“ჩემთვის არაფერს ნიშნავს, დიდი ბრიტანეთი რას მიიჩნევს და რას არა […] წარმოუდგენელია, არანაირი სამართლებრივი საფუძველი არ არსებობს […] ეს არის არასამართლიანი დამოკიდებულება. რომ ჩავიდეთ და ვიკითხოთ, რომ აი, ძირეულად, რა არის აბა პრობლემა, რატომ ეს ტელევიზიები? – პასუხი და არგუმენტები არ არსებობს”.
“ქართული ოცნების” მერი, კახა კალაძე გაერთიანებული სამეფოს მიერ სამთავრობო მედიების, TV იმედისა და POSTV-ის დასანქცირების საკითხს გამოეხმაურა.
“დეზინფორმაციაა,რომ საქართველოს II ფრონტისკენ მოვუწოდეთ” – უკრაინაში ომის დაწყებიდან ოთხი წლისთავზე საფრანგეთის, გერმანიის და გაერთიანებული სამეფოს ელჩები ერთობლივ წერილს ავრცელებენ.
“2022 წლის 24 თებერვალს, რუსეთის მიერ უკრაინაში სრულმასშტაბიანი შეჭრის დაწყებიდან, საფრანგეთი, გერმანია და გაერთიანებული სამეფო ურყევად იდგნენ უკრაინისა და უკრაინელი ხალხის გვერდით. რუსეთის მიერ უკრაინის წინააღმდეგ ომის დაწყებიდან ზუსტად ოთხი წლის შემდეგ, ჩვენ კიდევ ერთხელ ვადასტურებთ ჩვენს ერთგულებას უკრაინისთვის სამართლიანი და მდგრადი მშვიდობის მიმართ.
აქ, თბილისში, ჩვენ, საფრანგეთის, გერმანიისა და გაერთიანებული სამეფოს სამი ელჩი, სიტყვით გამოვდივართ უკრაინის საელჩოსთან ერთად გამართულ კონფერენციაზე. ჩვენ კვლავ მტკიცედ გვაქვს გადაწყვეტილი, უკრაინას გავუწიოთ კონკრეტული და გრძელვადიანი მხარდაჭერა რუსეთის აგრესიული ომის წინააღმდეგ საბრძოლველად და უკრაინის მდგრადობის გასაძლიერებლად.
2025 წელი გამორჩეული იყო, მსურველთა კოალიციის ფარგლებში მობილიზაციისა და ერთიანობის უპრეცედენტო დონით. 2026 წლის 6 იანვარს პარიზის შეხვედრა გადამწყვეტი ნაბიჯი იყო, რომელმაც დაადასტურა ევროპას, უკრაინასა და შეერთებულ შტატებს შორის კონვერგენცია უკრაინისთვის უსაფრთხოების მყარი გარანტიების უზრუნველყოფის გადამწყვეტი მნიშვნელობის შესახებ. უფრო კონკრეტულად:
• აშშ-ს ხელმძღვანელობით მომავალი ცეცხლის შეწყვეტის მონიტორინგის მექანიზმების შექმნა;
• უკრაინის შეიარაღებული ძალების გრძელვადიანი მხარდაჭერა, რომლებიც რუსული აგრესიის წინააღმდეგ თავდაცვის პირველ ხაზს წარმოადგენენ;
• ცეცხლის შეწყვეტის შეთანხმების ძალაში შესვლის შემდეგ მრავალეროვნული სამშვიდობო ძალების განლაგებისთვის მზადების გაგრძელება;
• რუსეთის მხრიდან შემდგომი აგრესიის შემთხვევაში უკრაინის მხარდაჭერის ვალდებულებების სამართლებრივი ტრანსპოზიცია, სოლიდარობის მექანიზმების მეშვეობით.
ჩვენ გავაგრძელებთ ჩვენს ძალისხმევას ამ მიმართულებით.
