Category: სხვადასხვა

ფიფას ყოფილმა პრეზიდენტმა ზეპ ბლატერმა შვეიცარიულ გაზეთ Tages Anzeiger-თან ინტერვიუში აღიარა, რომ გადაწყვეტილება 2022 წლის მსოფლიო ჩემპიონატის ყატარში ჩატარების შესახებ შეცდომა იყო.

“ეს ძალიან პატარა ქვეყანაა და მსოფლიო ჩემპიონატი ძალიან დიდია მისთვის”, – თქვა ბლატერმა.

FIFA-ს აღმასრულებელმა კომიტეტმა ხმათა უმრავლესობით – 14 რვის წინააღმდეგ დაუჭირა მხარი 2022 წლის მსოფლიო ჩემპიონატის ჩატარებას ყატარში 12 წლის წინ, როდესაც ბლატერი ამ ორგანიზაციის სათავეში იყო. თავად ბლატერი აცხადებს, რომ მან ხმა მისცა აშშ-ს კანდიდატურას და ყველაფერში უეფას პრეზიდენტ მიშელ პლატინის ადანაშაულებს, რომელმაც ვითომ სასწორი ყატარის სასარგებლოდ გადახარა.

”მაშინ, უკვე სოციალური  საფუძვლები  და ადამიანის უფლებები ამოქმედდა,” – ამბობს ის.

მაშინაც კი, უფლებადამცველები აკრიტიკებდნენ ამ ქვეყანას ლგბტ თემის წარმომადგენლების მიმართ შეუწყნარებლობის, ადამიანის უფლებების დარღვევისა და შრომითი მიგრანტების მიმართ ცუდი დამოკიდებულების გამო. თუმცა,  ამის მიუხედავად ისტორიაში პირველად მსოფლიო ჩემპიონატი ახლო აღმოსავლეთში ჩატარდება, კონკრეტულად კი ყატარში. ჩემპიონატის ჩატარება 20 ნოემბრიდან 18 დეკემბრის ჩათვლით არის დაგეგმილი. ის ზაფხულიდან ზამთრისთვის გადაიდო, რადგან ყატარში ზაფხულში ძალიან ცხელა.

ამასთან, 2010 წელს ფიფას აღმასრულებელი კომიტეტის იმავე სხდომაზე გადაწყდა, 2018 წლის მსოფლიო ჩემპიონატის რუსეთში ჩატარება, მაგრამ ბლატერი ამას არ ნანობს ინტერვიუში და რუსეთის პრეზიდენტ ვლადიმირ პუტინს თავის მეგობარსაც კი უწოდებს. თუმცა ყოფილს, რადგან დიდი ხანია მასთან ურთიერთობა არ აქვს.

ბლატერის თქმით, ფიფას აღმასრულებელ კომიტეტში იყო შეთანხმება, რომ 2018 წლის მსოფლიო ჩემპიონატი რუსეთში გამართულიყო, ხოლო შემდეგი ჩემპიონატი აშშ-ში. კომიტეტის თვალსაზრისით, თუ ორი დიდი ხნის მეტოქე რიგრიგობით უმასპინძლებს ჩემპიონატს, ეს იქნებოდა კეთილი ნების ჟესტი და ფეხბურთის ეგიდით.

მაგრამ კენჭისყრამდე ერთი კვირით ადრე, ბლატერის თქმით, მიშელ პლატინიმ დაურეკა და უთხრა: “Sepp, ça ne va plus jouer”, ანუ ძველი გეგმა უნდა გაუქმდეს. და ეს იმიტომ, რომ ის, ანუ პლატინი, მიწვეული იყო ელისეის სასახლეში, სადაც ნიკოლა სარკოზიმ ყატარის პრინცის საპატივსაცემოდ ვახშამი გამართა. საფრანგეთის პრეზიდენტმა კი თითქოს მეგობრულად ჰკითხა: “მიშელ, რა შეგიძლიათ გააკეთოთ შენ და შენმა კოლეგებმა უეფადან, რომ ყატარმა ჩემპიონატი ჩაატაროს?”

„ზეპ, რას გააკეთებდი, პრეზიდენტმა რომ რამე გთხოვოს?“ მკითხა პლატინიმ. მე ვუპასუხე, რომ შვეიცარიაში პრეზიდენტი არ გვყავს, მაგრამ ბოლოს ეს ყველაფერი პლატინის წყალობით და მისი ხალხისი წყალობით ასე გამოივდა და  ყატარმა მიიღო ჩემპიონატი და არა ამერიკამ. ექვსი თვის შემდეგ კი ყატარმა იყიდა 14 მილიარდ დოლარზე მეტი ღირებულების საბრძოლო თვითმფრინავები საფრანგეთისგან.“– ყვება ბლატერი.

შვეიცარიელმა ჟურნალისტებმა ბლატერს კითხეს, შეცდომა იყო თუ არა 2018 წლის მსოფლიო ჩემპიონატის მასპინძლობის უფლების რუსეთისთვის მიცემა.

ბლატერი ამტკიცებს, რომ ეს ნამდვილად არ იყო შეცდომა.

