“რომელ ევროპულ ღირებულებებს იზიარებთ? კანონის უზენაესობას? ადამიანის უფლებების პატივისცემას? ევროპაში საქართველოს სერიოზულად აღარავინ აღიქვამს.
სამწუხაროა. საკუთარი თავის შეურაცხყოფაა”.
ასე ეხმაურება ესტონეთის ყოფილი პრეზიდენტი, თომას ჰენდრიკ ილვესი, Twitter-ზე ირაკლი ღარიბაშვილის პოსტს, რომელმაც ხორვატიის პრეზიდენტთან შეხვედრის დასრულების შემდეგ დაწერა, რომ საქართველო და ხორვატია ევროპულ ღირებულებებს იზიარებენ.
“როგორც მოგეხსენებათ, განათლების ხარისხის განვითარების ეროვნული ცენტრის მიერ ავტორიზაციის მინიჭების გარეშე არც ერთ სასწავლებელს არ აქვს საქართველოში საგანმანათლებლო საქმიანობის წარმოების უფლება. საგანმანათლებლო დაწესებულების სტატუსის მოპოვებისთვის დაწესებულებამ უნდა გაიაროს ავტორიზაცია, რომლის მიზანია სახელმწიფოს მიერ აღიარებული განათლების დამადასტურებელი დოკუმენტის გასაცემად შესაბამისი საქმიანობის განხორციელებისათვის აუცილებელი სტანდარტების დაკმაყოფილების უზრუნველყოფა. ავტორიზაციის გავლა სავალდებულოა როგორც საჯარო, ასევე კერძო სუბიექტისთვის.
სრული პასუხისმგებლობით ვაცხადებთ, რომ მსგავსი სასწავლებლის გახსნასთან დაკავშირებით საქართველოს საგანმანათლებლო სისტემაში არანაირი პროცედურა არ მიმდინარეობს. გავრცელებული ინფორმაცია აღნიშნულთან დაკავშირებით არის დეზინფორმაცია, რომელიც ემსახურება საზოგადოების შეცდომაში შეყვანას, განათლების სისტემისა და ხელისუფლების მიზანმიმართულ დისკრედიტაციას”.
განათლებისა და მეცნიერების სამინისტრო საქართველოში რუსულ-ქართული უნივერსიტეტის შესაძლო გახსნას ეხმიანება და განცხადებას ავრცელებს.
”გირჩი – მეტი თავისუფლების” ლიდერზე ზურაბ ჯაფარიძეზე თავდამსხმელი სასამართლომ 2 000-ლარიანი გირაოს სანაცვლოდ გაათავისუფლა.
საქმეს მოსამართლე გოგა კუპრეიშვილი განიხილავდა.
დაკავებული სოსო მაისურაძე სასამართლო დარბაზიდან გაათავისუფლეს.
ცნობისთვის, 17 ივნისს გორის სმარტთან გირჩი – მეტი თავისუფლებას ლიდერს ზურაბ ჯაფარიძეს თავს დაესხნენ – ჯაფარიძეს დაზიანება თვალის არეში ჰქონდა მიყენებული.
“ვერ ვხვდები მიზეზს, რატომ უნდა ვიმსჯელო ვიღაც ადაიანის მოსაზრება. თუ აღბიშნული რაღაც ფორმით დაემსგავსება ფაქტს, მზად ვარ გავაკეთო კომენტარი.
თუ საგანმანათლებლო, ასე ვთქვათ, ინსტიტუციების დაფუძნება გაინტერესებთ, არაერთი ევროპული, ამერიკული ინსტიტუტი და უნივერსიტეტი დაარსებულა და არ მახსოვს, რომ აღნიშნულ თემაზე რაიმე კითხვა გაგეკეთებინათ და დაგესვათ.
[…] არაფერი და ვერაფერი ვერ დაადასტურებს რუსულ ექსპანსიას საქართველოში. ყველას დეკლარირებული გვაქვს ანტირუსული და პროდასავლური პოლიტიკა. ამიტომ, ამ თემაზე საუბარი ერთადერთი ემსახურება იმას, რომ დათესოთ რაღაცა პანიკა და აჟიოტაჟი გამოიწვიოთ საზოგადოებაში”.