ჩვენი პრინციპები ნათელია: უკრაინის სუვერენიტეტი უნდა იყოს დაცული; უკრაინას უნდა შეეძლოს საკუთარი თავის დაცვა; ხოლო უკრაინის მომავლის შესახებ გადაწყვეტილებები უკრაინამ უნდა მიიღოს. ევროპის შესახებ ვერანაირი გადაწყვეტილება ვერ მიიღება ევროპელების გარეშე. საზღვრები ძალის გამოყენებით არ უნდა შეიცვალოს. ამიტომ, ჩვენ მხარს ვუჭერთ პრეზიდენტ ტრამპის სამშვიდობო ინიციატივას და მოვუწოდებთ რუსეთს, კეთილსინდისიერად ჩაერთოს სამშვიდობო ძალისხმევაში და შეწყვიტოს თავდასხმები უკრაინელ მშვიდობიან მოსახლეობაზე. მოსკოვი აცხადებს, რომ მშვიდობისკენ ისწრაფვის, მაშინ როცა უკრაინის სამოქალაქო ინფრასტრუქტურაზე მისი განმეორებითი დარტყმები აჩვენებს რუსეთის უარს, აწარმოოს მოლაპარაკებები ომის დარეგულირების საკითხზე.
ამ თვის დასაწყისში გერმანიისა და დიდი ბრიტანეთის თავდაცვის მინისტრებმა უხელმძღვანელეს უკრაინის თავდაცვის 50-წევრიანი საკონტაქტო ჯგუფის შეხვედრას. 2025 წელს ამ ჯგუფმა უკრაინისთვის დაახლოებით 45 მილიარდი დოლარის სამხედრო დახმარება შეაგროვა. 2026 წლისთვის უკვე შეთანხმებულია დაახლოებით 35 მილიარდი დოლარის გამოყოფა. გასულ კვირას დიდი ბრიტანეთისა და გერმანიის თავდაცვის შტაბების უფროსებმა გამოაქვეყნეს ერთობლივი წერილი, რომელშიც ჩამოაყალიბეს ევროპული თავდაცვის ხარჯების გაზრდის არგუმენტები რუსული საფრთხის გათვალისწინებით, სადაც ნათქვამია: „ამ მცდელობას მორალური განზომილება აქვს. გადაიარაღება არ არის ომის წაქეზება; ეს არის იმ ერების პასუხისმგებლიანი ქმედება, რომლებიც გადაწყვეტილნი არიან დაიცვან თავიანთი ხალხი და შეინარჩუნონ მშვიდობა. ძალა აკავებს აგრესიას, სისუსტე კი იწვევს მას“.
ჩვენ გავაგრძელებთ უკრაინის მხარდაჭერას და გავზრდით ეკონომიკურ ზეწოლას რუსეთზე, რათა საბოლოოდ შეწყვიტოს მისი დაბომბვა და დათანხმდეს დაუყოვნებლივ და ყოვლისმომცველ ცეცხლის შეწყვეტას. ამ კვირაში ევროკავშირი და დიდი ბრიტანეთი შემოიღებენ დამატებით სანქციებს, რომლებიც რუსული ენერგორესურსების ექსპორტსა და ჩრდილოვანი ფლოტის გემებს ეხება.
ჩვენ სრულად ვაცნობიერებთ, თუ რა ღრმა გავლენას ახდენს საქართველოს მოსახლეობაზე რუსეთის შეჭრა უკრაინაში. ქართველებმა იციან რუსული შეჭრის და მათი ტერიტორიის 20%-ის ოკუპაციის ტკივილი. მტკიცება, რომ გერმანიამ, საფრანგეთმა ან დიდმა ბრიტანეთმა მოუწოდეს საქართველოს ამ კონფლიქტში მეორე ფრონტის გახსნისკენ, მცდარია და წარმოადგენს დეზინფორმაციას. ჩვენ კვლავ მტკიცედ ვუჭერთ მხარს საქართველოს სუვერენიტეტს და მის უფლებას, განსაზღვროს საკუთარი უსაფრთხოების არჩევანი. ამ კონტექსტში, ჩვენ ვაგრძელებთ თანამშრომლობას საქართველოს თავდაცვის ძალებთან ნატოს ფარგლებში, რათა გავაძლიეროთ მათი თავდაცვითი შესაძლებლობები პოტენციური აგრესიის წინააღმდეგ და წვლილი შევიტანოთ სამხრეთ კავკასიასა და ევროპაში უსაფრთხოების უზრუნველყოფაში.