“ჩვენს გეგმას რომ ემუშავა და 2022 წლის მსოფლიო ჩემპიონატი ამერიკაში ჩატარებულიყო, თქვენთან ჩვენი საუბარი სულ სხვა მიმართულებით წარიმართებოდა, ან საერთოდ არ მოხდებოდა. და რუსეთმა კარგად მოახერხა ჩემპიონატის ორგანიზება“– ამბობს ბლატერი.

ჟურნალისტების კითხვაზე, რომ  ვლადიმერ პუტინმა  ეს ჩემპიონატი, როგორც პროპაგანდისტული ინსტრუმენტი გამოიყენა,”მას სურდა წარმოედგინა რუსეთი, როგორც მშვიდობისმოყვარე სპორტული ძალა, მაგრამ დღეს უკრაინაში ჩვენ ვხედავთ რუსეთის სრულიად განსხვავებულ სახეს”, ბლატერი პასუხობს:

“მერე რა, ბევრი ადამიანი იყენებს სპორტს პოლიტიკური მიზნებისთვის. მე ვერ ვიქნები ამის მსაჯული”.

”მაგრამ პუტინმა პირადად მიგიწვიათ რუსეთში 2018 წლის მსოფლიო ჩემპიონატზე…”–კითხა ჟურნალისტმა.

”მე მასთან აღარ მაქვს ურთიერთობა“- ამბობს ბლატერი, ”პუტინი ყოველთვის ფრთხილი იყო, ის არ წასულა ციურიხში FIFA-ს აღმასრულებელ კომიტეტში 2010 წელს და მხოლოდ მაშინ, როდესაც რუსეთმა გაიმარჯვა,  გაფრინდა კალინინგრადიდან და მოიწვია პრესკონფერენცია, შემდეგ კი მითხრა: „ახლა ვხედავ, რომ შემიძლია გენდოთ. ახლა ჩვენ მეგობრები ვართ”.

“რა დაემართა თქვენს მეგობარს?” – ჰკითხეს ბლატერს ჟურნალისტებმა.

“მე აღარ მაქვს მასთან ურთიერთობა და ვგმობ რუსეთის მიერ უკრაინის წინააღმდეგ გაჩაღებულ ომს”, – უპასუხა ბლატერმა.

ზეპ ბლატერმა 17 წელი გაატარა ფიფას პრეზიდენტის პოსტზე, მაგრამ 2015 წელს ის იძულებული გახდა კორუფციაში ბრალდებების გამო  გადამდგარიყო (და ეს ძალიან უხალისოდ გააკეთა).მას ბრალი ედებოდა იმავე მიშელ პლატინის ანგარიშზე 2 მილიონი შვეიცარული ფრანკის (თითქმის 2,2 მილიონი დოლარის) გადარიცხვაში, რომელსაც ასევე უეფას მაღალი თანამდებობის დატოვება მოუწია.

თავიდან ბლატერს 8 წლით აუკრძალეს ფეხბურთთან რამენაირი შეხება. შემდეგ ეს ვადა 6 წლამდე შემცირდა, მაგრამ 2021 წლის მარტში ფიფას ეთიკის კოდექსის სხვადასხვა დარღვევისთვის აკრძალვა კვლავ 2028 წლამდე გაგრძელდა.

გასული წლის ნოემბერში ბლატერსა და პლატინის ბრალი წაუყენეს თაღლითობაში, მაგრამ ივლისში შვეიცარიის სასამართლომ ისინი უდანაშაულოდ სცნო.

იმავდროულად, რუსეთსა და ყატარში 2018 და 2022 წლების მსოფლიო ჩემპიონატების ჩატარების შესახებ გადაწყვეტილებები კვლავ საკამათოა და კორუფციის მრავალმა ბრალდებამ აიძულა შვეიცარიის პროკურორები და აშშ-ს იუსტიციის დეპარტამენტი 2015 წელს გამოეცხადებინათ, რომ ისინი საკუთარ გამოძიებას ჩაატარებენ. ასე რომ, შესაძლებელია,  ბლატერს და პლატინის კვლავ მოუწიოთ პასუხის გაცემა გამოძიების კითხვებზე.

ყატარიც და რუსეთიც კატეგორიულად უარყოფენ უკანონო თაღლითობაში მონაწილეობას, მსოფლიო ჩემპიონატის მასპინძლობის უფლების მისაღებად უფლება. ფიფამ კი საკუთარი გამოძიების შედეგების მიხედვით, მათ მიმართ ყველა ეჭვი ჯერ კიდევ 2017 წელს მოხსნა.

ხერსონის ოლქის ქალაქ სკადოვსკში რუსეთის საოკუპაციო ხელისუფლებამ საჯაროდ დასაჯა სიკვდილით 56 წლის ტატიანა მუდრენკო, რომელიც ოკუპაციას გმობდა. ამის შესახებ ამერიკული გამოცემა Financial Times მოკლული ქალის დაზე, ნატალია ჩერნაიაზა დაყრდნობით წერს.