ქართული ოცნების დეპუტატი, ნინო წილოსანი საქართველოში ქართულ-რუსული უნივერსიტეტის გახსნის შესახებ გავრცელებულ ინფორმაციას გამოეხმაურა.
“არაერთგზის დადასტურდა, რომ ყოფილი “ნაციონალები” არ არსებობენ, შესაბამისად, გაფანტული ელემენტები როდის დაუბრუნდებიან თავიანთ დედა პარტიას – “ნაციონალურ მოძრაობას”, არანაირ განსაკუთრებულ მნიშვნელობას არ ანიჭებს თვითონ პროცესს. შინაარსი არ იცვლება, “ფარას” დოკუმენტებმაც დაადასტურა, თუ რა მიზანს ემსახურებიან ისინი და მოლოდინი გვაქვს, რომ 2024 წლის არჩევნებისთვისაც გაერთიანებულ თუ არაგაერთიანებულ ფორმატში იქნებიან ყველაზე რადიკალები და ეცდებიან დისკრედიტაცია გაუკეთონ ქვეყნის ინტერესებს.
არაერთ მსგავს გაერთიანებას გავიხსენებ, რამდენჯერ გაერთიანდნენ და დაიშალნენ, ვერავინ მოთვლის, ყველა არჩევნებზე დიდწილად ერთიანდებოდნენ და ამ ფორმატით გამოდიოდნენ “ქართული ოცნების” წინააღმდეგ, თუმცა 3 მოწვევის საპარლამენტო და არაერთი შუალედური თუ თვითმმართველობის არჩევნების გამარჯვებული არის “ქართული ოცნება”. შესაბამისად, ეს გაერთიანება მათ არაფერს აძლევთ, მით უფრო, როცა გაერთიანება ხდება “ნაციონალური მოძრაობის” ირგვლივ, რაც გულისხმობს იმას, რომ ადამიანები, ვისთვისაც მნიშვნელოვანია, რომ “ნაციონალური მოძრაობა” არ მობრუნდეს, არ დააბრუნებენ არანაირი ფორმატით, შეუერთდება თუ არა მას ვაშაძე.
ჩვენი წინასაარჩევნო და პოლიტიკური აქცენტია, რომ ორიენტირებული ვიყოთ ქვეყნის ინტერესებზე. ბოლო დროს განვითარებულმა მოვლენებმა, საქართველოს მიმართ ინტერესმა, რომ ჩართული იყოს საომარ პროცესებში და “ქართული ოცნების” ძალიან სწორმა პასუხმა ვფიქრობთ, გაცილებით გაზარდა ჩვენი რეიტინგი. ამას არაერთი კვლევა ადასტურებს, არა მხოლოდ ჩვენი დაკვეთილი, ოპოზიციური პარტიების და არხების კვლევებიც. ჩვენ გვაქვს მოლოდინი და გათვლა, რომ უმრავლესობით მოვა “ქართული ოცნება” და გათვლა გვაქვს იმაზე, რომ ჩვენი ქვეყნის საზოგადოება ათვითცნობიერებს, რამდენად მნიშვნელოვანია ეროვნული და სახელმწიფოს ინტერესებზე ორიენტირებული პოლიტიკური ძალა მოვიდეს 2024 წელსაც,”
ამის შესახებ საპარლამენტო უმრავლესობის წევრმა ნინო წილოსანმა განაცხადა.
”რუსეთი აგრძელებს ჩვენი ქვეყნის ტერორს. რუსი ბარბაროსები მიზანმიმართულად ანადგურებენ კულტურას, მეცნიერებას და რელიგიას. უკრაინა აუცილებლად აღადგენს ყველაფერს, რასაც რუსული სამყაროს სისხლიანი ხელი მისწვდა.