საქართველო მხარს უჭერს უკრაინას და მის ევროპელ პარტნიორებს სუვერენიტეტის პრინციპების დასაცავად, რუსეთის აგრესიის დაგმობის, რუსეთის ადამიანის უფლებების დარღვევისთვის პასუხისმგებლობის დაკისრების მცდელობების მხარდასაჭერად და საერთაშორისო ბირთვული უსაფრთხოების სტანდარტების გასაძლიერებლად. საქართველო არის უკრაინის თავდაცვის საკონტაქტო ჯგუფის წევრი, რომელსაც ჩვენ ვხელმძღვანელობთ და რადგან რუსეთი ცდილობს ზამთრის იარაღად გამოყენებას უკრაინის ენერგეტიკულ ინფრასტრუქტურაზე თავდასხმით, ჩვენ მივესალმებით საქართველოს მთავრობის გადაწყვეტილებას, უკრაინას გადასცეს 1.5 მილიონი ლარის ღირებულების გენერატორები.
დარწმუნებულები ვართ, რომ საქართველოს შეუძლია მნიშვნელოვანი როლი შეასრულოს ევროპის უსაფრთხოების განმტკიცებაში რუსეთის სამხედრო შეიარაღებაზე წვდომის შეზღუდვის გაგრძელებით, საერთაშორისო სანქციების დაცვისა და მათი გვერდის ავლის ნებისმიერი მცდელობის წინააღმდეგ გადამწყვეტი ზომების მიღებით. საქართველოს ასევე შეუძლია წვლილი შეიტანოს რუსეთის ჩრდილოვანი ფლოტიდან იმპორტის თავიდან აცილების მცდელობების გაგრძელებით, რომელიც სანქციებისგან თავის არიდებას ცდილობს და საზღვაო უსაფრთხოებას სერიოზულ საფრთხეს უქმნის.
ევროატლანტიკელ პარტნიორებთან ურთიერთობების აღდგენის პრიორიტეტულობის მინიჭებით და რუსულ ნავთობზე დამოკიდებულების შემცირების მცდელობით, საქართველოს შეუძლია გააძლიეროს თავისი უსაფრთხოება, სუვერენიტეტი და შეამციროს მისი დაუცველობა რუსეთის ზეწოლის მიმართ. რუსეთი არ არის საიმედო ენერგეტიკული პარტნიორი და ენერგორესურსების დივერსიფიკაცია დაეხმარება საქართველოს სუვერენიტეტისა და თავისუფლების დაცვაში, ამავდროულად ხელს შეუწყობს რა ევროპის უფრო ფართო მიზანს – ენერგეტიკულ მდგრადობას.
ჩვენ მზად ვართ ვითანამშრომლოთ საქართველოსთან ამ კრიტიკულ საკითხებზე.
მიუხედავად იმისა, რომ ვხედავთ იმ მძიმე ფასს, რომელსაც უკრაინელი ხალხი ყოველდღიურად იხდის რუსული აგრესიის წინააღმდეგ ბრძოლაში, ჩვენ ვიცით, რომ ქართველი ხალხის უსაფრთხოება კვლავ საფრთხის ქვეშაა იმავე აგრესორის მხრიდან.
უკრაინაში სამართლიანი და მდგრადი მშვიდობის დამყარება, ასევე ევროპაში სუვერენიტეტის პრინციპების დაცვა ხელს შეუწყობს საქართველოსთვის გრძელვადიანი სტაბილურობისა და მშვიდობიანი მომავლის უზრუნველყოფას” – ნათქვამია ოლივიე კურტოს (საფრანგეთი), პეტერ ფიშერის (გერმანია) და გარეთ უორდის (გაერთიანებული სამეფო) ერთობლივ წერილში.
