიტანეთში 1000-მდე ადამიანის ამ გზით ჩასვლა.

რუსეთ–საქართველოს საზღვრის ზემო ლარსის გამშვებ პუნქტზე შაბათს მესაზღვრეებს რუსული მხრიდან ათ საათზე მეტხანს ყავდათ დაკავებული დაღესტნელი დები, რომლებიც ნათესავების მხრიდან ძალადობას გამოექცნენ. უფლებადამცველების დახმარებით მათ საბოლოოდ რუსეთის დატოვება და უსაფრთხო ადგილამდე მისვლა შეძლეს – წერს ბიბისი და გოგოების შესახებ რეპორტაჟს აქვეყნებს.

რუსეთიდან საქართველოში გადასვლისას 20 წლის ხადიჟატ ხიზრიევას, მის 18 წლის დას, ფატიმატ ხიზრიევას, ასევე მათ ბიძაშვილებს , ასევე დებს – 24 წლის ამინატ გაზიმაგომედოვას და 19 წლის ფატიმატ მაგომედოვას პრობლემები შეექმნათ.

სასაზღვრო პუნქტის თანამშრომლებმა რუსეთის მხრიდან მათ პასპორტები ჩამოართვეს ისე, რომ მიზეზები არ აუხსნეს, შემდეგ კი პოლიციაში დარეკეს. კითხვაზე პასუხად, რატომ დააკავეს ამდენ ხანს ქალები, გამშვები პუნქტის თანამშრომლებმა მათ გადაადგილებაზე მშობლების ნებართვა მოთხოვეს, მიუხედავად იმისა, რომ ისინი სრულწლოვანები არიან. გარდა ამისა, განაცხადეს, რომ მათ სანახავად ნათესავები მიდიოდნენ.

საქმეში ჩაერთო უფლებადამცველი კრიზისული ჯგუფი, რომელიც ჩრდილოეთ კავკასიაში მსგავს სიტუაციაში აღმოჩენილ ადამიანებს ეხმარება.

ორგანიზაციის ინფორმაციით გოგოები რეგულარულად იყვნენ ფიზიკური ძალადლების მსხვერპლი ნათესავების მხრიდან, რომლებიც მათგან რელიგიურ მორჩილებას ითხოვდნენ და ყოველ წვრილმან გადაცდომაზე სჯიდნენ. ბავშვობაში გოგოებს ქალური წინაცვეთა ჩაუტარეს. მსოფლიოს ქვეყნების დიდ ნაწილში აკრძალული ეს პრაქტიკა დაღესტნის სოფლებში კვლავ მოქმედებს. ფონდის მონაცემებით კუსტარულ პირობებში ჩატარებული ოპერაციები ხშირად ქალებში სერიოზულ ფსიქოლოგიურ პრობლემებს იწვევს.

უფლებადამცველი ჯგუფ “მარემიდან“, სვეტლანა ანოხინა “კავკაზსკი უზელს“ უყვება, რომ დებს გავლენიანი ნათესავები აღმოაჩნდათ.

“გოგოები ძებნაში არ ყოფილან, თუმცა ნათესავებს დიდი კავშირები აქვთ. ხადჟამლახი, საიდანაც გოგოები არიან წარმოშობით, ძალიან მდიდარი სოფელია. ისინი სახლიდან სამი თვის წინ წავიდნენ, სამი თვე ისინი კრიზისულ თავშესაფრებში იყვნენ. ნათესავები მათ პოვნას ცდილობდნენ, მათ შორის, ჩემთანაც გზავნიდნენ ხალლხს. თავიდან მათ მოძებნას ქალი ცდილობდა, მერე მამის ძმაკაცი, რომელიც რეკავდა და ამბობდა, რომ სახლში გოგოები იმდენად უყვართ, რომ თანმხლების გარეშე არსად უშვებენ“– ამბობს ანოხინა.

გოგოები ჩიოდნენ, რომ მას სახლში სცემდნენ, განათლების მიღებას უკრძალავდნენ, ძალით გათხოვებას უპირებდნენ – წერს მედია, თუმცა ნათესვები ამას უარყოფენ.

უფლებადამცველების ინფორმაცით, ლარსის მესაზღვრეებმა გოგოების საზღვრის კვეთის შეფერხება მათ სახელზე დავალიანების არსებობით ახსნეს. თუმცა სასაზღვრო პუნქტში მივიდა მათი ადვოკატი ლეისან მანაპოვა, რომელიც კრიზისჯგუფთან თანამშრომლობს, და მიტანა ცნობა დავალიანების არარსებობის შესახებ, რის შემდეგაც ერთ–ერთმა მესაზღვრემ აღიარა, რომ ხელმძღვანელობისგან სიგნალს ელოდება.

სასაზღრვრო სამსახური ინციდენტზე ოფიციალურ კომენტარს არ აკეთებს.

შემდეგ სასაზღვრო–გამშვებ პუნქტზეგ ოგოების დედები და მათი ბიძაშვილი ბიჭი მივიდნენ, თუმცა ადვოკატმა მოახერხა პოლიცია დაერწმუნებინა, რომ ისინი გოგოებთან არ შეეშვათ. ამ დროს გოგოები სასაზღვრო პუნქტის საფილტრაციო ოთახში იყვნენ მოთავსებული.

ახალგაზრდა ქალების მამა , ჰაჯიმურად ხიზრიევი ამბობს, რომ საკუთარ შვილებს მაინც დაიბრუნებს და მათ “ტვინი გადაუბრუნეს“. ის უარყოფს, რომ ოდესმე სცემდა შვილებს, არადა უფლებადამცველებს ამის დამადასტურებელი ფოტოები აქვთ. მამა პირობას დებს, რომ თუ გოგოები დაბრუნდებიან, თითს არ დააკარებს, თუმცა დებმა დაბრუნებაზე უარი თქვეს. საღამოს 10 საათის შემდეგ გაჩნდა ინფორმაცია, რომ ადვოკატთან ერთად გოგოებმა მაინც მოახერხეს რუსეთ–საქართველოს საზღვრის გადაკვეთა და “ნეიტრალურ ტერიტორიაზე იმყოფებიან.“ მოგვივანებით, ღამით კი კრიზისულმა ჯგუფმა განაცხადა, რომ მათ საქართველოს მხარეს საზღვარი გადაკვეთეს და ახლა “უსაფრთხო ადგილზე იმყოფებიან.“

ასეთი შემთხვევები დაღესტანში და ჩეჩნეთში ხშირია. სპეციალური უფლებადამცველი ჯგუფები ზოგჯერ ახერხებენ ოჯახური ძალადობისგან გამოქცეულ ქალებს დაეხმარონ, თუმცა ეს ყოველთვის ვერ ხერხდება.