ტატიანა მუდრენკო, რომელიც პროფესიით ექთანი იყო, საჯარო დგამოხატავდა პროუკრაინულ პოზიციას უშუალოდ რუსი სამხედროების წინაშე და მათ ორკებს უწოდებდა. ბოლო ცნობილი შემთხვევა ოქტომბრის დასაწყისში მოხდა, როცა ქალმა ადგილობრივი პოლიცია რუსულ არმიასთან თანამშრომლობის გამო გააკრიტიკა და დაიყვირა: “სკადოვსკი– უკრაინაა!“ 7 ოქტომბერს ნატალიამ დას დნეპრიდან დაურეკა, თუმცა მალევე კავშირი შეწყდა.

გარკვეული დროის შემდეგ კი სკადოვსკის მაცხოვრებლების თქმით, პრორუსულმა პოლიციამ ტატიანა და მისი ქმარი, ანატოლი ორეხოვი მათი სახლის ეზოდან გაიტაცა.

კოლაბორანტებმა სახლი გაჩხრიკეს, ასევე წაიყვანეს წყვილის ავტომობილი და ველოსიპედები. 15 ოქტომბერს ერთ–ერთმა ქალმა დაურეკა ნატალიას, რათა საშინელი ამბავი შეეტყობინებინა: მისი და გაასამართლეს და სიკვდილით დასჯა მიუსაჯეს.

“მან მითხრა, რომ ტანია ჩამოახრჩეს. პირში რაღაც ჩაასხეს, შემდეგ კი სასამართლოს შენობის წინ ჩამოკიდეს“– უყვება ნატალია ჩერნაია ჟურნალისტებს.

ქალის თქმით, ვინც მოკლულის დას დაურეკა, ანატოლი არეხოვი პატიმრობიდან დამტვრეული ხელებით და სხვა ტრავმებით გამოვიდა, რაც მეტყველებდა, რომ ის სასტიკად სცემეს. მას ცოლის დაკრძალვის უფლება მისცეს, შემდეგ კი კაცი უკვალოდ გაქრა.

ნატალია ჩერნაიამ სკადოვსკის საქალაქო მორგს მიმართა და შეეცადა დის ბედი გაერკვია. თავიდან მასთან ლაპარაკი არავის უნდოდა, შემდეგ კი გარდაცვალების ცნობა გაუგზავნეს, რომელშიც მიზეზად მითითებულია “მექანიკური ასფიქსია“, ანუ გაგუდვა ყელზე ძლიერი ზეწოლის შედეგად.

უკრაინის არასამთავრობო ორგანიზაციამ “მედია– ინიციატივა ადამიანის უფლებებისათვის“ ტატიანა მუდრენკოს სიკვდილი დაადოკუმენტირა და საკუთარ საიტზე დამატებითი დეტალები გამოაქვეყნა. სკადოვსკის მაცხოვრებლები სოციალურ ქსელებში ვარაუდობენ, რომ უკრაინელი ქალის სიკვდილში გარეულია საოკუპაციო პოლიციის ერთ–ერთი ხელმძღვანელი, იგორ კუზმენიუკი. მათი თქმით, კოლაბორანტი სასტიკად იქცევა და პროუკრაინული პოზიციის გამო ადამიანებს აწამებს. ტატიანას ნათესავებიც არ გამორიცხავენ ქალის მკვლელობასთან მის კავშირს. ტატიანა სავარაუდოდ ერთადერთი მსხვერპლი არ არის.

ნატალია ჩერნაიამ არასამთავრობო ორგანიზაციას მისი ადგილობრივი ნაცნობების სიტყვები გადასცა, რომლის მიხედვით ოკუპანტებს პარტიზანულ საქმიანობაში ეჭვმიტანილი ადამიანები ქალაქგარეთ მდებარე საბავშვო ბანაკში გაჰყავთ, სადაც რუსი სამხედროები არიან ბაზირებული. პოლიციელები ხშირად იმეორებენ, რომ იქიდან უკან აღარავინ ბრუნდება. ქალაქგარეთ ოკუპანტებმა ტრანშეებიც ამოთხარეს და ადგილობრივები შიშობენ, რომ სწორედ იქ შეიძლება დამარხონ წამების მსხვერპლები.

შეგახსენებთ, ხერსონში რუსმა ოკუპანტებმა ადგილობრივი თეატრის მთავარი დირიჟორი, იური კერპატენკო საკუთარ სახლში დახვრიტეს მას შემდეგ, რაც მუსიკოსმა უარი თქვა მათთვის კონცერტის გამართვაზე.

რუსეთში მოღვაწე ქართველი მომღერალი და მსახიობი რუსეთს ,,სამხედრო ძლიერების დღეს“  ულოცავს.

პავლიაშვილმა საკუთარ გამომწერებს „ტელეგრამზე“ მიმართა: „ჩვენი ქვეყნის ერთიანობის დღეს გილოცავთ“ – წერს რუსეთში მოღვაწე ქართველი მომღერალი.

დღეს რუსეთში ,,სამხედრო ძლიერების დღეს“ აღნიშნავენ, რომელიც ქვეყანაში 2005 წლიდან აღინიშნება.

ამ დღეს მილოცვებს ავრცელებენ კრემლის პროპაგანდისტები, მათ შორის ჟურნალისტები და მომღერლები.