“ვიწყებთ ქიმიური მოწამვლის შესახებ ინფორმაციის შეგროვებას ” – ნათქვამია, ოპოზიციური პარტიების, ახალის, ნაციონალური მოძრაობის, დროას, გირჩი მეტი თავისუფლების, სტრატეგია აღმაშენებლის და ლელო ძლიერი საქართველოს, თავისუფლების მოედნის, მიერ გავრცელებულ განცხადებაში.
“ქართველ ექსპერტებთან ერთად წამების მსხვერპლთა რეაბილიტაციის საერთაშორისო საბჭომ (IRCT) და დამოუკიდებელი სასამართლო ექსპერტების ჯგუფმა (IFEG) შეიმუშავეს კითხვარი, რომლის საფუძველზეც დაიწერება დასკვნა.მოვუწოდებთ პროტესტის მონაწილეე მოქალაქეებს გამოიყენონ ეს შესაძლებლობა და მკვლევარებს გაუზიარონ საკუთარი გამოცდილება. ჩვენ უნდა ვიცოდეთ, თუ რა ჯანმრთელობის პრობლემები გამოიწვია მოსახლეობის წინააღმდეგ ქიმიური ნივთიერებების გამოყენებამ.წინამდებარე კითხვარის შევსებით თქვენ გვეხმარებით დავადგინოთ სიმართლე ქიმიური მოწმავლის შესახებ.მადლობა ნდობისთვის”. – ნათქვამია განცხადებაში.
“ასეთი პროცესის დახურვა ემსახურება ერთადერთ მიზანს, რომ საზოგადოებისთვის უცნობი დარჩეს აბსურდული ბრალდებები, რომელსაც ახლა ვხვდებით სასამართლო პროცესზე. ჩემი აზრით, რეალურად, ასეთი პროცესი არის ქვეყნის და სახელმწიფოს საბოტაჟი. თუკი რაიმე შეიძლება იყოს საბოტაჟი ჩვენი ქვეყნის და ჩვენი სახელმწიფოსი, არის ეს პროცესი და ოპოზიციის ჯგუფური გასამართლება. სხდომის დახურვა კიდევ ერთხელ ამყარებს ჩემს მიერ გამოთქმულ მოსაზრებას, რომ ეს არის სახელმწიფოსთვის ძალიან საზიანო პროცესი, რომლის შეფასება ძალიან ძნელია – ზიანის, რომელსაც შეიძლება პროცესი აყენებს ჩვენს სახელმწიფოს და საზოგადოებას. დღევანდელი სხდომაც ვფიქრობ, სწორედ იმის კარგი დემონსტრირებაა, რომ კარგად არ აქვთ გაცნობიერებული ამ პროცესის მონაწილეებს, თუ რაოდენ დიდი ზიანი ადგება ჩვენ ქვეყანას ამ პროცესით. დახურვა, რა თქმა უნდა, კიდევ ერთი დამატებითი ზიანის მომტანი იქნება ჩვენი ქვეყნის, ჩვენი სახელმწიფოსთვის”,
ე.წ. საბოტაჟის საქმეზე „კოალიცია ცვლილებებისთვის“ ლიდერს, ნიკა გვარამიას აღკვეთის ღონისძიების სახით 30 000-ლარიანი გირაო შეეფარდა. გადაწყვეტილება თბილისის საქალაქო სასამართლოს მოსამართლემ თამარ მახარობლიძემ დახურულ სხდომაზე მიიღო.
გვარამიას ასევე აეკრძალა საგამოძიებო ორგანოს ინფორმირების გარეშე საზღვრის კვეთა, გვარამიას ჩამოერთვა პასპორტიც.
