“ფეკალიები ჩადის თბილისის ზღვაში” – ხმაური და დაპირისპირება საკრებულოში

ლევან ხაბეიშვილის ინფორმაციით, დედაქალაქი ეპიდემიის რისკის ქვეშ შეიძლება აღმოჩნდეს.თბილისის საკრებულოს ფრაქცია ”ერთიანი ნაციონალური მოძრაობის” წევრის მტკიცებით, ზღვაში ფეკალიების დიდი მასა ჩაედინება, რითიც შესაბამისი უწყებები უნდა დაინტერესდნენ. ხაბეიშვილის ამ განცხადებას  საკრებულოს გარემოს დაცვისა და ურბანული განვითარების კომისიის სხდომაზე ხმაური და სიტყვიერი დაპირისპირება მოჰყვა. 

ხაბეიშვილმა კომისიის სხდომაზე ვიდეო მტკიცებულებაც წარადგინა, სადაც ჩანს, რომ მილით ზღვაში ფეკალიები ჩაედინება.

„ამდენი ადამიანია, წავიდეთ და ვნახოთ, რომ ფეკალიები ჩადის თბილისის ზღვაში, პირდაპირ მილი ჩადის…. თქვენ თუ არ გააკეთებთ ამას, მივიყვან მანქანას და იმ მილს, საიდანაც მოდის ეს, დავაყრი მიწას“ – აცხადებს ლევან ხაბეიშვილი.

თბილისის საკრებულოს გარემოს დაცვის კომისიის თავმჯდომარემ, ერეკლე კუხიანიძემ ლევან ხაბეიშვილი „სისულელეების“ ლაპარაკსა და პროვოკაციაში დაადანაშაულა.