გაეროს მსოფლიო მემკვიდრეობის ობიექტებად აღიარებული მყინვარების ერთი მესამედი უახლოესი სამი ათწლეულის განმავლობაში დადნება. ამის შესახებ იუნესკოს ანგარიშშია საუბარი. მათ შორის არის კილიმანჯაროს , ალპების და აშშს იოსემიტის ნაციონალური პარკის მყინვარები.

ისინი დადნება იმის მიუხედავად, თუ რა ზომებს მიიღებს მსოფლიო კლიმატის ცვლილებების შესაჩერებლად – წერენ ანგარიშის ავტორები.

ანგარიში, რომელშიც მოცემულია პროგნოზები თანამგზავრულ მონაცემებზე დაყრდნობით, კლიმატის ცვლილების კონფერენციის წინ გამოქვეყნდა. COP27 მომავალ კვირას ეგვიპტეში გაიმართება. სულ მსოფლიო მემკვიდრეობის 50 ობიექტზე გაეროს მიერ 18600 მყინვარია დაფიქსირებული. ისინი დედამიწის გამყინვარებული ტერიტორიის დაახლოებით 10%–ს შეადგენენ და მოიცავენ როგორც ცნობილ ტურისტულ ადგილებს, ასევე ადგილობრივი მოსახლეობისთვის წმინდა ადგილებად მიჩნეულ მყინვარებს.

მათი შემცირება და გაქრობა ერთ–ერთი ნათელი დადასტურებაა იმისა, რომ დედამიწაზე ტემპერატურა იმატებს – ნათქვამია ანგარიშში.

“გვინდა იმედი ვიქონიოთ, რომ ვცდებით, მაგრამ ხელთ გვაქვს სამეცნიერო მტკიცებულებები. მყინვარები  კლიმატის ცვლილების ერთ–ერთი მთავარი ინდიკატორია, იმიტომ რომ ისინი თვალხილულია, და შეგვიძლია დავაკვირდეთ“– ამბობს იუნესკოს პროექტის თანამშრომელი, ანგარიშის ერთ–ერთი ავტორი კარვალიო რესენდე.

მყინვარების ორი მესამედი  მსოფლიო მემკვიდრეობის ობიექტებად აღიარებული სიიდან, ჯერ კიდევ შეიძლება გადარჩნენ, თუმცა, თუ მსოფლიო გლობალურ დათბობას 1.5 გრადუსით შეზღუდავს – ნათქვამია ანგარიშში.

გაეროს კიდევ ერთი ანგარიშის მიხედვით, რომელიც გასულ კვირას გამოქვეყნდა, ამჟამად კაცობრიობას ამ მიზნის მისაღწევად საიმედო გზები არ გააჩნია.

პროგნოზები წინა ანგარიშს ეყრდნობა, რომლის შედგენისას მყინვარების ფართობის ცვლილების გამოსათვლელად კომპიუტერული მოდელირება გამოიყენეს.

“ ბოლო პერიოდში მყინვარების დნობა ისტორიის მანძილზე უპრეცედენტოდ სწრაფად ხდება. 1900–იანი წლების შუა პერიოდში მყინვარები საკმაოდ სტაბილური იყო, თუმცა შემდეგ უჩვეულო სისწრაფით დაიწყეს დნობა“– ამბობს ბუფალოს უნივერსიტეტის ბროფესორი, ბეატა კსატო.

ანგარიშში ნათქვამია, რომ ზღვის დონის აწევის 4.5%–ს 2000–2020 წლების პერიოდში სწორედ მსოფლიო მემკვიდრეობის ობიექტების სიაში არსებული მყინვარების დნობა განაპირობებს. ყოველწლიურად ეს მყინვარები 58 მილიარდ ტონა ყინულს კარგავენ.

მყინვარების დაკარგვას სხვადასხვა მძიმე შედეგი შეიძლება მოჰყვეს. ბევრი ადამიანისთვის სწორედ მყინვარებია სასმელი და სოფლის მეურნეობისთვის საჭირო წყლის წყარო. მყინვარების დაკარგვამ შეიძლება წყლის დეფიციტი გამოიწვიოს გვალვიან სეზონებზე – ამბობენ ექსპერტები, რამაც მათი აზრით სასურსათო უსაფრთხოების საკითხები შეიძლება გაამწვავოს.

ანგარიშის ავტორები ვარაუდოებნ, რომ მყინვარების დნობით გამოწვეული წყალდიდობები ადგილობრივ მოსახლეობას დიდ ზიანს მიაყენებს და გამოდიან მოწოდებით სტიქიური უბედურებების თავიდან ასაცილებლად ადრეული შეტყობინების სისტემები შეიქმნას.

ყინულის და თოვლის დნობა ერთ–ერთი ათი ძირითადი საფრთხიდან, რაც კლიმატის ცვლილებას უკავშირდება – ნათქვამია კლიმატის ცვლილებებითან დკავშირებული მთავრობათაშორისი ჯგუფის ექსპერტების ანგარიშში.

 

რუსეთ–საქართველოს საზღვრის ზემო ლარსის გამშვებ პუნქტზე შაბათს მესაზღვრეებს რუსული მხრიდან ათ საათზე მეტხანს ყავდათ დაკავებული დაღესტნელი დები, რომლებიც ნათესავების მხრიდან ძალადობას გამოექცნენ. უფლებადამცველების დახმარებით მათ საბოლოოდ რუსეთის დატოვება და უსაფრთხო ადგილამდე მისვლა შეძლეს – წერს ბიბისი და გოგოების შესახებ რეპორტაჟს აქვეყნებს.