რამდენიმე სიტყვა რუსულად, სპეციალურად რუსებისთვის. რომ იცოდეთ, როგორ სძულხართ ოდესას. თქვენ ებრძვით პატარა ბავშვებს. მართლმადიდებლურ ეკლესიებს. თქვენი რაკეტები სასაფლაოებსაც ანადგურებს. ოდესელებს თქვენ ძალიან ცუდად გვიცნობთ. თქვენ ვერ გაგვტეხთ, მხოლოდ უფრო გაგვაბრაზებთ. ჩვენი დამცველების სიძლიერე გამრავლებული უბრალო ხალხის ტკივილსა და ბრაზზე თქვენი სასჯელი გახდება”.
ასე ეხმაურება ოდესის მერი , გენადი ტრუხანოვი, რუსული ძალების მხრიდან სარაკეტო თავდასხმას.
რუსეთის თავდაცვის სამინისტრო ამტკიცებს, რომ გასულ ღამეს, უკრაინამ ყირიმის ნახევარკუნძულის ტერიტორიაზე არსებულ ობიექტებზე 17 უპილოტო საფრენი აპარატით სცადა “ტერორისტული შეტევა.” უწყება აცხადებს, ყველა დრონი ჩამოაგდეს.
“14 უკრაინული უპილოტო საფრენი აპარატი მწყობრიდან გამოყვანილ იქნა რადიოელექტრონული ბრძოლის საშუალებებით, მათგან 11 შავი ზღვის აკვატორიაში ჩამოვარდა, სამი კი ნახევარკუნძულის ტერიტორიაზე”. – ნათქვამია რუსეთის თავდაცვის განცხადებაში.
რუსეთის თავდაცვის სამინისტროს თქმით, “აღკვეთილ ტერაქტს მსხვერპლი არ მოჰყოლია”.
“გასული კვირას უკრაინამ სამხრეთ ფრონტზე 12 კმ-ზე მეტი გაათავისუფლა” – ამის შესახებ, უკრაინის თავდაცვის მინისტრის მოადგილემ, ანა მალიარმა განაცხადა და ასევე აღნიშნა, რომ უკრაინელები ბახმუტის მიმართულებით 4 კილომეტრით დაწინაურდნენ.
“უკრაინის ჯარებმა სამხრეთ ფრონტზე შეტევის დროს გაათავისუფლეს 192 კვ.კმ-ზე მეტი ტერიტორია. […] უკრაინის ჯარები აგრძელებენ შეტევითი ოპერაციის ჩატარებას რამდენიმე სექტორში მელიტოპოლისა და ბერდიანსკის მიმართულებით” – ნათქვამია ანა მალიარის განცხადებაში.
უკრაინის გენერალური შტაბი რუსი ოკუპანტების სამხედრო დანაკარგების შესახებ განახლებულ ინფორმაციას ავრცელებს. აღნიშნული მონაცემები 2022 წლის 24 თებერვლიდან 24 ივლისამდე პერიოდს მოიცავს.
რუსეთის საერთო დანაკარგები:
ბოლო 24 საათში ოკუპენტებმა 660 სამხედრო, 11 ტანკი და 17 საარტილერიო სისტემა დაკარგეს.
ბელორუსის პრეზიდენტი ამბობს, რომ მას უჭირს ვაგნერელების შეკავება, რომლებიც პოლონეთში წასვლაზე ოცნებობენ.
ალექსანდრე ლუკაშენკო რუსეთში ჩავიდა პრეზიდენტ ვლადიმერ პუტინთან მოსალაპარაკებლად. შეხვედრის დაწყებიდან მალევე გამოცხადდა, რომ გადაწყდა მისი ხანგრძლივობის გაზრდა და დაგეგმილი რამდენიმე საათის ნაცვლად, მოლაპარაკებები ორ დღეს გაგრძელდებოდა.
რუსულმა და ბელორუსულმა ტელეარხებმა გაავრცელეს შეხვედრის დაწყების კადრები, სადაც ბელორუსის ავტორიტარმა ლიდერმა პუტინს უთხრა, რომ მან ჩაიტანა რუკა, რომელიც, მისი თქმით, ასახავს პოლონეთის ჯარების გადასროლას მოკავშირე სახელმწიფოს საზღვრებისკენ.