ცნობისთვის, ე.წ. საბოტაჟის საქმეზე გენერალურმა პროკურატურამ მიხეილ სააკაშვილს, გიორგი ვაშაძეს, ნიკა გვარამიას, ნიკა მელიას, ზურაბ გირჩი ჯაფარიძეს, ელენე ხოშტარიას, მამუკა ხაზარაძესა და ბადრი ჯაფარიძეს ბრალდება წარუდგინა. გიორგი ვაშაძეს და ზურაბ გირჩი ჯაფარიძეს ბრალი სისხლის სამართლის კოდექსის 318-ე მუხლის პირველი ნაწილით და 319-ე მუხლით წარედგინათ, რაც საბოტაჟს და უცხო ქვეყნისათვის მტრულ საქმიანობაში დახმარებას გულისხმობს. აღნიშნული სასჯელის სახედ და ზომად 7-დან 15- წლამდე თავისუფლების აღკვეთას გულისხმობს.
ელენე ხოშტარიას ბრალდება საქართველოს სისხლის სამართლის კოდექსის 318-ე მუხლის პირველი ნაწილით, 319-ე მუხლით და 321-ე პრიმა მუხლის პირველი ნაწილით წარედგინა, რაც საბოტაჟის, აღნიშნული დანაშაულისთვის მატერიალური რესურსების მიწოდებას და უცხო ქვეყნისათვის მტრულ საქმიანობაში დახმარებას გულისხმობს.
ნიკა გვარამიას, ნიკა მელიას, მამუკა ხაზარაძეს და ბადრი ჯაფარიძეს ბრალდება საქართველოს სისხლის სამართლის კოდექსის 318-ე მუხლის პირველი ნაწილით წარედგინათ, რაც საბოტაჟს გულისხმობს.
მიხეილ სააკაშვილს ბრალდება სისხლის სამართლის კოდექსის 317-ე მუხლით აქვს წარდგენილი, რაც საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ მოწოდებას გულისხმობს.
აღნიშნულ საქმეში გიორგი ვაშაძეს და ზურაბ გირჩი ჯაფარიძეს აღკვეთის ღონისძიების სახით 30 000-ლარიანი, მამუკა ხაზარაძესა და ბადრი ჯაფარიძეს კი 1 მილიონი ლარი გირაო აქვთ შეფარდებული.
” ვიდრე ამ ქვეყანაში არსებული პოლიტიკური ძალების ყველა ლიდერი ერთად ზის განსასჯელის სკამზე, იმ ქვეყანას არანაირი დაახლოება არ უწერია დასავლეთთან” – ამის შესახებ „კოალიცია ცვლილებებისთვის“ ერთ-ერთმა ლიდერმა ზურაბ-გირჩი ჯაფარიძემ ჟურნალისტებს განუცხადა.
„არანაირი მტკიცებულებები, ცხადია, ამ 45 ტომში არ არის. მეტიც, უამრავი რაღაც არის ჩაყრილი, რომელიც საერთოდ, ვისთან ან რასთან არის კავშირში, სრულიად გაუგებარია. არის ჩაყრილი კონკრეტული ადამიანების პირადი მონაცემებიც – საბანკო ამონაწერები, ვიღაცების ოფისის ჩხრეკის რაღაც ოქმი. ეს ყველაფერი, რა კავშირშია მარტო ჩემთან კი არა, არამედ ვინმესთან, საერთოდ გაუგებარია. ჩემი სახელი ნახსენები არის 12-ჯერ, დათვლილი მაქვს და თორმეტივე არის პოლიციელების ჩვენება, რომლებიც ჰყვებიან რაღაც ზღაპრებს, რომ ნოემბერ-დეკემბრის მოვლენების დროს რუსთაველზე ხედავდნენ, რომ იქ ვიყავი. ვიღაცები ჰყვებიან რაღაც ზღაპრებს, როგორიც არის მაგალითად: ხედავდნენ, რომ ნიღბიანი ახალგაზრდები, როდესაც მიახლოვდებოდნენ მე და მერე რომ დამშორდებოდნენ ხდებოდნენ უფრო აგრესიულები – ბოდვა, სრული ბოდვა, ოღონდ ამის არანაირი ვიდეო მტკიცებულება არ არსებობს, რომ ეს, მართლა ასე ხდებოდა, არაფერი არ არსებობს საერთოდ. პლიუს, სადაც ჩემი და სხვების სახელი არის ნახსენები, არის კომენტარები, თქვენ [ჟურნალისტებს] რომ გაძლევთ კომენტარს იმაზე, რომ ივანიშვილი და მისი საყრდენები არიან დასასანქცირებელი.