რუსეთიდან საქართველოში გადასვლისას 20 წლის ხადიჟატ ხიზრიევას, მის 18 წლის დას, ფატიმატ ხიზრიევას, ასევე მათ ბიძაშვილებს , ასევე დებს – 24 წლის ამინატ გაზიმაგომედოვას და 19 წლის ფატიმატ მაგომედოვას პრობლემები შეექმნათ.

სასაზღვრო პუნქტის თანამშრომლებმა რუსეთის მხრიდან მათ პასპორტები ჩამოართვეს ისე, რომ მიზეზები არ აუხსნეს, შემდეგ კი პოლიციაში დარეკეს. კითხვაზე პასუხად, რატომ დააკავეს ამდენ ხანს ქალები, გამშვები პუნქტის თანამშრომლებმა მათ გადაადგილებაზე მშობლების ნებართვა მოთხოვეს, მიუხედავად იმისა, რომ ისინი სრულწლოვანები არიან. გარდა ამისა, განაცხადეს, რომ მათ სანახავად ნათესავები მიდიოდნენ.

საქმეში ჩაერთო უფლებადამცველი კრიზისული ჯგუფი, რომელიც ჩრდილოეთ კავკასიაში მსგავს სიტუაციაში აღმოჩენილ ადამიანებს ეხმარება.

ორგანიზაციის ინფორმაციით გოგოები რეგულარულად იყვნენ ფიზიკური ძალადლების მსხვერპლი ნათესავების მხრიდან, რომლებიც მათგან რელიგიურ მორჩილებას ითხოვდნენ და ყოველ წვრილმან გადაცდომაზე სჯიდნენ. ბავშვობაში გოგოებს ქალური წინაცვეთა ჩაუტარეს. მსოფლიოს ქვეყნების დიდ ნაწილში აკრძალული ეს პრაქტიკა დაღესტნის სოფლებში კვლავ მოქმედებს. ფონდის მონაცემებით კუსტარულ პირობებში ჩატარებული ოპერაციები ხშირად ქალებში სერიოზულ ფსიქოლოგიურ პრობლემებს იწვევს.

უფლებადამცველი ჯგუფ “მარემიდან“, სვეტლანა ანოხინა “კავკაზსკი უზელს“ უყვება, რომ დებს გავლენიანი ნათესავები აღმოაჩნდათ.

“გოგოები ძებნაში არ ყოფილან, თუმცა ნათესავებს დიდი კავშირები აქვთ. ხადჟამლახი, საიდანაც გოგოები არიან წარმოშობით, ძალიან მდიდარი სოფელია. ისინი სახლიდან სამი თვის წინ წავიდნენ, სამი თვე ისინი კრიზისულ თავშესაფრებში იყვნენ. ნათესავები მათ პოვნას ცდილობდნენ, მათ შორის, ჩემთანაც გზავნიდნენ ხალლხს. თავიდან მათ მოძებნას ქალი ცდილობდა, მერე მამის ძმაკაცი, რომელიც რეკავდა და ამბობდა, რომ სახლში გოგოები იმდენად უყვართ, რომ თანმხლების გარეშე არსად უშვებენ“– ამბობს ანოხინა.

გოგოები ჩიოდნენ, რომ მას სახლში სცემდნენ, განათლების მიღებას უკრძალავდნენ, ძალით გათხოვებას უპირებდნენ – წერს მედია, თუმცა ნათესვები ამას უარყოფენ.

უფლებადამცველების ინფორმაცით, ლარსის მესაზღვრეებმა გოგოების საზღვრის კვეთის შეფერხება მათ სახელზე დავალიანების არსებობით ახსნეს. თუმცა სასაზღვრო პუნქტში მივიდა მათი ადვოკატი ლეისან მანაპოვა, რომელიც კრიზისჯგუფთან თანამშრომლობს, და მიტანა ცნობა დავალიანების არარსებობის შესახებ, რის შემდეგაც ერთ–ერთმა მესაზღვრემ აღიარა, რომ ხელმძღვანელობისგან სიგნალს ელოდება.

სასაზღრვრო სამსახური ინციდენტზე ოფიციალურ კომენტარს არ აკეთებს.

შემდეგ სასაზღვრო–გამშვებ პუნქტზეგ ოგოების დედები და მათი ბიძაშვილი ბიჭი მივიდნენ, თუმცა ადვოკატმა მოახერხა პოლიცია დაერწმუნებინა, რომ ისინი გოგოებთან არ შეეშვათ. ამ დროს გოგოები სასაზღვრო პუნქტის საფილტრაციო ოთახში იყვნენ მოთავსებული.