„მათ დაიწყეს პოლონეთის ჩართვა და აქტიურად აგროვებენ დაქირავებულ მებრძოლებს. მე სპეციალურად მოგიტანეთ რუკა პოლონეთის შეიარაღებული ძალების მოკავშირე სახელმწიფოს საზღვრებთან გადაყვანის შესახებ, რომელზეც ვისაუბრეთ. ჩვენ ვხედავთ, რომ ნიადაგი მზადდება“, – განუცხადა ლუკაშენკომ პუტინს.
წინა რუკა, რომელიც ლუკაშენკომ 2022 წელს უკრაინაში რუსეთის სრულმასშტაბიანი შეჭრის დასაწყისში პუტინთან შეხვედრისას მიიტანა, მისი კომენტარით „ახლა გაჩვენებთ, საიდან მზადდებოდა ბელორუსზე თავდასხმა“, სოციალურ ქსელებში უთვალავი კარიკატურის და მემების წყარო გახდა.
კვირას პუტინთან საუბრისას ლუკაშენკომ (დასავლეთის ქვეყნები მას ბელორუსის ლეგიტიმურ ლიდერად არ ცნობენ) თქვა, რომ ვაგნერის ჯგუფის დაქირავებულები ითხოვდნენ დასავლეთისკენ წასვლას “ვარშავაში ექსკურსიაზე”, რამაც “მისი დაძაბვა გამოიწვია”. ლუკაშენკოს თქმით, ის მათ აკავებს ქვეყნის ცენტრში, მაგრამ დაქირავებული ჯარისკაცები პოლონეთის სამხრეთ-აღმოსავლეთით, ქალაქ ჟეშოვში მიიჩქარიან.
ლუკაშენკო ირწმუნება, თითქოს ვაგნერელებს შურისძიება სურთ პოლონეთზე ბახმუტში გამართული ბრძოლებისთვის, სადაც პოლონური ტექნიკა გამოიყენებოდა.
მისი განცხადებები ბელორუსში ვაგნერის ბოევიკების დიდი ჯგუფის ჩასვლის ფონზე გაკეთდა, რომლებიც იქ იარაღისა და სამხედრო აღჭურვილობის გარეშე წავიდნენ პუტინთან შეთანხმების ფარგლებში, რომელიც მიღწეულ იქქნა ივნისის ბოლოს ვაგნერის დამფუძნებლის ევგენი პრიგოჟინის მიერ განხორციელებული ამბოხის მცდელობის შედეგად, ასევე ამ განცხადებებს წინ უძღვოდა ინფორმაცია ბელრუსში ბირთვული იარაღის განლაგების შესახებ.
რიგი დამკვირვებლები გამოთქვამენ შიშს, რომ კრემლი შესაძლოა გეგმავდეს „ცრუ დროშის“ პროვოკაციას პოლონეთის ან ბალტიისპირეთის ქვეყნების წინააღმდეგ, რათა გააფართოვოს კონფლიქტი და მასში ევროპული სახელმწიფოები ჩართოს.
ბელორუსის ლიდერმა ასევე უთხრა პუტინს, რომ უკრაინის დაშლა მიუღებელია.
„უკრაინის მიწის პოლონეთისთვის გადაცემა მიუღებელია. და თუ დასავლეთ უკრაინის მოსახლეობას ეს დასჭირდება, ჩვენ, რა თქმა უნდა, მხარს დავუჭერთ მათ. გთხოვთ, განიხილოთ და იფიქროთ ამ საკითხზე“, – უთხრა მან პუტინს.
რუსეთის ხელმძღვანელობისგან განსხვავებით, პოლონეთში არც ერთ პოლიტიკურ ძალას არ გამოუთქვამს რაიმე განზრახვა „დაშალოს უკრაინა“ ან რაიმე პრეტენზია გამოთქვას მის ტერიტორიაზე.
ივლისის დასაწყისში პოლონეთმა განათავსა მინიმუმ 1000 ჯარისკაცი და თითქმის 200 ერთეული სამხედრო ტექნიკა ბელორუსის საზღვარზე ქვეყნის საზღვრებთან შესაძლო დესტაბილიზაციის შემთხვევისთვის. პოლონეთ-ბელორუსიის საზღვარზე 5000 პოლონელი მესაზღვრე და 2000 ჯარისკაცი პატრულირებს.