[ეს საქმე „ქართულ ოცნებას”] სჭირდება, ერთი, იმისათვის, რომ უნდათ სურათი დახატონ, რომ ყველა ოპოზიციონერი ლიდერი ერთად არის, თავის მიშას ჩათვლით, რომ კოლექტიური „ნაციონალური მოძრაობა“ თუ რაღაც ერთად დასვას განსასჯელის სკამზე. მეორე – დრო მაკარგვინონ, დროს ვკარგავ, რატომ უნდა მოვიდე აქ. ისედაც რამდენი სასამართლოს პროცესია, რომელზეც დავდივარ ხოლმე და ახლა, საკუთარ სასამართლოზე უნდა ვიარო და კიდევ, ამ რაღაც ბოდვაში, 45 ტომში ხომ უნდა გაერკვე და რაღაცაზე რომ იქნება ლაპარაკი, პასუხი ხომ უნდა გასცე. საბოლოო ჯამში, მთავარი მიზანი არის ის, რომ ბოლომდე ჩაჭრან ის ძაფები, თუ რამე დარჩა დამაკავშირებელი ამ ქვეყანას დასავლეთთან და ცივილიზებულ სამყაროსთან.
გავიმეორებ, ყველასთვის გასაგებია, რომ სანამ ამ ქვეყანაში არსებული პოლიტიკური ძალების ყველა ლიდერი ერთად ზის განსასჯელის სკამზე, იმ ქვეყანას არანაირი დაახლოება არ უწერია დასავლეთთან, ევროკავშირთან, ნატო-სთან და ა.შ“, – განაცხადა ზურაბ ჯაფარიძემ.
ბათუმის ერთ-ერთ კლინიკაში კლინიკის სანიტარმა საპირფარეშოში იმშობიარა, რის შემდეგაც ახალშობილს დაზიანებები მიაყენა და მისი მოკვლა სცადა. შემთხვევა გამთენიას მოხდა.
კლინიკის დირექტორი ამბობს, რომ ახალშობილის მდგომარეობა მძიმეა.
გამოძიება სისხლის სამართლის კოდექსის 11 პრიმა 19-109-ე მუხლით დაიწყო, რაც ოჯახის წევრის მიმართ განსაკუთრებული სისასტიკით ჩადენილ განზრახ მკვლელობის მცდელობას გულისხმობს.
საქართველოს ყოფილი მთავარი პროკურორი, ფარცხალაძე წაყენებულ ბრალს არ აღიარებს. ამის შესახებ ის რუსულ მედიას ესაუბრა, რომელიც წერს, რომ “საქართველოს ყოფილი მთავარი პროკურორი, რუსეთის მოქალაქე ოთარ ფარცხალაძე 2025 წლის დეკემბერში ფიგურანტი გახდა სისხლის სამართლის საქმეში, რომელიც თბილისში ბიზნესმენ ლევან ჯანგველაძის მკვლელობას ეხება. საქართველოს დედაქალაქში სროლის შესახებ ინფორმაციის გავრცელებისას, მედიასაშუალებები მოკლულს მოიხსენიებდნენ როგორც კრიმინალურ ავტორიტეტს და რუსეთისა და პოსტსაბჭოთა სივრცის დიდი ნაწილის დანაშაულებრივი სამყაროს „რუხ კარდინალს“. მსროლელმა დანაშაული აღიარა, თუმცა უარყო, რომ მკვლელობა შეკვეთილი იყო. გამოძიების ვერსიით კი, მკვლელობის ორგანიზატორი საქართველოს ყოფილი მთავარი პროკურორი ოთარ ფარცხალაძე იყო. ამის შესახებ 2025 წლის დეკემბერში ქვეყნის შინაგან საქმეთა მინისტრის მოადგილემ განაცხადა.“
ფარცხალაძე ამბობს, რომ საქმე „უცხოელი პატრონების“ მითითებითაა შეთითხნილი:
“ მდევნიან შეთითხნილი დანაშაულების გამო, იმისთვის, რაც არ ჩამიდენია, და ცდილობენ ისტორიული სამშობლო წამართვან. საერთაშორისო დანაშაულებრივმა ჯგუფებმა ჩემზე ნადირობა გამოაცხადეს. არ მეშინია. ეს ყველაფერი საუკეთესო მტკიცებულებაა იმისა, რომ ჩემი არჩეული გზა მართალია. მზად ვარ სიცოცხლე შევწირო ჩვენი შვილების ბედნიერი მომავლისთვის.