ახალგაზრდა ქალების მამა , ჰაჯიმურად ხიზრიევი ამბობს, რომ საკუთარ შვილებს მაინც დაიბრუნებს და მათ “ტვინი გადაუბრუნეს“. ის უარყოფს, რომ ოდესმე სცემდა შვილებს, არადა უფლებადამცველებს ამის დამადასტურებელი ფოტოები აქვთ. მამა პირობას დებს, რომ თუ გოგოები დაბრუნდებიან, თითს არ დააკარებს, თუმცა დებმა დაბრუნებაზე უარი თქვეს. საღამოს 10 საათის შემდეგ გაჩნდა ინფორმაცია, რომ ადვოკატთან ერთად გოგოებმა მაინც მოახერხეს რუსეთ–საქართველოს საზღვრის გადაკვეთა და “ნეიტრალურ ტერიტორიაზე იმყოფებიან.“ მოგვივანებით, ღამით კი კრიზისულმა ჯგუფმა განაცხადა, რომ მათ საქართველოს მხარეს საზღვარი გადაკვეთეს და ახლა “უსაფრთხო ადგილზე იმყოფებიან.“

ასეთი შემთხვევები დაღესტანში და ჩეჩნეთში ხშირია. სპეციალური უფლებადამცველი ჯგუფები ზოგჯერ ახერხებენ ოჯახური ძალადობისგან გამოქცეულ ქალებს დაეხმარონ, თუმცა ეს ყოველთვის ვერ ხერხდება.

შეგიმჩნევიათ ყავაზე უცნაური დამოკიდებულება? ხანდახან ცხელი, გამამხნევებელი სასმელის სურვილი დაუძლეველია. რა მოხდება, თუ ყავაზე უარს ვიტყვით და რამდენად ადვილია ამ სასმელზე დამოკიდებულების დაძლევა?

ბევრმა არ იცის, რა იქნება, თუ უცებ შეწყვეტს  ყავის სმას. როდესაც უცებ უარს ვამბობთ ყავაზე, ჩვენი ორგანიზმი ადრენალინის და დოფამინის უკმარისობას განიცდის.

შეიძლება თუ არა ადვილად შევწყვიტოთ ყავის სმა? შეიძლება, თუმცა ეს ბევრს შეიძლება რთულ ამოცანად მოეჩვენოს. თავიდან ამან შეიძლება თავის ტკივილიც გამოიწვიოს. ადრენალინის ნაცვლად ორგანიზმი ადენოზინის გამოყოფას იწყებს. ეს არის დაღლილობის ჰორმონი. ამიტომაც, ყავის სმას თანდათანობით უნდა გადავეჩვიოთ. ერთბაშად არ ღირს.

როგორ უნდა ვთქვათ უარი ყავაზე.

თუ არ იცით, როგორ გადაეჩვიოთ  ყავის სმას, ეცადეთ ეს თანდათანობით გააკეთოთ. თანდათან შეამცირეთ დოზირება. მაგალითად, დილით მომზადებული ყავის მინიმუმ ნახევარი გადაღვარეთ და დარჩენილ ნაწილს წყალი დაამატებთ. თქვენი ორგანიზმი კოფეინს მიიღებს, თუმცა არა დიდი რაოდენობით.

ამის შემდეგ თანდათანობით გაზარდეთ გადაღვრილი ყავის რაოდენობა და ის წყლით შეავსეთ.

ასევე შეიძლება გადაეჩვიოთ ყავას რძით. თუმცა, ამ შემთხვევაში სასმელს წყლის ნაცვლად მეტი რძე დაუმატეთ.

რამდენ ხანს გრძელდება ყავის სმის შეწყვეტის შემდეგ მისი დალევის დაუძლეველი სურვილი?

ყავაზე უარის თქმა, სამწუხაროდ მართლაც იწვევს იმ ხარისხის ნდომას, რომ გაძლება რთულია. სლენგით ამას ჩვენთან “ლომკას“ უწოდებენ, მეცნიერულად კი აბსტინენცია ქვია. მზად იყავით და წინასწარ გაიაზრეთ, რამდენ ხანს გრძელდება ყავის დაუძლეველი ნდომა. ძლიერი სურვილი მიიღოთ სითხე კოფეინით, ზუსტად 12 საათის შემდეგ დგება იქიდან, რაც ორგანიზმმა ბოლოჯერ მიიღო “ყავის დოზა“.

კოფეინი, უფრო სწორად მისი არარსებობა საკმაოდ მძიმე შეგრძნებებს იწვევს და ეს დაახლოებით ერთი კვირა გრძელდება. ამ დღეებში შეიძლება გქონდეთ დაღლილობის შეგრძნება და ცუდი განწყობა. ყავის ნდომა შეიძლება აუტანელი აღმოჩნდეს. ასევე, შეიძლება მოგეჩვენოთ, რომ ყავის გარეშე მუშაობა უფრო რთულია. თუმცა, ყველაფერი გაივლის. ყავაზი უარის თქმა და მისი ნდომით გამოწვეული დისკომფორტი საბოლოოდ იმას გამოიწვევს, რომ თქვენი ორგანიზმი ბევრად უკეთესად იმუშავებს.

რა მოხდება, თუ მთლიანად უარს ვიტყვით ყავაზე

ყავაზე მთლიანად უარის თქმა გამოიწვევს იმას, რომ უკეთესი ძილი გექნებათ, დილით კი მეტი ენერგია.  გარდა ამისა, კოფეინდამოკიდებულებისგან სრული “განკურნება“ დადებითად აისახება ღვიძლის მუშაობაზე და ლიბოდოს მომატებასაც კი გამოიწვევს. ქალები ხშირად აღიარებენ, რომ ყავაზე უარის თქმის შემდეგ მათ მართლაც სრულიად განსხვავებული შეგრძნებები აქვთ.

კოფეინზე უარის თქმის შემდეგ ხშირია წონაში დაკლების შემთხვევებიც. ბევრს ხომ ყავა უშაქროდ ვერც კი წარმოუდგენია, ყავის ბევრი სახეობა–კაპუჩინო, ლატე და ა.შ. კი საკმაოდ კალორიულია.

ყავაზე უარის თქმა გარეგნობაზეც დადებითად აისახება. ასეთი სასმელების მიღებისას ორგანიზმში ზედმეტი რაოდენობით გამოიყოფა სტრესის ჰორმონი კორტიზოლი, რომელიც ცუდად მოქმედებს კანზე და დაბერების პროცესს აჩქარებს. ასე რომ, ყავაზე უარის თქმას ეს დადებითი შედეგიც აქვს.

ჟურნალისის და ტელეწამყვანის, ქსენია სობჩაკის სახლში, პადმასკოვიეში ჩხრეკა მიმდინარეობს. ამის შესახებ რუსული სახელმწიფო საინფორმაციო სააგენტოები საკუთარ წყაროებზე დაყრდნობით წერენ. გუშინ გამოჩნდა ინფორმაცია მისი კომერციული დირექტორის, კირილ სუხანოვის დაპატიმრების შესახებ.

ჩხრეკა გამოძალვის ბრალდებით აღძრული საქმის გამოძიების ფარგლებში მიმდინარეობს, რომელიც კირილ სუხანოვის წინააღმდეგ აღიძრა. თავად ჟურნალისტს ჯერჯერობით არანაირი პროცესუალური სტატუსი ამ საქმეში არ აქვს.

სუხანოვი ეჭვმიტანილია “ჩინოვნიკების მიმართ გამოძალვაში ტელეგრამ–არხების საშუალებით“– წერს სააგენტო რია ნოვოსტი.

კიდევ ერთი გამოცემის, რბკ–ს წყაროს ინფორმაციით კი საქმე უკავშირდება ფულის გამოძალვას ე.წ. დაბლოკვისთვის, რაც ნიშნავს ფულის სანაცვლოდ არხის მიერ ამა თუ იმ პერსონის ან კომპანიის არმოხსენიებას.

სობჩაკის კომერციულ დირექტორთან ერთად დააკავეს “ტატლერის“ ყოფილი მთავარი რედაქტორი, არიანა რომანოვსკი – წერენ რბკ და ტელეგრამ არხი “ბაზა“.

სობჩაკმა გუშინ სუხანოვის დაპატიმრებას ჟურნალისტიკაზე ზეწოლა უწოდა.

“ეს უბრალოდ ბოდვაა, სასაცილოა, ნონსენსია. კირილი ბიზნესმენია და ჩვენმ რეკლამებზე მუშაობს. მე და მთელი რედაქცია ამ ფაქტს ვაფასებთ როგორც მორიგ ზეწოლას ქვეყანაში ჟურნალისტიკაზე. ჩვენ ვერაფერი მოგვიძებნეს და ეს აცოფებთ. ისინი მუდმივად აპატიმრებენ ჩემს ჟურნალისტებს. ახლა კირილი დაიჭირეს და საქმეს კერავენ“– ნათქვამია სობჩაკის ტელეგრამ არხზე გავრცელებულ განცხადებაში.

უკრაინაში ომის დაწყების შემდეგ რუსეთში ჟურნალისტებზე ზეწოლა მნიშვნელოვნად გაიზარდა. მედია ორგანიზაციების ასობით თანამშრომელი იძულებული გახდა ქვეყანა დაეტოვებინა სისხლის სამართლის კოდექსში ახალი მუხლის ამოქმედების შემდეგ, რომელიც რუსული “არმიის დისკრედიტაციისთვის“ და “სამხედრო ფეიკებისთვის“ ციხეს ითვალისწინებს.

სობჩაკის მედია პროექტს ტელეგრამზე 1.5 მილიონი ხელმომწერი ყავს, იუთუბ არხზე კი 3.2 მილიონი გამომწერი. დღემდე ის კარგად ახერხებდა ჯარიმებისთვის და დაპატიმრებისთვის თავი აერიდებინა. თუმცა, სამართალდამცავების ყურადღება არაერთხელ მიიპყრეს ადამიანებმა, ვისთანაც სობჩაკმა ინტერვიუ აიღო.

7 სექტემბერს ცნობილი გახდა, რომ რეჟისორი და დოკუმენტალისტი, ვიტალი მანსკი ცილისწამების შესახებ სისხლის სამართლის საქმის ფიგურანტი გახდა, რომელიც იუთუბ არხზე სობჩაკთან მისი ინტერვიუს შემდეგ რეჟისორ ნიკიტა მიხალკოვის მოთხოვნით აღიძრა. ინტერვიუში მანსკი ამბობდა, რომ მოსკოვის საერთაშორისო კინოფესტივალზე ბიუჯეტის 85%–ს იპარავენ. ამ ფესტივალის პრეზიდენტი მიხალკოვია. სობჩაკი ამ საქმეზე მოწმის სახით დაკითხეს.