დროა წარსულში დავტოვოთ ძველი წყენები, რომლებიც ჩვენი ხალხის მტრებმა შექმნეს, და წინ წავიდეთ. საქართველოს ხალხმა თვალები უნდა გაახილოს და გაიგოს, ვინ მოქმედებს მისი ინტერესებისთვის და ვინ ხლართავს ინტრიგებს უცხოელი პატრონების სამსახურში, ანგრევს ჩვენს თვითმყოფადობას, წეს-ჩვეულებებს და ერთობას. ასე შევძლებთ შევინარჩუნოთ ჩვენი სუვერენიტეტი, ტრადიციები და რწმენა.“
ჟურნალისტის კითხვაზე, როგორ შეიძლება სუვერენიტეტის, ტრადიციების და რწმენის შენარჩუნება, ფარცხალაძე პასუხობს:
“ სამშობლოს –საქართველოს სამსახურის სახელით გრძელი და სახიფათო გზა გავიარე. და დღეს იმ წერტილში აღმოვჩნდი, საიდანაც ვიცი, რომ ძმურ ერებს შორის ურთიერთობის ახალი გვერდი დაიწყება. რთულ დროს ვცხოვრობთ, დროში, როდესაც ძველი ჭრილობები ჯერ ბოლომდე არ მოშუშებულა, ხოლო ცხოვრება უკვე ახალ გამოწვევებს გვიგზავნის.
და როგორც საკუთარ შეცდომებზე, ისე ჩვენი უახლოესი მეზობლების შეცდომებზე დაკვირვებით დავრწმუნდით, პასუხის ვარიანტი მხოლოდ ორი გვაქვს.
პირველი ვარიანტი – ეს არის ჩვენი ისტორიის, რწმენის, მეგობრებისა და ძმების ღალატი; იმის მცირე ნაწილის დათმობა, რაც გვაქვს, თავისუფლების ილუზიის სანაცვლოდ. თავისუფლებისა მორალისგან და ჩვენი ტრადიციებისგან. თავისუფლებისა იმისგან, რომ მამაკაცები იყვნენ დამცველები, ხოლო ქალები დედები.
მეორე – კვლავ გაერთიანება და ღვთის გზის ძიება, რომელიც ჩვენს ხალხს კეთილდღეობამდე მიიყვანს.მართლმადიდებლური სარწმუნოება გვაერთიანებს.
ჩვენი ისტორია სავსეა ტრაგიკული მომენტებითა და გმირული ქმედებებით. გვახსოვს, როგორ დაიღუპა 400 000-ზე მეტი ქართველი დიდ სამამულო ომში, წითელი არმიის მხარეს იბრძოდა ჩვენი სამშობლოს თავისუფლებისა და ღირსებისთვის, გაერთიანებული ფაშისტური ევროპის წინააღმდეგ ბრძოლაში. ეს გმირული თავგანწირვა ამტკიცებს ჩვენს კავშირებს პოსტსაბჭოთა სივრცის ყველა იმ ხალხთან, რომლებმაც ჩვენთან ერთად გაიზიარეს ისტორიის ეს მძიმე ფურცლები.
მე მთელ ჩემს ძალისხმევას მივმართავ ქართველ და რუს ხალხებს შორის ძმური ურთიერთობების განმტკიცებისკენ, რომელიც დაფუძნებული იქნება პატივისცემაზე, ერთობაზე და გარე საფრთხეების წინააღმდეგ ერთობლივ წინააღმდეგობაზე.“– ამბობს ფარცხალაძე რუსულ მედიასთან.