ოქტომბრის დასაწყისში სახელმწიფო მედიაში გამოჩნდა ინფორმაცია, რომ ამავე ინტერვიუს გამო პოლიციამ შეიძლება საქმე თავად სობჩაკის წინააღმდეგ აღძრას სახელმწიფო ხელისუფლების წინააღმდეგ ფეიკების გავრცელებისთვის. თუმცა, ამ საქმეს გაგრძელება არ მოყოლია.

გასულ კვირას სობჩაკის პროექტის ჟურნალისტები, სერგეი ერჟენკოვი და ევგენია ტერენოვა ტვერში დაიჭირეს, როცა ისინი მობილიზებულების საცხოვრებელ პირობებს იღებდნენ.

მანამდე პოლიციამ საქმე აღძრა სერგეი ერჟენკოვის და ბლოგერ სერგეი სკორეევის წინააღმდეგ ვანდალიზმის გამო. მარტში მათ რიაზანსკის ოლქში ლენინის ძეგლის პოსტამენტზე დაწერეს “პუტინო წადი!“. აგვისტოში მათ სასამართლომ ამის გამო ჯარიმა შეუფარდა.

ძვირადღირებული ჯიპების ლატვიელმა მწარმოებელმა, Dartz–მა მისი ახალი ქმნილება– Prombron The Dictator Aladeen MMXXII წარმოადგინა. ავტომობილი ლიმიტირებული სერიით გამოვა, ფასი კი 750 000 ევროდან დაიწყება.

ახალი Dartz Prombron The Dictator Aladeen MMXXII ეკრანებზე ფილმ “დიქტატორის“ გამოსვლის 10 წლისთავს მიეძღვნა. სწორედ ამ კომედიამ გაუთქვა სახელი Dartz–ს: საშა ბარონ კოენის გმირი, დიქტატორი ჰაფაზ ალადინი სწორედ მოოქროვილი ლატვიური ჯიპით დადის.

ახალ მოდელს საფუძვლად დაედო მოდელი Dartz Prombron Iron Diamond. განახლებულ მოდელში წინა ნაწილის დიზაინი შეცვლილია, ასევე დაყენებულია განახლებული ბორბლები.

სტანდარტულ Dartz Prombron–თან ერთად მოხდება დაჯავშნული ვარიანტის წარმოებაც, რომლის ღირებულება 1 მილიონი ევრო იქნება. მისი კომპოზიტური დაცვა უძლებს 7,62 მმ–იან სნაიპერულ შაშხანას, კარის სახელურებში ელექტროშოკერებია ჩამონტაჟებული, გარდა ამისა, ავტომობილი ტყვიაგაუმტარი ქოლგითაც არის აღჭურვილი.

Dartz Prombron–ის სალონს ინდივიდუალური შეკვეთით ქმნიან ეგზოტიკური ცხოველების ტყავით, ასევე შემოთავაზებაშია 555 სახეობის ხე.

შიდა მოწყობილობების დეტალები და ღილაკების ნაწილი ნამდვილი ოქროთია დაფარული,  სალონში შედის ვინტაჟური კასეტის მაგნიტოფონი, სეიფი თითის ანაბეჭდის სკანერით და სპეციალური განყოფილებაც კი კალაშნიკოვის ავტომატისთვის.

Dartz Prombron–ის ახალი მოდელი Mercedes-Benz GLS–ის პლატფორმაზეა აგებული და აღჭურვილია 4,0-ლიტრიანი V8 ტვინ–ტურბოთი. დამატებით დახვეწის შემდეგ მისმა სიმძლავრემ 800 ცხენისძალას მიაღწია, რაც საშუალებას იძლევა 100კმ/სთ სიჩქარეს მანქანამ 3.8 წამში მიაღწიოს და ჯამში 280 კმ/სთ სიჩქარე განავითაროს.

“საქართველოში ვერ დავბრუნდები, ხალხი მოკვლით მემუქრება.. ჩემი ბიძა ერთ-ერთი მათგანია” – ამის შესახებ ქართველმა დიზაინერმა და  Balenciaga-ს კრეატიულმა დირექტორმა დემნა გვასალიამ,  გამოცემა NYT Style Magazine-თან ინტერვიუში განაცხადა.

“მე ვერ დავბრუნდები საქართველოში, რადგან ხალხი დამემუქრა მოკვლით…. ჩემი ბიძა ერთ-ერთი მათგანია… ვიზრდებოდი ისეთ ქვეყანაში, სადაც ვერ ვიტყოდი, რომ გეი ვიყავი, ყოველთვის ვცდილობდი გამოვჩენილიყავი ისეთი მაგარი ბიჭი, რომელიც გადარჩებოდა იმ უბნებში, სადაც მე ვცხოვრობდი, მაგრამ შინაგანად ასეთად არ ვგრძნობდი თავს”საქართველოში ვერ დავბრუნდები, ხალხი მოკვლით მემუქრება.. ჩემი ბიძა ერთ-ერთი მათგანია – ამბობს დემნა გვასალია