ჩვენ მზად ვართ რეალური კომპრომისებისთვის. მაგრამ არა ისეთი კომპრომისებისთვის, რომლებიც ჩვენს დამოუკიდებლობასა და სუვერენიტეტს დააზიანებს. მზად ვართ კომპრომისებზე საუბრისთვის ამერიკის შეერთებულ შტატებთან. მაგრამ აღარ ვაპირებთ რუსებისგან ისევ და ისევ ულტიმატუმების მიღებას. ისინი აგრესორები არიან. ეს ყველამ აღიარა. ეს არ შეცვლილა. ბევრი ქვეყანა, რომელიც ამ ომის დასაწყისშივე შუამავალი იყო ან ცდილობდა შუამავლობას – განსაკუთრებით ახლო აღმოსავლეთსა და აზიაში, ასევე სხვა ქვეყნებიც – ყველა აღიარებს, რომ რუსეთი აგრესორია.
ამიტომაც ჩვენი მხრიდან უკვე კომპრომისია, რომ აგრესორთან კომპრომისებზე ვსაუბრობთ. “დავრჩეთ იქ, სადაც ახლა ვართ” – ეს უკვე დიდი კომპრომისია. მათ ჩვენი ტერიტორიის თითქმის 20% დაიკავეს. და ჩვენ მზად ვართ მშვიდობაზე ვისაუბროთ ამ ეტაპზე სწორედ პრინციპით – “დავრჩეთ იქ, სადაც ვართ”. ეს ძალიან დიდი კომპრომისია.
რას გვთავაზობს რუსეთი კომპრომისად? რაზე არიან ისინი მზად? ისინი ამბობენ: “მზად ვართ აღარ დავიკავოთ თქვენი სხვა რეგიონები”. მაგრამ ეს ტერორიზმია. თვით ეს ენა არის ტერორიზმი. “მზად ვარ არ მოგკლა – მოგვცით ყველაფერი“. რას ნიშნავს ეს? ეს კომპრომისი არ არის. ეს ულტიმატუმია.
ამიტომაც ვთქვი: ჩვენ მზად ვართ ისეთი კომპრომისებისთვის, რომლებიც პატივს სცემს უკრაინის სუვერენიტეტს და ტერიტორიულ მთლიანობას, ჩვენს არმიას, ჩვენს ხალხს და ჩვენს შვილებს. მაგრამ ულტიმატუმებისთვის მზად არ ვართ.
წერს უკრაინის პრეზიდენტი ვოლოდიმირ ზელენსკი X-ზე.
„მე სხვა მუხლი მაქვს წაყენებული, ჩემს ოჯახის წევრს და ჩემს ყოფილ მოადგილეს, სხვა მუხლი, მაგრამ არ მინდა ისე წარმოჩინდეს, რომ მხოლოდ ჩემი თავი წარმოვაჩინო. მინდა დაგანახოთ, სიმართლე როგორ იყო, რა თქმა უნდა, ეს არის ჩემი პირველი ამოცანა. რა თქმა უნდა, მორალურ პასუხისმგებლობას და ფინანსურიც თუ იქნება, გავიზიარებ – ეს იყო ჩემი ცოლის ძმის რაღაც ქმედების გამო გამოწვეული, თუ სამინისტროში რაღაც არასწორი გავაკეთეთ. არ ვაპირებ ჯოხის სხვაზე გადატეხვას, მინდა იცოდეთ, რომ ორივე შემთხვევაში, ბრალეულობა გამოიკვეთება თუ არა, ჩემი ცოლის ძმის თუ თანამშრომლების, ამ პასუხისმგებლობას გავიზიარებ, სამართლებრივად შეიძლება მე შემეხოს, მაგრამ მორალურად პასუხისმგებლობას ყველა შემთხვევაში გავიზიარებ”,
ამის შესახებ თავდაცვის ყოფილმა მინისტრმა ჯუანშერ ბურჭულაძემ სასამართლო პროცესზე განაცხადა.